രണ്ട് ഭർത്താക്കന്മാർ‌ക്കൊപ്പം സെറ്റിൽ വെച്ച് സ്നേഹയുടെ ഒമ്പതാം മാസത്തിലെ ചടങ്ങ്, ആഘോഷമാക്കി സഹപ്രവർത്തകർ!

സിനിമ-സീരിയൽ രം​ഗത്തെ ഭൂരിഭാ​ഗം സെലിബ്രിറ്റികൾക്കും യുട്യൂബ് ചാനലുണ്ട്. ലോക്ക്ഡൗൺ, കൊവിഡ് കാലത്താണ് സെലിബ്രിറ്റികളിൽ ഏറെപ്പേരും തങ്ങളുടെ ആരാധകരോട് സംവദിക്കാനായി യുട്യൂബ് ചാനൽ ആരംഭിച്ചത്. അത്തരത്തിൽ യുട്യൂബ് ചാനൽ ആരംഭിച്ച് തന്റെ വിശേഷങ്ങളെല്ലാം ഇതേ യുട്യൂബ് ചാനൽ വഴി പ്രേക്ഷകരിലേക്ക് എത്തിക്കാറുള്ള നടിയാണ് സ്നേഹ ശ്രീകുമാർ.

മറിമായത്തിലെ മണ്ഡോദരിയായി പ്രേക്ഷകരെ കയ്യിലെടുത്ത സ്നേഹ ശ്രീകുമാറും ഭർത്താവും സീരിയൽ നടനുമായ ശ്രീകുമാറും പ്രേക്ഷകരുടെ ഇഷ്ട താരങ്ങളാണ്. സമൂഹ മാധ്യമത്തിലൂടെ ഇരുവരുടെയും വിശേഷങ്ങൾ പങ്കുവെയ്ക്കാറുണ്ട്.

സ്നേഹ ഗർഭിണിയാണെന്ന വിവരവും സോഷ്യൽ മീഡിയ വഴിയാണ് ഇരുവരും അറിയിച്ചത്. വൈകാതെ ഇരുവർക്കും ഇടയിലേക്ക് ഒരു കുഞ്ഞ് കൂടി എത്തും. ഒമ്പതാം മസാത്തിലൂടെയാണ് ഇപ്പോൾ സ്നേഹ കടന്നുപോകുന്നത്. അടുത്തിടെ ഭർത്താവിനും സുഹൃത്തുക്കൾക്കും ബന്ധുക്കൾക്കുമൊപ്പം ഏഴാം മാസത്തിലെ വളൈകാപ്പ് ചടങ്ങ് ആഘോഷമായി നടത്തിയിരുന്നു സ്നേഹ. 2019 ഡിസംബർ മാസത്തിലായിരുന്നു സ്നേഹയുടേയും ശ്രീകുമാ‌റിന്റേയും വിവാഹം.

തൃപ്പൂണിത്തുറ പൂർണത്രയീശ ക്ഷേത്രത്തിലായിരുന്നു ഇവരുടെ വിവാഹം. മറിമായം സീരിയലിലെ തന്നെ ലോലിതൻ എന്ന വേഷം ചെയ്താണ് ശ്രീകുമാറും ശ്രദ്ധേയനായത്. ചക്കപ്പഴത്തിലെ ഉത്തമനായാണ് ഇപ്പോൾ പ്രേക്ഷകർക്ക് ശ്രീകുമാറിനെ പരിചയം. ​ഗർഭിണിയായാൽ മുമ്പൊക്കെ അഭിനയത്തിൽ നിന്നും ഇടവേളയെടുത്ത് വിശ്രമിക്കുമായിരുന്നു താരങ്ങൾ.

എന്നാലിപ്പോൾ അതെല്ലാം മാറി. കോപ്ലിക്കേറ്റഡ് പ്ര​​ഗ്നൻസി അല്ലെങ്കിൽ ഒമ്പതാം മാസം വരെയും കഴിയുമ്പോലെ അഭിനയിക്കാനും പരസ്യങ്ങൾ ചെയ്യാനും നൃത്തം ചെയ്യാനുമെല്ലാം നടിമാർ ശ്രമിക്കാറുണ്ട്. ചന്ദ്ര ലക്ഷ്മൺ, ഷംന കാസിം ഇപ്പോഴിത സ്നേഹയും ​ഗർഭിണിയായിരിക്കെ ഒമ്പതാം മാസം വരെ തങ്ങളുടെ ജോലിയിൽ സജീവമായി പങ്കാളികളായിരുന്നവരാണ്.

