ഹോം

വിശേഷങ്ങൾ

മലയാളികള്‍ എന്നെന്നും ഓര്‍ത്തിരിക്കുന്ന സിനിമകളിലൊന്നാണ് അഥര്‍വ്വം. മമ്മൂട്ടി, ഗണേഷ് കുമാര്‍, പാര്‍വതി, സില്‍ക്ക് സ്മിത തുടങ്ങി വന്‍താരനിരയാണ് ചിത്രത്തില്‍ അണിനിരന്നത്. അനന്തപത്മനാഭന്‍ എന്ന കഥാപാത്രത്തെയാണ് മമ്മൂട്ടി അവതരിപ്പിച്ചത്. പൊന്നി എന്ന കഥാപാത്രമായാണ് സില്‍ക്ക് സ്മിത എത്തിയത്. ഇളയരാജയായിരുന്നു സിനിമയ്ക്ക് പാട്ടൊരുക്കിയത്. സിനിമയിലെ ഗാനങ്ങള്‍ ഇന്നും പ്രേക്ഷകര്‍ ഓര്‍ത്തിരിക്കുന്നുണ്ട്. പൂവായി വിരിഞ്ഞു, പുഴയോരത്തെ തുടങ്ങിയ ഗാനങ്ങള്‍ ഇന്നും ആസ്വാദക മനസ്സില്‍ നിറഞ്ഞുനില്‍ക്കുന്നുണ്ട്. ഡെന്നീസ് ജോസഫാണ് ഈ ചിത്രം സംവിധാനം ചെയ്തത്. ഈരാളി ബാലനായിരുന്നു സിനിമ നിര്‍മ്മിച്ചത്.

പതിവില്‍ നിന്നും വ്യത്യസ്തമായ പ്രമേയവുമായാണ് ഈ സിനിമയെത്തിയത്. സിനിമയില്‍ സില്‍ക്ക് സ്മിതയെ നായികയാക്കുന്നതിനോട് പലര്‍ക്കും താല്‍പര്യമില്ലായിരുന്നു. മുന്‍നിര നായികമാരില്‍ പലരും ഈ ചിത്രത്തില്‍ നായികയാവാമെന്നറിയിച്ച് രംഗത്തെത്തിയിരുന്നു. എന്നാല്‍ സില്‍ക്കില്‍ ഈ വേഷം ഭദ്രമായിരിക്കുന്നുവെന്നാണ് താന്‍ കരുതിയതെന്നും അതുമായി മുന്നോട്ട് പോവുകയായിരുന്നുവെന്നും ഡെന്നീസ് ജോസഫ് പറയുന്നു. സഫാരി ചാനലിന് നല്‍കിയ അഭിമുഖത്തിനിടയിലാണ് അദ്ദേഹം കാര്യങ്ങള്‍ വിശദീകരിച്ചത്. ഈ ചിത്രത്തിലേക്ക് ഇളയരാജയെ കൊണ്ടുവന്നതിനെക്കുറിച്ചും അദ്ദേഹം തുറന്നുപറഞ്ഞിരുന്നു.

നിര്‍മ്മാതാവ് താനുമായി ബന്ധപ്പെട്ടപ്പോള്‍ രണ്ട് സിനിമയുടെ കഥയുണ്ടെന്നായിരുന്നു താനന്ന് ഈരാളി സാറിനോട് പറഞ്ഞത്. സിനിമയിലൂടെ വലിയ സാമ്പത്തിക നഷ്ടമുണ്ടായെങ്കിലും നല്ല സിനിമയാണ് തനിക്ക് വേണ്ടതെന്ന് പറഞ്ഞ് അദ്ദേഹം അഥര്‍വ്വം തിരഞ്ഞെടുക്കുകയായിരുന്നു. ഈ സിനിമ തിയേറ്ററിലെത്തിയാല്‍ കുടുംബ പ്രേക്ഷകര്‍ എത്തില്ലെന്ന തരത്തില്‍ പലരും പറഞ്ഞിരുന്നു. നല്ല വേഷത്തിലേക്ക് താരത്തെ ഇട്ടാലും കുഴപ്പം പിടിച്ചതായിരിക്കുമോയെന്ന് പ്രേക്ഷകര്‍ ചിന്തിക്കുമെന്ന് സുഹൃത്തുക്കള്‍ ചൂണ്ടിക്കാണിച്ചിരുന്നു. സില്‍ക്ക് സ്മിതയുള്ളതിനാല്‍ തിയേറ്ററുകളിലേക്ക് വരാന്‍ മടിച്ചിരുന്നുവെന്ന കാര്യത്തെക്കുറിച്ച് പലരും പില്‍ക്കാലത്ത് തുറന്നുപറഞ്ഞിരുന്നു.