മമ്മൂട്ടിയെ വിളിച്ചാലോയെന്ന് മോഹന്‍ലാല്‍, പക്ഷേ പേടിയുണ്ട്! ആ സംഭവം വെളിപ്പെടുത്തി ഡെന്നീസ് ജോസഫ്!

നിറക്കൂട്ടുകളില്ലാതെ

നിറക്കൂട്ടുകളില്ലാതെ എന്ന ആത്മകഥയിലൂടെയാണ് ഡെന്നീസ് ജോസഫ് സിനിമയുമായി ബന്ധപ്പെട്ട രസകരമായ അനുഭവങ്ങള്‍ പങ്കുവെച്ചിട്ടുള്ളത്. തലതിരിഞ്ഞ തരത്തിലായിരുന്നു തിരക്കഥയൊരുക്കിയത്. മമ്മൂട്ടി-ഡെന്നീസ് ജോസഫ് കൂട്ടുകെട്ടിലെ ചിത്രമായ അഥര്‍വ്വത്തിന്‍റെ റീറെക്കോര്‍ഡിങ് നടക്കുന്ന സമയത്തായിരുന്നു മദ്രാസ് മെയിലും ചെയ്തത്. സമ്മര്‍ദ്ദങ്ങളുടെ നടുവിലിരുന്നാണ് താന്‍ തിരക്കഥ പൂര്‍ത്തിയാക്കിയതെന്ന് അദ്ദേഹം കുറിച്ചിട്ടുണ്ട്.

മമ്മൂട്ടിയുടെ വരവ്

മമ്മൂട്ടി അവസാനനിമിഷമാണ് ചിത്രത്തിലേക്ക് എത്തിയത്. സിനിമയുടെ ചിത്രീകരണം തുടങ്ങുന്നതിന് മുന്‍പ് മോഹന്‍ലാല്‍ ഡെന്നീസ് ജോസഫിന് അരികിലേക്ക് എത്തിയിരുന്നു. സിനിമയിലെ പ്രത്യേകതയുള്ള കഥാപാത്രത്തെക്കുറിച്ച് ആ സമയത്ത് ചര്‍ച്ചയുണ്ടായിരുന്നു. മോഹൻലാലും കൂട്ടുകാരും കോട്ടയത്തു നിന്നു ട്രെയിനിൽ ചെന്നൈയിലേക്ക് ഒരു ക്രിക്കറ്റ് മത്സരം കാണാൻ പോവുകയാണ്. അതിനിടെ യാത്രക്കാരനായി ഒരു സെലിബ്രിറ്റി ഫിലിം ആക്ടർ ട്രെയിനിൽ കയറുന്നു. യഥാർഥത്തിൽ ജഗതി ശ്രീകുമാറിനെപ്പോലെ ഒരാളെയാണ് ആ റോളിൽ ഉദ്ദേശിച്ചിരുന്നത്. അങ്ങനെ ജഗതി കയറുന്നു. അവർ വെള്ളമടിച്ചും മറ്റുമായി അദ്ദേഹത്തെ ബോറടിപ്പിക്കുന്നു.

മോഹന്‍ലാലിന്‍റെ അഭിപ്രായം

പക്ഷേ രണ്ടാം പകുതിയിൽ മോഹൻലാൽ അടക്കമുള്ള യുവാക്കൾ ഒരു കൊലപാതകക്കേസിൽ പെട്ടുപോകുമായിരുന്നു. അന്നേരം ജഗതിയുടെ കഥാപാത്രം അവരെ രക്ഷിക്കുന്നു എന്നാണ് ഉദ്ദേശിച്ചിരുന്നത്. വളരെ പ്രധാനപ്പെട്ട ഒരു ടിടിആർ റോളും ചിത്രത്തിലുണ്ട്. പാലക്കാട് വരെ ഒരു ടിടിആറും പാലക്കാട് കഴിഞ്ഞാൽ മറ്റൊരു തമിഴ് ടിടിആറും. രണ്ടു പേരുടെയും റോൾ വളരെ പ്രധാനം. മോഹൻലാൽ ഒരു അഭിപ്രായം പറഞ്ഞു- ‘നമുക്ക് ജഗതിച്ചേട്ടനെ ഒരു ടിടിആറിന്റെ റോളിലേക്ക് മാറ്റിയിട്ട് ട്രെയിനിൽ കയറുന്ന സെലിബ്രിറ്റി മമ്മൂക്കയെ ആക്കിയാലോ.

ജോഷി പറയട്ടെ

ആ സമയത്ത് മമ്മൂട്ടിയും മോഹൻലാലും ഒന്നിച്ച് ഒരു പടത്തിലും അഭിനയിക്കുന്നില്ല. അതിനു തൊട്ടുമുൻപ് അഭിനയിച്ചതെല്ലാം തുല്യപ്രാധാന്യമുള്ള റോളുകളും. പത്മരാജന്റെ കരിമ്പിന്‍ പൂവിനക്കരെ, കരിയിലക്കാറ്റു പോലെ തുടങ്ങിയ ചിത്രങ്ങളിൽ. നമ്പർ 20 മദ്രാസ് മെയിലാകട്ടെ മോഹൻലാൽ ഹീറോ ആയ ചിത്രം. അതിൽ ചെറിയ റോൾ ആണെങ്കിലും മമ്മൂട്ടിയെപ്പോലെ ഒരാൾവന്നാൽ സിനിമക്ക് എന്തുകൊണ്ടും ഗുണം ചെയ്യും. പക്ഷേ മോഹൻലാൽ അപ്പോൾത്തന്നെ പറഞ്ഞു.

മമ്മൂട്ടി സമ്മതിച്ചു

അയ്യോ, ഞാനില്ല. അങ്ങേരെന്നെ ചീത്ത വിളിക്കും. നമുക്കിത് ജോഷി സാറിനെക്കൊണ്ട് പറയിക്കാംഅങ്ങനെ ഞങ്ങൾ ജോഷിയോടു പറഞ്ഞു, അദ്ദേഹത്തിനും സംഗതി ഇഷ്ടമായി. പക്ഷേ മമ്മൂട്ടിയോടു പറയാൻ മടി. മോഹൻലാൽ നായകനാകുന്ന ഒരു ചിത്രത്തിൽ ചെറിയ വേഷത്തില്‍ അഭിനയിക്കാൻ മമ്മൂട്ടി യഥാർഥത്തിൽ ആഗ്രഹിക്കുന്നില്ലെങ്കിലോ? ജോഷിയാണു പറയുന്നതെങ്കിൽ അദ്ദേഹത്തോടുള്ള കടപ്പാടും ബന്ധവുംവച്ച് മമ്മൂട്ടിക്ക് പറ്റില്ലെന്നു പറയാൻ കഴിയാതെ വരും. മടിച്ചാണ് ഇതേക്കുറിച്ച് പറഞ്ഞതെങ്കിലും കേട്ടയുടനെ സമ്മതിക്കുകയായിരുന്നു മമ്മൂട്ടി.