പരസ്യത്തിൽ അഭിനയിക്കാൻ താല്‍പര്യമില്ലെന്ന് മുരളി, വിടാതെ ഞാനും, ആ പഴയ പരസ്യത്തെ കുറിച്ച് മനോജ് പിള്ള

ലിയോ ബേണറ്റ് പരസ്യ ഏജന്‍സിയുടെ നാഷ്ണല്‍ ക്രിയേറ്റീവ് ഡയറക്ടറായ തോമസ് സേവ്യറാണ് എനിക്ക് ഈ സ്‌ക്രിപ്റ്റ് തന്നത്. അതിശക്തമായ ഒരു കഥാപാത്രമാണ് ഇതിലേത്. അത് ചെയ്യണമെങ്കില്‍ അസാധ്യമായി അഭിനയിക്കുന്ന ഒരു നടന്‍ തന്നെ വേണം, അല്ലാതെ പ്ലാസ്റ്റിക് മോഡലുകളെ കിട്ടിയിട്ട് കാര്യമില്ല. ജീവിതത്തിനെക്കുറിച്ച് ഒരു ഉള്‍ക്കാഴ്ചയുള്ള, ധാരാളം ജീവിതാനുഭവങ്ങളുള്ള ഒരാളായിരിക്കണം നായകനാകേണ്ടതെന്ന് എനിക്ക് നിര്‍ബന്ധം ഉണ്ടായിരുന്നു. ആ നടന് വേണ്ടിയുള്ള തിരച്ചിലിലായിരുന്നു പിന്നീട്.

ആദ്യം പൂനെ തിയേറ്റര്‍ അസോസിയേഷനുമായി ബന്ധപ്പെട്ടു, പിന്നീട് കൊല്‍ക്കത്തയില്‍ അന്വേഷിച്ചു. എന്നാല്‍ ആ കഥാപാത്രത്തിന് ചേര്‍ന്ന ഒരു ആര്‍ട്ടിസ്റ്റിനെ ഞങ്ങള്‍ക്ക് എവിടെ നിന്നും ലഭിച്ചില്ല. അങ്ങനെ ഇരിക്കുമ്പോഴാണ് ഓഫീസിലെ സജിത് വിയുടെ മനസ്സില്‍ മുരളിയുടെ പേര് ഉദിക്കുന്നത്. അദ്ദേഹമായാല്‍ കൊള്ളാമെന്ന് ഞങ്ങക്കും തോന്നി. തോന്നി. പക്ഷേ അദ്ദേഹത്തിന് ആ സമയത്ത് ദേശീയ പുരസ്‌കാരം ലഭിച്ചിരിക്കുന്ന സമയമാണ്. അതുകൊണ്ടു തന്നെ പരസ്യചിത്രത്തില്‍ അദ്ദേഹം അഭിനയിക്കുമെന്ന കാര്യത്തില്‍ യാതൊരു ഉറപ്പുമില്ലായിരുന്നു. മുരളി തന്നെ മതിയെന്ന് ഞാന്‍ മനസ്സില്‍ ഉറപ്പിച്ചു.