'നീ ആരാണെന്ന് എനിക്കും നമ്മുടെ കുടുംബത്തിനും സുഹൃത്തുക്കൾക്കും അറിയാം അതുപോരെ?'; ഭർത്താവിനെ കുറിച്ച് ഭാവന

അറുപതിലധികം ചിത്രങ്ങളിൽ അഭിനയിച്ച ഭാവന 2018 ജനുവരി 23നാണ് സുഹൃത്തും കന്നട സിനിമ നിർമ്മാതാവായ നവീനെ വിവാഹം ചെയ്തത്. നീണ്ട അഞ്ചുവർഷത്തെ പ്രണയത്തിനൊടുവിലായിരുന്നു ഭാവനയുടേയും നവീന്റേയും വിവാഹം.

2012ല്‍ റോമിയോ എന്ന ചിത്രത്തിന്റെ ഷൂട്ടിംങിനിടെയാണ് ഭാവനയും നവീനും പരിചയത്തിലാവുന്നത്. റോമിയോ എന്ന ചിത്രത്തിന്റെ നിര്‍മ്മാതാവ് നവീന്‍ ആയിരുന്നു.

വിവാഹശേഷം കന്നട സിനിമകളിലാണ് ഭാവന കൂടുതലും അഭിനയിച്ചത്. ചില ടെലിവിഷൻ പരിപാടികളിലും മറ്റും പങ്കെടുക്കാൻ മാത്രമാണ് ഭാവനയെ മലയാളത്തിലേക്ക് എത്തിയിരുന്നത്.

ഇപ്പോഴിത ഭർത്താവ് നവീനെ കുറിച്ച് ഭാവന പങ്കുവെച്ച സോഷ്യൽമീഡിയ കുറിപ്പാണ് വൈറലാകുന്നത്. 'ഞാൻ നിന്നെ സ്നേഹിക്കുന്നു... നീ ആരാണെന്ന് എനിക്കറിയാം. നീ ആരാണെന്ന് നിന്റെ സുഹൃത്തുക്കൾക്കും കുടുംബാംഗങ്ങൾക്കും അറിയാം. അത് പോരേ...?. അപ്പോൾ ഞാൻ അദ്ദേഹത്തോട് പറഞ്ഞു... അതെ... എനിക്ക് വേണ്ടതും അതാണെന്ന്...' ഭർത്താവ് നവീനൊപ്പമുള്ള പ്രണയാദ്രമായ ചിത്രം പങ്കുവെച്ച് ഭാവന കുറിച്ചു.

ഭാവനയുടെ സോഷ്യൽമീഡിയ പോസ്റ്റ് പ്രത്യക്ഷപ്പെട്ടതോടെ നിരവധി ആരാധകർ കമന്റുമായി എത്തി. 'ഏറ്റവും സുരക്ഷിതമായ കരങ്ങളിലാണ് ചെന്നുപെട്ടത്... നിങ്ങളെ ദൈവം അനു​ഗ്രഹിക്കട്ടെ...' തുടങ്ങിയ കമന്റുകളാണ് പലരും കുറിച്ചത്.

ദിവസങ്ങൾക്ക് മുമ്പ് വസ്ത്ര ധാരണത്തിന്റെ പേരിൽ വലിയ രീതിയിൽ പരിഹസിക്കപ്പെട്ട നടി കൂടിയാണ് ഭാവന. ഭാവന വെളുത്ത ടോപ്പ് ധരിച്ച് ഗോൾഡൻ വീസ സ്വീകരിക്കാനെത്തുന്ന ഫോട്ടോയും വീഡിയോയും വ്യാപകമായി പ്രചരിച്ചതോടെയാണ് താരത്തിനെതിരെ സൈബർ ബുള്ളിയിങ് വന്ന് തുടങ്ങിയത്.

ടോപ്പിനടിയിൽ വസ്ത്രമില്ലെന്നായിരുന്നു പ്രചാരണം. കൈ ഉയർത്തുമ്പോൾ കാണുന്നത് ശരീരമാണെന്നായിരുന്നു ആക്ഷേപം. യഥാർഥത്തിൽ ടോപ്പിന് താഴെ ദേഹത്തോട് ചേർന്ന് കിടക്കുന്ന ശരീരത്തിന്റെ അതേ നിറമുള്ള വസ്ത്രം ഭാവന ധരിച്ചിരുന്നു. പരിഹാസം കൂടിയതോടെ ഭാവന തന്നെ പ്രതികരിച്ച് എത്തിയിരുന്നു.

'അകത്ത് സ്ലിപ്പെന്ന ഭാഗം കൂടി ചേർന്നതാണ് ആ ടോപ്പ്. സ്ലിപ്പ് ദേഹത്തോട് ചേർന്ന് കിടക്കുന്ന വസ്ത്രമാണ്. ഇതൊരു പുതിയ കണ്ടുപിടിത്തമൊന്നുമല്ല. ധാരാളം പേർ ഉപയോഗിക്കുന്നുണ്ടെന്ന് അത് ഉപയോഗിച്ചവർക്കും കണ്ടവർക്കും അറിയാം.'

'ടോപ് മാത്രം ധരിച്ച് പുറത്തുപോകുന്ന ഒരാളല്ല ഞാൻ. എന്ത് കിട്ടിയാലും എന്നെ വേദനിപ്പിക്കുന്ന ചിലരുണ്ട്. ആക്ഷേപിക്കുന്നതിലും അസഭ്യം പറയുന്നതിലുമാണ് അവരുടെ സന്തോഷം. അവർക്ക് ഇതിലൂടെ മനസിന് സന്തോഷവും സുഖവും കിട്ടുന്നുവെങ്കിൽ കിട്ടട്ടെ. അവരോട് എനിക്കൊന്നും പറയാനേയില്ല' എന്നാണ് ഭാവന പ്രതികരിച്ചത്.