'ഞാൻ മ‍ഞ്ജുവിന്റെ അനിയനല്ല... അവൾ ചെറുപ്പം മുതൽ എനിക്ക് ഭീഷണിയും പാരയുമാണ്'; മധു വാര്യർ പറയുന്നു!

2004ൽ പുറത്തിറങ്ങിയ കാമ്പസ് ചിത്രം വാണ്ടടിലൂടെയാണ് മധു വാര്യർ സിനിമകളിൽ അഭിനയിച്ച് തുടങ്ങിയത്. ശേഷം പൊന്മുടിപ്പുഴയോരത്ത്, ഇരുവട്ടം മണവാട്ടി, ഭരത്ചന്ദ്രൻ ഐ.പി.എസ്, സേതുരാമയ്യർ സി.ബി.ഐ തുടങ്ങിയ സിനിമകളിലും മധു വാര്യർ അഭിനയിച്ചു. മഞ്ജുവിന് വേണ്ടി എഴുതിയ സിനിമയായിരുന്നില്ല ലളിതം സുന്ദരമെന്നും പിന്നീട് മഞ്ജു സിനിമയിലേക്ക് എത്തുകയായിരുന്നുവെന്നും മധു വാര്യർ‍ പറഞ്ഞിരുന്നു. സിനിമയുടെ പ്രമോഷന്റെ ഭാ​ഗമായി മധു വാര്യരും മഞ്ജുവും ഏഷ്യാനെറ്റിലെ സ്റ്റാർ സിങർ പരിപാടിയിൽ പങ്കെടുക്കാനെത്തിയിരുന്നു. പരിപാടിയിൽ പങ്കെടുത്ത് ചേട്ടനും അനുജത്തിയും കുട്ടിക്കാല അനുഭവങ്ങളും സിനിമാ വിശേഷങ്ങളും പ്രേക്ഷകരോട് പങ്കുവെച്ചു. കുട്ടിക്കാലത്ത് മഞ്ജു തനിക്ക് വലിയ പാരയായിരുന്നുവെന്ന് മധു വാര്യർ പറഞ്ഞത് സദസിൽ ചിരി പടർത്തി. മഞ്ജുവിന്റേയും മധുവിന്റേയും കൂടുതൽ വിശേഷങ്ങളിലേക്ക്.

'സുഖമുള്ളൊരു ഭാരമായിരുന്നു നിർമാതാവാകുക എന്നത്. സന്തോഷത്തോടെയാണ് ഞാൻ അതേറ്റെടുത്തത്. പല കാരണങ്ങളാലും എനിക്കേറെ സ്‌പെഷലാണ് ലളിതം സുന്ദരം. ചേട്ടന്റെ ആദ്യ സംവിധാന സംരംഭമാണ്. അതേപോലെ തന്നെ വർഷങ്ങൾക്ക് ശേഷമായാണ് ബിജു ചേട്ടനോടൊപ്പം അഭിനയിക്കുന്നത്. അതേ പോലെ തന്നെ ഹോട്ട്‌സ്റ്റാറിലൂടെയാണ് സിനിമ റിലീസ് ചെയ്യുന്നതും. ശരിക്കും ഇതെന്റെ കുടുംബചിത്രമാണ്' മഞ്ജു വാര്യർ പറയുന്നു. 'ടെൻഷൻ കാരണമാണ് എന്റെ താടി നരച്ചത്. പലരുടേയും ധാരണ ഞാൻ മഞ്ജുവിന്റെ അനിയനാണെന്നാണ്. ഞാൻ അത് തിരുത്താനും പോവാറില്ല. നമ്മുടെ വീട്ടിലൊക്കെ നടക്കുന്ന ചില കാര്യങ്ങളും രസകരമായ നിമിഷങ്ങളുമാണ് ലളിതം സുന്ദരം ചിത്രത്തിലുള്ളത്. കഥ ആദ്യമായിട്ട് പറഞ്ഞത് ബിജുവേട്ടനോടാണ്. അതിന് ശേഷമായാണ് മഞ്ജുവിനോട് പറഞ്ഞത്. ഫൈനൽ സ്‌ക്രിപ്റ്റ് വായിച്ചപ്പോഴാണ് ഞാനിത് നിർമ്മിച്ചോട്ടെയെന്ന് മഞ്ജു ചോദിച്ചത്' മധു വാര്യർ പറയുന്നു.

Recommended Video

നവ്യ സിനിമയിൽ തിരിച്ചെത്തിയതിനു കാരണം ഞാൻ അല്ല..മഞ്ജു തന്നെയെന്ന് നവ്യ | FilmiBeat Malayalam

'മഞ്ജുവിനെന്ന് കരുതി ഒരിക്കൽ മഞ്ജരിക്ക് മെസേജ് അയച്ചു. ഊണ് കഴിക്കാൻ ഞാനുമുണ്ടാവുമെന്നായിരുന്നു മെസേജ്. വന്നോളൂയെന്ന് എനിക്ക് മറുപടിയും കിട്ടി. മഞ്ജുവിന്റെ വീട്ടിൽ പോയപ്പോൾ എനിക്ക് ചോറില്ല. ഞാൻ മെസേജ് അയച്ചിരുന്നല്ലോയെന്ന് പറഞ്ഞപ്പോൾ എനിക്കൊന്നും കിട്ടിയില്ലെന്നായിരുന്നു പറഞ്ഞത്. ഞങ്ങൾക്കിടയിൽ ഏറ്റവും വലിയ പാര ആരാണെന്ന് ചോദിച്ചൽ ഉത്തരം മഞ്ജുവെന്നെ പറയാൻ‍ കഴിയൂ. കുട്ടിക്കാലത്ത് മഞ്ജു എനിക്ക് നല്ല പാരയായിരുന്നു. കൊന്ന് കളയുമെന്നൊക്കെ പറഞ്ഞ് ഭീഷണിപ്പെടുത്താറുണ്ടായിരുന്നു. എല്ലാവരും നിൽക്കുമ്പോൾ അത് പറയട്ടെ... ഇത് പറയട്ടെ എന്നൊക്കെ ചോദിക്കുമായിരുന്നു' മധു വാര്യർ കൂട്ടിച്ചേർത്തു.