വൈഫ് ഈസ് ബ്യൂട്ടിഫുൾ എന്ന സീ കേരളത്തിലെ സീരിയലിലാണ് സ്നേഹ ശ്രീകുമാർ ഇപ്പോൾ അഭിനയിച്ചുകൊണ്ടിരിക്കുന്നത്. വിനോദ് കോവൂരാണ് സീരിയലിൽ സ്നേഹയുടെ ഭർത്താവ്. കുമാരി എന്ന കഥാപാത്രത്തെയാണ് സ്നേഹ സീരിയലിൽ അവതരിപ്പിക്കുന്നത്.

സ്നേഹ ​ഗർഭിണിയായതോടെ സീരിയലിന്റെ കഥയിൽ മാറ്റം വരുത്തി സ്നേഹയുടെ കുമാരി എന്ന കഥാപാത്രവും ​ഗർഭിണിയാണെന്ന തരത്തിലേക്ക് കഥ മാറ്റിയിരുന്നു. ഇപ്പോഴിത സ്നേഹ ഒമ്പതാം മാസത്തിൽ എത്തിയതോടെ സീരിയലിലെ കുമാരി എന്ന കഥാപാത്രത്തിന്റേയും ഒമ്പതാം മാസ ചടങ്ങ് നടത്തി അത് ഷൂട്ട് ചെയ്ത് ടെലികാസ്റ്റ് ചെയ്യാൻ പോവുകയാണ് അണിയറപ്രവർത്തകർ.

വൈഫ് ഈസ് ബ്യൂട്ടിഫുൾ സെറ്റിൽ നടന്ന തന്റെ ഒമ്പതാം മാസ ചടങ്ങുകളുടെ വീഡിയോ സ്നേഹ തന്നെയാണ് യുട്യൂബ് ചാനൽ വഴി പങ്കുവെച്ചത്. ​ഗർഭകാലത്ത് താൻ സെറ്റിലെത്തുമ്പോൾ സീരിയലിലെ അഭിനേതാക്കളും അണിയറപ്രവർത്തകരും തന്നെ എത്രത്തോളം കെയർ ചെയ്തിരുന്നുവെന്നെല്ലാം പുതിയ വീഡിയോയിൽ സ്നേഹ വിവരിക്കുന്നുണ്ട്. തനിക്ക് ഷൂട്ടില്ലാത്ത സമയത്ത് വിശ്രമിക്കുമ്പോൾ സംവിധായകൻ വരെ തന്റെ അവസ്ഥ കണ്ട് വിശറി വെച്ച് വീശി തരുമായിരുന്നുവെന്നും പുതിയ വീഡിയോയിൽ സ്നേഹ പറഞ്ഞു.

ലൊക്കേഷനിൽ നടന്ന സ്നേഹ​യുടെ ഒമ്പതാം മാസ ചടങ്ങിൽ പങ്കെടുക്കാൻ ശ്രീകുമാറും ഷൂട്ടിനിടെ ​ഗ്യാപ്പ് എടുത്ത് എത്തിയിരുന്നു. റീൽ ഭർത്താവിനും റിയൽ ഭർത്താവിനും ഒപ്പമിരുന്ന് വിശേഷങ്ങൾ പങ്കുവെക്കുന്ന സ്നേ​ഹയേയും പുതിയ വീഡിയോയിൽ കാണാം.

പിസിഒഡി ഉള്ളതിനാൽ ​ഗർഭിണിയാണെന്ന് തിരിച്ചറിയാൻ വൈകിയെന്ന് സ്നേഹ തന്നെ മുമ്പൊരിക്കൽ പറഞ്ഞിരുന്നു. വൈകിയാണ് അറിഞ്ഞത്. അറിയുമ്പോൾ 11 ആഴ്ച ആയിട്ടുണ്ടായിരുന്നു. എനിക്ക് പിസി ഓഡിയും കാര്യങ്ങളും ഒകെ ഉണ്ടായിരുന്നതുകൊണ്ട് തന്നെ പിരീഡ്‌സ് അത്ര കറക്ട് ആയിരുന്നില്ല. പിരീഡ്‌സിന്റെ ഡേറ്റും മറ്റും വ്യത്യാസം ഉണ്ടായിരുന്നു.

സെറ്റിൽ വെച്ച് ഭക്ഷണം കഴിച്ച് നെഞ്ചെരിച്ചിൽ തോന്നിയപ്പോൾ ഡോക്ടറെ കണ്ടിരുന്നു. അങ്ങനെ ബ്ലഡ് ടെസ്റ്റ്‌ ചെയ്തപ്പോഴാണ് ഗർഭിണിയാണെന്ന് അറിയുന്നത് എന്നാണ് സ്നേഹ പറഞ്ഞത്.