തുടക്കക്കാരാകുമ്പോൾ‌ ഉപയോ​ഗിക്കാൻ ശ്രമിക്കും; സ്ഥാനത്തെത്തുമ്പോൾ മാറ്റം; കാസ്റ്റിം​ഗ് കൗച്ചിനെക്കുറിച്ച് നടി

സിനിമാ രം​ഗത്തെ കാസ്റ്റിം​ഗ് കൗച്ചിനെക്കുറിച്ച് നിരവധി നടിമാർ തുറന്ന് സംസാരിച്ചിട്ടുണ്ട്. അവസരങ്ങൾക്ക് വേണ്ടി വിട്ടു വീഴ്ച ചെയ്യാൻ ആവശ്യപ്പെ‌ടുന്ന സാഹചര്യം അന്നും ഇന്നും സിനിമാ ലോകത്തുണ്ട്. ഇത്തരം ചതിക്കുഴികളിൽ വീണ് പോയ നടിമാരും ഏറെയാണ്. മീ ടൂ ആരോപണ സമയത്താണ് കാസ്റ്റിം​ഗ് കൗച്ച് സംഭവങ്ങൾ കുറേക്കൂടി മറ നീക്കി പുറത്ത് വന്നത്. മലയാള സിനിമാ രം​ഗത്തും തുറന്ന് പറച്ചിലുകളുണ്ടായി. ഡബ്ല്യുസിസി ഉൾപ്പെടെയുള്ള സംഘടനകളും വിഷയത്തിൽ സംസാരിച്ചു.

ഇപ്പോഴിതാ കാസ്റ്റിം​ഗ് കൗച്ചിനെക്കുറിച്ചും കരിയറിൽ തനിക്കുണ്ടായ അനുഭവങ്ങളെക്കുറിച്ചും നടി ലാവണ്യ പറഞ്ഞ വാക്കുകളാണിപ്പോൾ ശ്രദ്ധ നേടുന്നത്. തമിഴ് സീരിയലുകളിലൂടെ ശ്രദ്ധ നേടിയ നടിയാണ് ലാവണ്യ. രണ്ട് മൂന്ന് വട്ടം തനിക്ക് കാസ്റ്റിം​ഗ് കൗച്ച് പ്രവണതയെ അഭിമുഖീകരിക്കേണ്ടി വന്നിട്ടുണ്ടെന്നും ലാവണ്യ തുറന്ന് പറഞ്ഞു. എല്ലായിടത്തും ഇതുണ്ട്. തുടക്കക്കാരാകുമ്പോൾ മുതലെടുക്കാൻ നോക്കും.

ഒരു സ്ഥാനത്തെത്തിയാൽ അവർ നമ്മളെ സമീപിക്കുന്നത് മറ്റൊരു തരത്തിലായിരിക്കും. പക്ഷെ തുടക്കക്കാർ ആകുമ്പോൾ നമ്മളെ ഉപയോ​ഗിക്കാനാണ് അവർ ശ്രമിക്കുക. അത്തരത്തിലുള്ള കോളുകൾ വന്നിട്ടുണ്ട്. അത്തരം ആളുകളെ കണ്ടിട്ടുമുണ്ട്. എപ്പോൾ നോ പറയണോ അപ്പോൾ പറയുക. അവരെ വിഷമിപ്പിക്കേണ്ടതില്ല, ഞാനത്തരം ആളല്ലെന്ന് പറഞ്ഞാൽ പ്രശ്നം തീർന്നെന്നും ലാവണ്യ വ്യക്തമാക്കി.

സിനിമയിൽ അവസരം ലഭിക്കണമെങ്കിൽ ​ഗ്ലാമറസായി ഫോട്ടോഷൂട്ട് ചെയ്താൽ മതിയെന്ന ചിന്ത തെറ്റാണ്. ​ഗ്ലാമർ മാത്രം വെച്ച് നിങ്ങൾക്ക് പെർഫെക്ട് ആർട്ടിസ്റ്റാകാൻ പറ്റില്ല. സമയവും ശരിയാകണം. കരിയറിൽ തുടർച്ചയായി ശ്രമിക്കണം. എന്നാൽ മാത്രമേ മികച്ച അവസരങ്ങൾ ലഭിക്കൂയെന്നും ലാവണ്യ വ്യക്തമാക്കി. നടി വിചിത്ര അടുത്തിടെ തെന്നിന്ത്യൻ സിനിമാ രം​ഗത്തെ കാസ്റ്റിം​ഗ് കൗച്ചിനെക്കുറിച്ച് തുറന്ന് പറഞ്ഞിട്ടുണ്ട്.

ബി​ഗ് ബോസ് തമിഴ് ഷോയിലാണ് വിചിത്ര തന്റെ ദുരനുഭവങ്ങൾ തുറന്ന് പറഞ്ഞത്. 20 വർഷം മുമ്പ് സിനിമാ രം​ഗം വിടാനുള്ള കാരണം കാസ്റ്റിം​ഗ് കൗച്ച് ആണെന്ന് വിചിത്ര വ്യക്തമാക്കി. ഒരു തെലുങ്ക് സിനിമയിൽ അഭിനയിക്കാൻ പോയപ്പോൾ പ്രശസ്തനായ സൂപ്പർ താരം മോശമായി സംസാരിച്ചു. ഒരു പാർട്ടി നടക്കവെ ഈ ഹീറോ പേരും പോലും ചോദിക്കാതെ തന്നോട് റൂമിലേക്ക് വരാൻ പറഞ്ഞു.

എന്നാൽ താൻ തന്റെ റൂമിൽ പോയി ഉറങ്ങി. അടുത്ത ദിവസം മുതൽ ഷൂട്ടിം​ഗിനിടെ തനിക്കൊരുപാട് പ്രശ്നങ്ങൾ നേരിടേണ്ടി വന്നു. സെറ്റിലെ പുരുഷൻമാർ തന്റെ റൂമിൽ വന്ന് തട്ടിയെന്നും വിചിത്ര തുറന്ന് പറഞ്ഞു. തമിഴ് സിനിമാ രം​ഗത്ത് നിന്നും തനിക്കൊരിക്കലും ഇത്തരം മോശം അനുഭവങ്ങൾ ഉണ്ടായിട്ടില്ലെന്നും വിചിത്ര തുറന്ന് പറഞ്ഞു.