എല്ലാവരും ആഗ്രഹം പറയുന്നത് പൊറോട്ടയും ബീഫും, ഒരു വ്യത്യസ്തമായ ലോക്ക് ഡൗൺ അനുഭവം

ബാഗും തൂക്കി വീടിന് പുറത്തേയ്ക്ക് ഇറങ്ങുന്നതോടെ ആദ്യത്തേത് സ്റ്റാർട്ട് ആകും. പിന്നിങ്ങനെ ഒഴുകി നടപ്പായിരിക്കും. കാടും മേടും പുഴകളും കൺകുളിർക്കേ കണ്ട് അങ്ങനെ അങ്ങനെ... രണ്ടാമത്തേത് ആദ്യത്തേതിനൊപ്പം തന്നെ പ്രിയങ്കരമാണ്. എന്റെ മുറി.. വീട്ടിലെ മുറ്റം അതെല്ലാം എന്റെ പ്രിയപ്പെട്ട സ്പോർട്ടുകളാണ്. പുറത്തുള്ള കറക്കം കഴിഞ്ഞാൽ എന്റെ ഇഷ്ട കേന്ദ്രങ്ങൾ. അതു കൊണ്ട് തന്നെ ഈ മൂഡ് സ്വിങ്സിൽ ഞാൻ ഹാപ്പിയാണെന്ന് അനുമോൾ പറഞ്ഞു.

മിസോറാം യാത്ര കഴിഞ്ഞ് കഴിഞ്ഞ മാര്ച്ച് 21 ആയിരുന്നു പട്ടാമ്പിയിലെ വീട്ടിൽ എത്തിയത്. സ്വാഭാവികമായും ഞാന്‌ ലോക്ക് ഡൗൺ ആയി. വീട്ടിനുള്ളിലെ പതിനാല് ദിവസം എനിയ്ക്ക് ഒരിക്കലും മറക്കാൻ പറ്റാത്ത ഏടായിരുന്നു. വായിച്ച പുസ്തകങ്ങളെ കുറിച്ചും കണ്ടു പരിചയിച്ച അനുഭവങ്ങള കുറിച്ചും വീഡിയോ രൂപത്തിൽ പങ്കുവെയ്ക്കൽ ആയിരുന്നു പ്രധാന പണി. നിസ്സാര ജോലിയാണെന്ന് വിചാരിക്കരുതേ. വീഡിയോ ഷൂട്ട് ചെയ്ത അപ്ലോഡ് ചെയ്യുന്നത് ആറേഴ് മണിക്കൂർ നീളുന്ന പണിയാണ്. ഈ ക്വാറന്റൈൻ ദിനത്തിൽ അഞ്ചിലേറെ വീഡിയോ അപ്ലോഡ് ചെയ്തിരുന്നു. ക്വാറന്റൈൻ ദിവസങ്ങൾ ഹാപ്പിയാകാൻ ഇതൊക്കെ തന്നെ പേരേ. പിന്നെ ചെറിയ പാചക പരീക്ഷണങ്ങളും.

ലോകം വെട്ടിപ്പിടിക്കാൻ നടന്ന മനുഷ്യന് തിരിച്ചറിവ് നൽകിയ നളുകൾ കൂടിയാണിത്. സുഖലോലുപാതയിൽ ജീവിച്ച് എല്ലാം തങ്ങളുടേതാക്കാൻ ഓടി നടന്ന എല്ല മനുഷ്യരുടെ സ്വപ്നങ്ങളും ലക്ഷ്യങ്ങളും ചുരുങ്ങിപ്പോയപോലെ. ഇപ്പോൾ ആരോടെങ്കിലും എന്താണ് ആഗ്രഹമെന്ന് ചോദിച്ചാൽ ആദ്യം പറയുന്നത് പൊറോട്ടയും ബീഫും വേണമെന്നായിരിക്കും. അല്ലെങ്കിൽ ബൈക്ക് റെയ്ഡ്. മനുഷ്യൻ എത്രത്തോളം ചുരുങ്ങിപ്പോയെന്ന് ബോധ്യപ്പെട‌ുത്താൻ ഒരു ലോക്ക് ഡൗൺ വേണ്ടി വന്നു. ഞാൻ ഈ ചോദിച്ച ചോദ്യം കുറേ പേർ എന്നോടും ചോദിച്ചിരുന്നു.

ഈ ലോക്ക് ഡൗൺ കഴിഞ്ഞിട്ട് വേണം മുടങ്ങിപ്പോയ യാത്രകളെ പൊടിത്തട്ടി എടുക്കാൻ. അതിനു മുന്നെ കൊച്ചിയിൽ ഒന്ന് പോകണം. എൻരെ പ്രിയപ്പെട്ടവരെ ഒന്ന് കാണണം. കൂടാതെ പുതിയ രണ്ട് പ്രോജക്ടുകൾ കമ്മിറ്റ് ചെയ്തിട്ടുള്ളതാണ്. കൊവിഡ് കാലമായതുകൊണ്ട് തന്നെ അതൊക്കെ നീണ്ടു പോകുമോ എന്ന് അറിയില്ല