'കൂട്ടുകാർ‌ എല്ലാവരും കല്യാണം കഴിച്ചു, അതുകൊണ്ട് വീട്ടുകാർ പറഞ്ഞപ്പോൾ ഞാനും കല്യാണം കഴിച്ചു'; നവ്യാ നായർ!

തമിഴിന് പുറമെ കന്നട സിനിമകളിലും നവ്യ അഭിനയിച്ചിട്ടുണ്ട്. നവ്യയുടെ ഏറ്റവും പുതിയ റിലീസ് ചിത്രം ഒരുത്തീ എന്ന ചിത്രമാണ്. വി.കെ പ്രകാശ് സംവിധാനം ചെയ്ത സിനിമ നവ്യ നായരുടെ തിരിച്ചുവരവിന് കാരണമായ സിനിമ കൂടിയായിരുന്നു. ബെൻസി പ്രൊഡക്ഷൻസിന്റെ ബാനറിൽ കെ.വി അബ്ദുൾ നാസർ നിർമിച്ച ഒരുത്തീ കുടുംബ പശ്ചാത്തലത്തിൽ അതിജീവനത്തിന്റെയും സ്നേഹബന്ധങ്ങളുടെയും കഥയാണ് പറഞ്ഞത്. വിനായകൻ, സൈജു കുറുപ്പ്, സന്തോഷ് കീഴാറ്റൂർ, അരുൺ നാരായൺ, മുകുന്ദൻ, ജയശങ്കർ, മനു രാജ്, മാളവിക മേനോൻ, ചാലി പാല എന്നിവരാണ്​ ചിത്രത്തിലെ മറ്റ്​ കഥാപാത്രങ്ങളെ അവതരിപ്പിച്ചത്. നീണ്ട ഇടവേളയ്ക്ക് ശേഷം തന്റെ ഒരു മലയാളം സിനിമ റിലീസ് ആയ സന്തോഷം പങ്കുവെച്ച് ഫിലിമി ബീറ്റ് മലയാളത്തിന് നവ്യ നൽകിയ അഭിമുഖം ശ്രദ്ധനേടുകയാണ്.

'എന്റെ തീവ്രമായ ആ​ഗ്രഹം കൊണ്ടായിരുന്നു ഒരുത്തീയിലെ രാധാമണി ഉണ്ടായത് എന്ന് തോന്നിയിട്ടുണ്ട്. മഞ്ജു ചേച്ചി എന്നും പ്രചോദനമായിരുന്നു. മഞ്ജു ചേച്ചിയാണ് പ്രചോദനം എന്ന് പറഞ്ഞ ശേഷം നിരവധി പേർ ചേച്ചിയോട് ഞാൻ‌ പറഞ്ഞതിനെ കുറിച്ച് ചോദിക്കുന്നുണ്ട്. മീരയും ഭാവനയുമെല്ലാം മലയാള സിനിമയിലേക്ക് വരുന്നത് വളരെ സന്തോഷം നൽകുന്നുണ്ട്. വിനായകൻ നല്ലൊരു നടനാണ്. ധ്യാനിന്റെ വൈറൽ അഭിമുഖം വന്നശേഷം ഞാൻ ഒരിക്കൽ ഞങ്ങൾ ഒരിക്കൽ കണ്ടിരുന്നു. കാർ ഷോറൂമിൽ വെച്ചാണ് കണ്ടത്. ആ അഭിമുഖം വന്നശേഷം അഭിപ്രായം തുറന്ന് പറയാൻ മക്കൾക്ക് ശ്രീനിചേട്ടനും ചേച്ചിയും നൽകിയിരിക്കുന്ന സ്വാതന്ത്ര്യം കണ്ടപ്പോൾ സന്തോഷം തോന്നി. ധ്യാനും ഞാനും ഇപ്പോൾ ചാറ്റ് ചെയ്യാറൊക്കെയുണ്ട്. യഥാർഥ ജീവിതത്തിൽ ബാലമണിയല്ലെങ്കിലും ​ഗുരുവായൂരപ്പന്റെ ഭക്തയാണ്. നല്ല ഭാര്യ എന്നതിനെ കുറിച്ച് ​ചോദിച്ചാൽ ചിലപ്പോൾ എനിക്ക് അഭിപ്രായം പറയാൻ ഉണ്ടാകില്ല.'

'നല്ല വ്യക്തി എന്താണ് എന്ന് ചോദിച്ചാൽ പറയാം. ചെയ്യുന്ന കാര്യങ്ങൾ സത്യസന്ധമായും നമ്മളോട് സത്യസന്ധമായിട്ടും പെരുമാറാൻ കഴിയുന്ന എല്ലാ വ്യക്തികളും നല്ല വ്യക്തികളാണെന്ന് പറയാൻ കഴിയും. അമ്മ എന്തുകൊണ്ട് നേരത്തെ അഭിനയിച്ചില്ലെന്നാണ് മകൻ സായ് ചോദിക്കാറുള്ളത്. അവനവന് കല്യാണ പ്രായമായി എന്ന് തോന്നുമ്പോഴാണ് വിവാഹം കഴിക്കേണ്ടത്. ഞാൻ അങ്ങനെ വിവാഹം ചെയ്ത ആളല്ല. എന്റെ കൂട്ടുകാരെല്ലാം വിവാഹം കഴിച്ച് പോയിരുന്നു. അപ്പോൾ അച്ഛനും അമ്മയും പറഞ്ഞു വിവാഹം കഴിക്കാൻ... ഞാൻ‌ കഴിച്ചു... അത്രമാത്രം. ഇപ്പോഴും ഞാൻ സിനിമകൾ നിരന്തരമായി കാണും. സന്തോഷേട്ടൻ മാറിയിട്ടില്ല. എന്റെ ​ദൃശ്യം കന്നട കാണാൻ അ​ദ്ദേഹം വന്നിട്ടുണ്ട്' നവ്യ പറയുന്നു.