ശാലിനിയുടേയും അജിത്തിന്‍റേയും സന്തോഷനിമിഷം! കുട്ടിത്തലയുടെ പിറന്നാള്‍ ആഘോഷമാക്കി ആരാധകരും!

അജിത്തും ശാലിനിയും

തമിഴകത്തിന്റെ സ്വന്തം താരദമ്പതികളാണ് അജിത്തും ശാലിനിയും. സ്‌ക്രീനിലെ മികച്ച കെമിസ്ട്രി ജീവിതത്തിലും ആവര്‍ത്തിച്ച് മുന്നേറുകയാണ് ഇരുവരും. പങ്കെടുക്കുന്ന പരിപാടികളിലെല്ലാം താരമായി മാറാറുണ്ട് ഇരുവരും. സിനിമയില്‍ അഭിനയിക്കുന്നില്ലെങ്കിലും ഇന്നും ആരാധകര്‍ക്ക് പ്രത്യേകമായൊരു ഇഷ്ടമുണ്ട് ശാലിനിയോട്. വാലിമൈയുടെ ചിത്രീകരണത്തിനിടയില്‍ അജിത്തിന് പരിക്കേറ്റെന്നറിഞ്ഞതോടെ ആരാധകരും പരിഭ്രാന്തിയിലായിരുന്നു. ഗെറ്റ് വെല്‍ സൂണ്‍ തല ഹാഷ് ടാഗുകള്‍ സോഷ്യല്‍ മീഡിയയിലൂടെ പ്രചരിച്ചിരുന്നു. പൂര്‍വ്വാധികം ശക്തിയോടെ താരത്തിനെ കണ്ടപ്പോഴാണ് ആരാധകര്‍ക്ക് ആശ്വാസമായത്.

കുട്ടിത്തലയുടെ പിറന്നാള്‍

അനൗഷ്‌കയുടെ കുഞ്ഞനിയനും ആരാധകരുടെ കുട്ടിത്തലയുമായ അദ്വൈകിന്റെ പിറന്നാളായിരുന്നു കഴിഞ്ഞ ദിവസം. കുടുംബാംഗങ്ങളും സുഹൃത്തുക്കളുമൊക്കെയായി ഗംഭീരമായാണ് ഇവര്‍ ഇതാഘോഷിച്ചത്. വ്യത്യസ്തമായ രീതിയിലുള്ള ആഘോഷമായിരുന്നു അജിത്ത് നടത്തിയത്. നാളുകള്‍ക്ക് ശേഷം അജിത്തിനെ കാണാനായതിന്റെ സന്തോഷം പങ്കുവെച്ച് ആരാധകരും എത്തിയിരുന്നു. സോഷ്യല്‍ മീഡിയയിലൂടെ ഇതിനകം തന്നെ പിറന്നാളാഘോഷത്തിന്റെ വീഡിയോ വൈറലായി മാറിക്കഴിഞ്ഞ്ിട്ടുണ്ട്.

കുടുംബത്തിനുള്ള പ്രാധാന്യം

തന്റെ തിരക്കുകളൊന്നും കുടുംബത്തിനെ ബാധിക്കരുതെന്ന കാര്യത്തില്‍ പ്രത്യേകം ശ്രദ്ധിക്കാറുണ്ട് അജിത്ത്. വിവാഹത്തിന് മുന്‍പ് തന്നെ ശാലിനിക്ക് ഇതുമായി ബന്ധപ്പെട്ട് വാക്ക് നല്‍കിയിരുന്നു. ഒരേ സമയം ഒന്നിലധികം സിനിമകളില്‍ അഭിനയിക്കില്ല, മാസത്തില്‍ 15 ദിവസം സിനിമയ്ക്കായും 15 ദിവസം കുടുംബത്തിനൊപ്പമായും ചെലഴിക്കുമെന്നായിരുന്നു അന്ന് അജിത്ത് ശാലിനിയോട് പറഞ്ഞത്. 20 വര്‍ഷത്തിനിപ്പുറവും അദ്ദേഹം ആ വാക്ക് പാലിക്കുന്നുണ്ടെന്ന കണ്ടെത്തലുകളുമായി അടുത്തിടെ ആരാധകര്‍ എത്തിയിരുന്നു.

കുട്ടിത്തലയ്ക്ക് ആശംസ

കുട്ടിത്തലയുടെ പിറന്നാളിന് ആശംസ നേര്‍ന്ന് ആരാധകരും എത്തിയിരുന്നു. മക്കള്‍ക്കൊപ്പമുള്ള ചിത്രങ്ങള്‍ പങ്കുവെച്ച് ഇടയ്ക്ക് ശാലിനി എത്താറുണ്ട്. സ്‌കൂളില്‍ മക്കളുടെ പരിപാടി കാണാനെത്തിയ അജിത്തിന്റെ ചിത്രങ്ങള്‍ മുന്‍പ് വൈറലായിരുന്നു. നിരവധി പേരാണ് അദ്വികിന് ആശംസ അറിയിച്ച് എത്തിയിട്ടുള്ളത്. ശാലിനിയുടെ ഫാന്‍സ് പേജുകളിലൂടെയും ചിത്രങ്ങളും വീഡിയോയും പുറത്തുവന്നിരുന്നു.

ശ്യാമിലിക്കും റിച്ചാര്‍ഡിനുമൊപ്പം

ശാലിനി മാത്രമല്ല സഹോദരനും സഹോദരിയുമൊക്കെ പ്രേക്ഷകര്‍ക്ക് സുപരിചിതരാണ്. റിച്ചാര്‍ഡ് നായകനായെത്തിയ തമിഴ് സിനിമ കാണാനായി ശാലിനിയും ശ്യാമിലിയും എത്തിയിരുന്നു. ചെന്നൈയില്‍ വെച്ചായിരുന്നു ശാലിനി ദ്രൗപദി കണ്ടത്. റിച്ചാര്‍ഡും ഇവര്‍ക്കൊപ്പമുണ്ടായിരുന്നു. ഇതിനിടയില്‍ അജിത്തിന് എങ്ങനെയുണ്ടെന്ന് ചോദിച്ച് ആരാധകരെത്തിയിരുന്നു. താരത്തിന്റെ പുഞ്ചിരി കണ്ടതോടെയായിരുന്നു ആരാധകര്‍ക്ക് സന്തോഷമായത്.