'39 വയസിലാണ് അതേക്കുറിച്ച് ചിന്തിച്ചത്; എല്ലാവരും പറയുന്നത് കേട്ട് ജീവിച്ചു; ഇനി വയ്യെന്ന് തീരുമാനിച്ചു'

തമിഴ് സിനിമാ പ്രേക്ഷകർക്ക് സുപരിചിതയാണ് നടി സ്വർണമല്യ. നടി, അവതാരക, നർത്തകി തുടങ്ങി പല മേഖലകളിൽ സ്വർണമല്യ സാന്നിധ്യം അറിയിച്ചിട്ടുണ്ട്. ‌ടെലിവിഷൻ രം​ഗത്ത് ശ്രദ്ധിക്കപ്പെട്ട ശേഷം 2000 ൽ മണിരത്നത്തിന്റെ അലൈപായുതേ എന്ന ചിത്രത്തിലൂടെ സ്വർണമല്യ അഭിനയ രം​ഗത്തേക്ക് കടന്ന് വന്നു. മൊഴി, എങ്കൾ അണ്ണ തുടങ്ങിയ സിനിമകളിൽ ശ്രദ്ധേയ വേഷമാണ് സ്വർണമല്യക്ക് ലഭിച്ചത്. എന്നാൽ സിനിമാ രം​ഗത്ത് സ്വർണമല്യ സജീവമായില്ല. 2014 ന് ശേഷം ഒരു സിനിമയിലും ഇവർ അഭിനയിച്ചിട്ടില്ല.

ഇപ്പോഴിതാ താൻ നേരിട്ട ബോഡി ഷെയ്മിം​ഗിനെക്കുറിച്ച് തുറന്ന് സംസാരിക്കുകയാണ് സ്വർണമല്യ. ചെറുപ്പ കാലത്ത് ഇത് കാരണം വന്ന വന്ന അപകർഷകതയെക്കുറിച്ചും നടി സംസാരിച്ചു. ദിവസം രണ്ട് തവണ ജിമ്മിൽ പോയ സാഹചര്യങ്ങളുണ്ട്. ബന്ധുക്കളും സുഹൃത്തുക്കളുമെല്ലാം ഞാൻ വണ്ണമുണ്ണയാളാണ് എന്ന ചിന്ത എന്നിലുണ്ടാക്കി. മെലിഞ്ഞിരുന്നപ്പോൾ പോലും നീ തടിച്ചിട്ടാണെന്ന് പറഞ്ഞു. 39 വയസായപ്പോൾ ഒരു ദിവസം എണീറ്റ് ചിന്തിച്ചു.

39 വർഷമായി ഈ ലോകത്തിന് വേണ്ടി ജീവിച്ചു. അവരും ഇവരും പറയുന്നതെല്ലാം ശ്രദ്ധിച്ചു. എല്ലാം വിട്ടുകളയാൻ തീരുമാനിച്ചു. എങ്ങനെയായിരിക്കണമെന്ന് എന്റെ ശരീരം തീരുമാനിക്കട്ടെ. അതിന് ശേഷമാണ് ഹീലിം​ഗ് നടന്നത്. കാരണം അതുവരെയും എന്റെ ശരീരവുമായി ഞാൻ യുദ്ധത്തിലായിരുന്നു.

എന്റെ പഴയ ഫോട്ടോകൾ എടുത്ത് നോക്കുമ്പോൾ ഞാൻ വളരെ മെലിഞ്ഞിട്ടാണ്. എന്നാൽ അപ്പോൾ പോലും എനിക്ക് കുറ്റപ്പെടുത്തലുകളാണ് കേട്ടത്. ഇന്ന് ആ പ്രായത്തിലുള്ള ഒരു പെൺകുട്ടിയെ കണ്ടാൽ നല്ല ഭം​ഗിയുണ്ട് എന്ന് താൻ പറയുമെന്നും സ്വർണമല്യ വ്യക്തമാക്കി. നാടകത്തിനായി ഒരാഴ്ച കൊണ്ട് മൂന്ന് കിലോ കുറയ്ക്കാൻ ഒരു സ്ത്രീ എന്നോട് പറഞ്ഞു.

