'ബഡായി ബംഗ്ലാവിലെ പൊട്ടിപ്പെണ്ണായാണ് ഇപ്പോഴും ആളുകള്‍ എന്നെ കാണുന്നത്'; പുതിയ യൂട്യൂബ് ചാനലുമായി ആര്യ

തന്റെ യൂട്യൂബ് ചാനലിലൂടെ ആരാധകരുമായി കൂടുതല്‍ സംവദിക്കാന്‍ താത്പര്യം പ്രകടിപ്പിക്കുന്ന ആര്യ തന്റെ എല്ലാ വിശേഷങ്ങളും ഇനി മുതല്‍ യൂട്യൂബ് ചാനലിലൂടെ പങ്കിടുമെന്ന് അറിയിക്കുകയാണ്. ആര്യയുടെ വാക്കുകളില്‍ നിന്നും:' ഈ ഫീല്‍ഡില്‍ വന്നിട്ട് 15 വര്‍ഷത്തില്‍ കൂടുതലായി. ചെറുപ്പം മുതല്‍ ഉള്ള ആഗ്രഹമായിരുന്നു സിനിമയില്‍ അഭിനയിക്കണമെന്ന്.

മോഡലിങ്ങിലൂടെ തുടങ്ങി പിന്നെ സീരിയലില്‍ അഭിനയിച്ചു. അവിടുന്ന് പിന്നെ അവതാരകയായി. പിന്നീട് കോമഡി ആര്‍ട്ടിസ്റ്റായി. കോമഡി ആര്‍ട്ടിസ്റ്റില്‍ നിന്ന് പിന്നെ ക്യാരക്ടര്‍ ആര്‍ട്ടിസ്റ്റിലേക്ക് എത്തിനില്‍ക്കുകയാണ് ഇപ്പോള്‍. ബഡായി ബംഗ്ലാവിലൂടെയാണ് ആളുകള്‍ക്ക് എന്നെ പരിചയം. കോമഡിയുമായി ഒരു ബന്ധവുമില്ലാത്ത ഞാന്‍ ഇത്രയും വലിയ ഒരു കോമഡി ഷോയുടെ ഭാഗമായി.

അത് പ്രേക്ഷകര്‍ക്ക് ഇഷ്ടപ്പെട്ടു. രമേഷ് പിഷാരടിയുടെ പൊട്ടിയായ ഭാര്യ ആയിട്ടാണ് ബഡായി ബംഗ്ലാവിലെത്തിയത്. അത് ഒരു സ്‌ക്രിപ്റ്റഡ് ക്യാരക്ടര്‍ ആയിരുന്നു. ചില ആളുകളെങ്കിലും കരുതിയിരുന്നത് ഞാന്‍ റിയല്‍ ലൈഫിലും ഇങ്ങനെ തന്നെയായിരുന്നു എന്നാണ്. ഇതിന് ഒരു മാറ്റം വന്നത് ഞാന്‍ ബിഗ് ബോസില്‍ മത്സരാര്‍ഥിയായി എത്തിയപ്പോഴായിരുന്നു.

പക്ഷേ ബിഗ് ബോസില്‍ വന്ന ശേഷം ചിലര്‍ക്കെങ്കിലും എന്നോട് അപ്രീതി തോന്നി. ബിഗ് ബോസിന് ശേഷം നിരവധി നെഗറ്റീവുകളും അതേപോലെ പോസിറ്റീവുകളും ലഭിച്ചു. എങ്കിലും ബഡായി ബംഗ്ലാവാണ് എന്റെ ജീവിതത്തിലെ നാഴികക്കല്ല്. ബഡായി എന്ന പേര് ചേര്‍ത്ത് എന്നെക്കുറിച്ച് എവിടെ പറഞ്ഞാലും അഭിമാനം മാത്രമേ ഉള്ളൂ. ആര്യ ബഡായി അടിയ്ക്കുകയാണ് എന്ന് പറഞ്ഞാലും എനിക്ക് കുഴപ്പമില്ല. ' ആര്യ വ്യക്തമാക്കുന്നു.

യൂട്യൂബ് ചാനലിലൂടെ തന്റെ എല്ലാ വിശേഷങ്ങളും പങ്കുവെക്കാന്‍ ആഗ്രഹിക്കുന്ന ആര്യ തുറന്ന വിമര്‍ശനങ്ങളെയും സ്വാഗതം ചെയ്യുന്നു. ആരോഗ്യകരമായ വിമര്‍ശനങ്ങളെ താന്‍ ഇരുകൈയും നീട്ടി സ്വീകരിക്കുമെന്നും അവ എന്തായാലും പ്രേക്ഷകരുടെ ഭാഗത്ത് നിന്നുണ്ടാകണമെന്നും ആര്യ ആഭ്യര്‍ത്ഥിച്ചു.

ബിഗ് ബോസ് സീസണ്‍ 2-വിലെ ശക്തരായ മത്സരാര്‍ത്ഥികളിലൊന്നായിരുന്നു ആര്യ. സീസണ്‍ 2 അവസാനിച്ച ശേഷം ബിഗ് ബോസ് വീട്ടിലെ ആര്യയുടെ പ്രവൃത്തികള്‍ വിലയിരുത്തി അവര്‍ക്കു നേരെ പലപ്പോഴും സോഷ്യല്‍ മീഡിയയുടെ ആക്രമണവും പതിവായിരുന്നു. ആര്യയുടെ ചിത്രങ്ങള്‍ക്കും മറ്റും മോശമായി കമന്റുകള്‍ പോസ്റ്റ് ചെയ്യുകയും സൈബല്‍ ബുള്ളീയിങ്ങും ശക്തമായിരുന്നു.

ബഡായി ബംഗ്ലാവിലൂടെയാണ് ആര്യ പ്രശസ്തയാകുന്നത്. ബഡായി ബംഗ്ലാവില്‍ രമേഷ് പിഷാരടിയുടെ ഭാര്യയായുള്ള ഹാസ്യവേഷമാണ് ആര്യക്ക് ജനശ്രദ്ധ നേടിക്കൊടുത്തത്. നിരവധി സിനിമകളിലും ആര്യ സഹനടിയായി വേഷമിട്ടിട്ടുമുണ്ട്. ലൈലാ ഓ ലൈല, ഒരു സെക്കന്‍ഡ് ക്ലാസ് യാത്ര, കുഞ്ഞിരാമായണം, പാവാ, പ്രേതം, തോപ്പില്‍ ജോപ്പന്‍, അലമാര, ഉറിയടി, ഉള്‍ട്ട എന്നീ ചിത്രങ്ങളില്‍ ശ്രദ്ധേയമായ വേഷങ്ങളില്‍ അഭിനയിച്ച് കയ്യടി നേടിയിട്ടുണ്ട് താരം.

നിരവധി ടെലിവിഷന്‍ ഷോകളുടെ അവതാരകയായും ആര്യ ശ്രദ്ധ നേടി. മുന്‍പ് അനേകം സീരിയലുകളിലും ആര്യ പ്രധാന കഥാപാത്രമായി വേഷമിട്ടിട്ടുണ്ട്.