ദിലീപേട്ടന്‍ കുറ്റവാളിയല്ലെന്ന് തെളിഞ്ഞാല്‍? ഡബ്ലുസിസി വേണമെന്നില്ലെന്നും അനുശ്രീ!

സംഘടനകളില്‍ അംഗമല്ല

മലയാള സിനിമയിലെ ഒരു സംഘടനയിലും താന്‍ അംഗമല്ല. അത്തരത്തില്‍ സ്ത്രീകള്‍ക്കായി ഒരു സംഘടന വേണമെന്നോ അത് വഴി അഭിപ്രായം പ്രകടിപ്പിക്കണമെന്നോ ഇതുവരെ തോന്നിയിട്ടില്ല. സിനിമയിലെ വനിതാസംഘടനയില്‍ അംഗമല്ലാത്തതിനെക്കുറിച്ച് ചോദിച്ചപ്പോഴായിരുന്നു താരം ഈ രീതിയില്‍ പ്രതികരിച്ചത്. അവിടെ പോയി ഒരു കാര്യം പറഞ്ഞ് അത് മാറ്റൂ അല്ലെങ്കില്‍ ഇത് മാറ്റൂ എന്ന് പറയണമെന്ന് ഇന്നുവരെ തോന്നിയിട്ടില്ലെന്നും താരം പറയുന്നു.

അമ്മ കൈകാര്യം ചെയ്യുന്നില്ലെന്ന പരാതി

നടി ആക്രമണത്തിനിരയായ സംഭവവുമായി ബന്ധപ്പെട്ട വിഷയത്തില്‍ താരസംഘടനയായ അമ്മ മൗനം പാലിക്കുന്നുവെന്നും വേണ്ടവിധത്തില്‍ വിഷയം പരിഗണിക്കുന്നില്ലെന്നും കണ്ടപ്പോഴാണ് വനിതാസംഘടന രൂപീകരിച്ചത്. ഡബ്ലുസിസി ഉടലെടുക്കാനുണ്ടായ സാഹചര്യം ഇതായിരുന്നു. സംഘടനയിലെ അംഗങ്ങള്‍ മുഖ്യമന്ത്രിയെ സന്ദര്‍ശിച്ച് സ്ത്രീസുരക്ഷ ഉറപ്പാക്കാന്‍ ആവശ്യപ്പെട്ടിരുന്നു.

ദിലീപിനെ കുറ്റം പറയുന്നു

സംഭവവുമായി ബന്ധപ്പെട്ട് എല്ലാവരും ദിലീപിനെയായിരുന്നു കുറ്റപ്പെടുത്തിയത്. എന്നാല്‍ ഇപ്പോഴും അറിയില്ല അതിന് പിന്നില്‍ പ്രവര്‍ത്തിച്ചത് ദിലീപാണോയെന്ന്. ദിലീപേട്ടനല്ല അത് ചെയ്തതെന്ന് തെളിഞ്ഞാല്‍ ഈ പറയുന്നവര്‍ അത് മാറ്റിപ്പറയുമോ? മുന്‍പ് പറഞ്ഞതൊക്കെ തിരിച്ചെടുക്കാന്‍ അവര്‍ക്ക് കഴിയുമോയെന്നും താരം ചോദിക്കുന്നു.

ഉറപ്പുള്ള കാര്യങ്ങള്‍ മാത്രം സംസാരിക്കുക

നമുക്ക് ഉറപ്പുള്ള, ഒരിക്കലും മാറ്റിപ്പറയണ്ടാത്ത തരത്തിലുള്ള കാര്യങ്ങള്‍ മാത്രം പൊതുസമൂഹത്തില്‍ പറയുക. കൂട്ടായ്മയില്‍ പറയുന്ന കാര്യങ്ങള്‍ പൊതുസമൂഹത്തോട് പറയാതിരിക്കുക. കൂട്ടായ്മകള്‍ ഇനിയും ഉണ്ടാവണം, സ്ത്രീകള്‍ ഉയര്‍ന്നുവരികയും വേണം. എന്നാല്‍ അതിനകത്തെ പ്രശ്‌നങ്ങള്‍ അവിടത്തെന്ന നില്‍ക്കണമെന്നാണ് അനുശ്രീ പറയുന്നത്.

ദിലീപിന്റെ പേര് പറഞ്ഞില്ലെങ്കിലും

ദിലീപേട്ടന്റെ പേരെടുത്ത് പറഞ്ഞില്ലെങ്കിലും പലരും ഉദ്ദേശിച്ചത് ദിലീപിനെത്തന്നെയായിരുന്നുവെന്ന് അവരുടെ പ്രസ്താവനകള്‍ കേള്‍ക്കുമ്പോള്‍ത്തന്നെ മനസ്സിലാവും. അമ്മ ദിലീപിനെ പുറത്താക്കിയിരുന്നു. അതിനിടയ്ക്ക് ഇവര്‍ സംഘടനയുമായി എത്തി. കുറേ കാര്യങ്ങള്‍ പറഞ്ഞു. എന്നിട്ടിപ്പോള്‍ എവിടെ അവരെന്നും താരം ചോദിക്കുന്നു.

അമ്മയില്‍ അംഗമാവുന്നു

സിനിമയിലെത്തിയ സമയത്ത് താന്‍ അമ്മയില്‍ മെമ്പര്‍ഷിപ്പ് എടുത്തിരുന്നില്ല. തുടക്കകാലത്ത് തനിക്ക് ഇത്രയധികം ശോഭിക്കാന്‍ പറ്റുമെന്ന് കരുതിയില്ലായിരുന്നു. അന്ന് എന്തിനാണ് പൈസ മുടക്കി അംഗത്വം എടുക്കുന്നതെന്നായിരുന്നു മനസ്സില്‍. സിനിമയിലെത്തി വര്‍ഷമേറെയായിട്ടും അംഗത്വം എടുക്കാത്തതിനെക്കുറിച്ച് പലരും ചോദിച്ച് തുടങ്ങിയിട്ടുണ്ട്. ഇടവേള ബാബുച്ചേട്ടനെ വിളിച്ച് മെംബര്‍ഷിപ്പ് എടുക്കണമെന്ന കാര്യത്തെക്കുറിച്ച് സംസാരിച്ചിട്ടുണ്ടെന്നും അനുശ്രീ വ്യക്തമാക്കിയിട്ടുണ്ട്.