അല്ലു അർജുൻ സൂപ്പർസ്റ്റാറായി, പക്ഷെ ആര്യയിലെ നായിക ഇന്നെവിടെ; അനു മെഹ്തയ്ക്ക് സംഭവിച്ചത്

അല്ലു അർജുനെ ഇന്നത്തെ താരമാക്കി മാറ്റിയതിൽ സുപ്രധാന പങ്കുവഹിച്ച സിനിമയാണ് ആര്യ. സുകുമാർ സംവിധാനം ചെയ്ത് ഈ തെലുങ്ക് ചിത്രം 2004 ലാണ് റിലീസ് ചെയ്തത്. ഇന്നും ഈ സിനിമയ്ക്ക് ആരാധകരുണ്ട്. ടോളിവുഡിലെ പോലെ മലയാളത്തിലും ആര്യ വൻ ഹിറ്റായിരുന്നു. മാെഴി മാറ്റിയെത്തിയ ഈ സിനിമയെ മലയാളി പ്രേക്ഷകർ വൻ വിജയമാക്കി. അല്ലു അർജുൻ മലയാളികളുടെ മനസിൽ ആദ്യം ഇടം നേ‌ടുന്നതും ആര്യയിലൂടെയാണ്. പിന്നീട് അല്ലുവിന്റെ സിനിമകൾ തുടരെ കേരളത്തിൽ തരം​ഗമായി.

നായകനായ അല്ലുവിനൊപ്പം തുല്യ പ്രാധാന്യം സിനിമയിൽ നായികയായെത്തിയ അനു മെഹ്തയ്ക്കും ലഭിച്ചിട്ടുണ്ട്. ​ഗീത എന്ന കഥാപാത്രത്തെ നടി അവിസ്മരണീയമാക്കി. അല്ലു അർജനും അനു മെഹ്തയും ഒരുമിച്ചുള്ള രം​​ഗങ്ങളും ​ഗാനങ്ങളും വലിയ തോതിൽ ശ്രദ്ധിക്കപ്പെട്ടു. ഈ ഒരു സിനിമയ്ക്ക് ശേഷം അനു മെഹ്തയെ സിനിമാ പ്രേക്ഷകർ അധികം കണ്ടിട്ടില്ല. അനു മെഹ്തയെന്ന പേര് പോലും പലർക്കും പരിചിതമല്ല. വൻ ഹിറ്റായ ആര്യയിൽ നായികായായിട്ടും അനു മെഹ്തയുടെ കരിയറിൽ പിന്നീട് എന്ത് സംഭവിച്ചു എന്ന ചോദ്യം ആരാധകർക്കുണ്ട്.

തെലുങ്കിലും കന്നഡയിലും ഒഡിയ ഭാഷയിലുമാണ് അനു മെഹ്ത അഭിനയിച്ചിട്ടുള്ളത്. നടിയു‌ടെ ആദ്യ സിനിമയാണ് ആര്യ. എന്നാൽ ഒരു ഭാഷയിലും നടി സജീവമായിരുന്നില്ല. നാല് വർഷം മാത്രനേ അനു മെഹ്ത സിനിമാ രം​ഗത്ത് തുടർന്നുള്ളൂ. 2004 മുതൽ 2008 വരെയുടെ സിനിമാ ജീവിതത്തിൽ ആകെ ചെയ്തത് ആറ് സിനിമകൾ മാത്രം. ഇതിനിടെ അഭിമുഖങ്ങളിലോ പൊതുവേദികളിലോ നടിയെ അധികം കണ്ടിട്ടുമില്ല.

ആര്യ ഹിറ്റായപ്പോൾ അനു മെഹ്ത സിനിമാ രം​ഗത്ത് തരം​ഗമായി മാറുമെന്ന് പലരും കരുതി. പക്ഷെ അതുണ്ടായില്ല. 2008 ൽ പുറത്തിറങ്ങിയ ഹൊങ്കനസു എന്ന കന്നഡ ചിത്രമാണ് ആണ് അവസാന സിനിമ. ഇതിന് ശേഷം ലൈം ലൈറ്റിൽ നിന്നും അനു പൂർണമായും മാറി നിന്നു. നടിയുടെ വ്യക്തിപരമായ വിവരങ്ങളൊന്നും ഇന്ന് ലഭ്യമല്ല. സോഷ്യൽ മീഡിയ അക്കൗണ്ടുമില്ല.

അനു മെഹ്തയെ പോലെ സിനിമാ രം​ഗത്ത് നിന്നും പൂർണമായും മാറി നിൽക്കുന്ന മറ്റ് നടിമാരുമുണ്ട്. വെള്ളിനക്ഷത്രം എന്ന സിനിമയിലൂടെ വൻ ജനപ്രീതി നേടിയ നടി മീനാക്ഷിയും ഏറെക്കാലം ലൈം ലൈറ്റിൽ നിന്ന് മാറി നിൽക്കുകയായിരുന്നു. എന്നാൽ അടുത്തിടെ ഒരു അഭിമുഖം നൽകാൻ മീനാക്ഷി തയ്യാറായി. ഈ അഭിമുഖം വൈറലാവുകയും ചെയ്തു.

ആര്യ 20 വർഷം പൂർത്തിയാക്കിയിരിക്കെ സോഷ്യൽ മീഡിയയിൽ അല്ലു അർജുൻ ഓർമ പങ്കുവെച്ചിട്ടുണ്ട്. സംവിധായകൻ സുകുമാറിന്റെ ആദ്യ സിനിമയാണ് ആര്യ. തെലുങ്കിൽ ഹിറ്റായതോടെ ഈ ചിത്രം തമിഴിലേക്ക് കുട്ടി എന്ന പേരിൽ റീമേക്ക് ചെയ്തിട്ടുണ്ട്. ധനുഷും ശ്രിയ ശരണുമാണ് തമിഴ് പതിപ്പിൽ നായകനും നായികയുമായത്. 2009 ൽ തെലുങ്കിൽ ആര്യയുടെ രണ്ടാം ഭാ​ഗവും പുറത്തിറങ്ങി. അല്ലു അർജുൻ, കാജൽ അ​ഗർവാൾ എന്നിവരാണ് രണ്ടാം ഭാ​ഗത്തിൽ പ്രധാന കഥാപാത്രം ചെയ്തത്.