വണ്ണമുണ്ടെന്ന് പറയുമ്പോൾ വളരെ വേദന തോന്നും. നമ്മുടെ കഴിവുകളെക്കുറിച്ചുള്ള ചിന്ത മനസിൽ നിന്ന് പോകും. മൂന്ന് കിലോ ഒരാഴ്ച കൊണ്ട് എങ്ങനെയാണ് കുറയ്ക്കാൻ കഴിയുക. എന്തൊക്കെയോ ചെയ്ത് ഒന്നരക്കിലോ മാത്രമേ കുറയ്ക്കാൻ പറ്റിയുള്ളൂ. അത് പോലും അനാരോ​ഗ്യകരമാണെന്നും സ്വർണമല്യ ചൂണ്ടിക്കാട്ടി. ‌

ഇന്നാണെങ്കിൽ ആ സ്ത്രീയോട് ആന്റീ, നിങ്ങളാദ്യം വണ്ണം കുറയ്ക്ക് എന്ന് പറയും. ഇത്തരം ആളുകൾക്ക് മറുപടി നൽകുന്നത് സമയം പാഴാക്കലാണെന്നും സ്വർണമല്യ പറയുന്നു. അന്നൊന്നും ഇതേക്കുറിച്ച് അവബോധം ഇല്ലായിരുന്നു. ഇന്ന് എല്ലാവരും ബോഡി പോസിറ്റിവിറ്റിയെക്കുറിച്ച് സംസാരിക്കുന്നുണ്ടെന്നും സ്വർണമല്യ വ്യക്തമാക്കി. തന്റെ ജീവിതത്തിൽ വന്ന മാറ്റങ്ങളെക്കുറിച്ചും സ്വർണമല്യ സംസാരിച്ചു. പരാജയങ്ങളെ അഭിമുഖീകരിക്കാൻ ഇപ്പോൾ പറ്റുന്നു.

ഇരുപതോ മുപ്പതോ വയസിലോ അങ്ങനെയായിരുന്നില്ല. ഇപ്പോൾ ഒരു കാര്യം ചെയ്യുമ്പോഴേ, ഇത് പരാജയപ്പെട്ടാൽ എന്താകുമെന്ന് മനസിൽ സങ്കൽപ്പിച്ച് നോക്കും. പ്ലാൻ ബിയെക്കുറിച്ച് ചിന്തിക്കുമെന്നും സ്വർണമല്യ പറഞ്ഞു.
സ്റ്റേ ഫിറ്റ് വിത്ത് രമ്യ എന്ന യൂട്യൂബ് ചാനലിലാണ് സ്വർണമല്യ മനസ് തുറന്നത്.

അടുത്തിടെ നൽകിയ മറ്റൊരു അഭിമുഖത്തിൽ തന്റെ ആദ്യ വിവാഹബന്ധം വേർപിരിഞ്ഞതിനെക്കുറിച്ച് സ്വർണമല്യ സംസാരിച്ചിരുന്നു. വിവാഹം ചെയ്യുമ്പോൾ എനിക്ക് പ്രായം 21 ഉം. അദ്ദേഹത്തിന് 25 ഉം. അത് പരാജയപ്പെടേണ്ട ബന്ധമായിരുന്നു. രണ്ട് പേരുടെയും ഭാ​ഗത്ത് പ്രശ്നങ്ങളുണ്ടായിട്ടുണ്ട്. അമേരിക്കൻ ജീവിതവുമായി പൊരുത്തപ്പെടാൻ തനിക്ക് കഴിയില്ലായിരുന്നെന്നും സ്വർണമല്യ വ്യക്തമാക്കി.