'ഒരു മാസമാണ് ഞങ്ങൾ മാത്രം ആ റൂമിലുണ്ടായിരുന്നത്, ആരായാലും ആ സാഹചര്യത്തിൽ ഫഹദിനെ പ്രണയിച്ച് പോകും'; നസ്രിയ

മലയാള സിനിമയിലെ പ്രിയ താരങ്ങളും താരജോഡികളുമായിരുന്നു ഇവർ. ഇരുവരുടേയും പ്രണയ വിവാഹമായിരുന്നു. വിവാഹം അടുത്ത വേളയിൽ ഭാര്യാഭർത്താക്കന്മാരായി അഭിനയിച്ച ഇവരുടെ ചിത്രം ബാംഗ്ലൂർ ഡെയ്‌സ് അക്കാലത്തെ സൂപ്പർ ഹിറ്റുകളിൽ ഒന്നായിരുന്നു.

ബാംഗ്ലൂർ ഡെയ്‌സിൽ അഭിനയിച്ചുകൊണ്ടിരിക്കവെയാണ് ഇരുവരും പ്രണയത്തിലായത്. താനാണ് ഫഹദിനോട് വിവാഹം കഴിക്കാൻ സാധിക്കുമോയെന്ന് ചോദിച്ചതെന്ന് നസ്രിയ പറഞ്ഞിട്ടുണ്ട്.

വിവാഹത്തിന് ശേഷം ഇടവേളയെടുത്ത നസ്രിയ കൂടെ എന്ന സിനിമയിലൂടെയാണ് മടങ്ങിവരവ് നടത്തിയത്. അതിനുശേഷം അഭിനയിച്ച എല്ലാ ചിത്രങ്ങളിലും നസ്രിയ കയ്യടി നേടി. രണ്ടാം വരവിൽ അന്യഭാഷയിലും നസ്രിയ തന്റെ പാദമുദ്ര പതിപ്പിച്ചു.

അടുത്തിടെ മൊറോക്കോയില്‍ ഫഹദിനൊപ്പം അവധിയാഘോഷിക്കുന്ന ചിത്രം പങ്കുവെച്ച് നസ്രിയ എത്തിയിരുന്നു. ഈ വര്‍ഷം ഫഹദിനൊപ്പമുള്ള ആദ്യത്തെ പോസ്റ്റ് എന്ന ക്യാപ്ഷനോടെയായാണ് നസ്രിയ ചിത്രങ്ങള്‍ പങ്കുവെച്ചത്.

ഫോട്ടോ അതിവേ​ഗത്തിലാണ് വൈറലായത്. അതേസമയം താൻ എങ്ങനെയാണ് ഫഹദുമായി പ്രണയത്തിലായതെന്ന് വെളിപ്പെടുത്തിയ നസ്രിയയുടെ വീഡിയോയാണ് വീണ്ടും വൈറലാകുന്നത്.

വിക്രം പുറത്തിറങ്ങിയപ്പോഴും ഫഹദിന്റെ സിനിമകൾ കാണുന്നവരുമെല്ലാം അദ്ദേഹത്തിന്റെ കണ്ണുകൾ കൊണ്ടുള്ള അഭിനയത്തെ കുറിച്ച് വാചാലരായിരുന്നു. ഫഹദിന്റെ കണ്ണിൽ എന്തോ ഒരു മാജിക്കുണ്ടെന്നാണ് ആരാധകരെല്ലം ഒന്നടങ്കം പറയാറുള്ളത്.

അതെ കുറിച്ച് അവതാരകൻ ചോദിച്ചപ്പോഴാണ് കുസൃതി നിറഞ്ഞ മറുപടി നസ്രിയ പറഞ്ഞത്. 'ആ കണ്ണുകൾ കൊണ്ട് ഫഹദ് ഓഡിയൻസിനെ ട്രാപ്പിലാക്കുകയാണ്. അതുപോലെ തന്നെ ബാം​ഗ്ലൂർ ഡെയ്സ് സിനിമയിലെ ദിവ്യയും ദാസുമായി അഭിനയിക്കുന്ന സമയത്ത് ഞങ്ങൾ ഒരു മുറിക്കുള്ളിൽ ഒരു മാസമാണ് സ്റ്റക്കായത്.'

'അതുകൊണ്ട് തന്നെ പലപ്പോഴും അഞ്ജലി മേനോനോട് കളിയായി ഞാൻ പറയും ഒരു മാസം ഫഹദിനൊപ്പം ഒരു റൂമിൽ സ്റ്റക്കായാൽ ആരായാലും അദ്ദേഹവുമായി പ്രണയത്തിലായി പോകുമെന്ന്' നസ്രിയ പറഞ്ഞു.

ഫഹദിന്റേതായി ഏറ്റവും അവസാനം പുറത്തിറങ്ങിയ സിനിമ മലയൻ കു‍ഞ്ഞാണ്. പുഷ്പ 2 അടക്കം നിരവധി സിനിമകൾ ഇനി ഫഹദിന്റേതായി റിലീസിനെത്താനുണ്ട്. അതേസമയം തെലുങ്ക് സിനിമ അണ്ടേ സുന്ദരാനികിയാണ് നസ്രിയയുടെ അവസാനം റിലീസ് ചെയ്ത സിനിമ.

തെലുങ്ക് സിനിമയായിരുന്നുവെങ്കിലും ചിത്രം മലയാളം അടക്കം വിവിധ ഭാഷകളിൽ ഡബ്ബ് ചെയ്താണ് റിലീസിനെത്തിച്ചത്. അണ്ടേ സുന്ദരാനികി എന്ന ചിത്രത്തില്‍ നാനിയായിരുന്നു നായകൻ.

സമ്മിശ്ര പ്രതികരണമാണ് ചിത്രത്തിന് തിയറ്ററുകളില്‍ നിന്ന് ലഭിച്ചിരുന്നത്. വിവേക് അത്രേയ സംവിധാനം ചെയ്‍ത സിനിമ നവീൻ യെര്‍നേനിയും രവി ശങ്കറുമാണ് നിര്‍മിച്ചത്.