കനകയെ അന്ന് നേരിട്ട് കണ്ടപ്പോൾ...; എന്നോടങ്ങനെ പെരുമാറിയ മറ്റൊരു ആർട്ടിസ്റ്റില്ലെന്ന് ഭാ​ഗ്യലക്ഷ്മി

മലയാള സിനിമാ രം​ഗത്ത് ഒരു കാലത്തെ മുൻനിര നായിക നടിമാർക്കെല്ലാം ശബ്ദം നൽകിയത് ഭാ​ഗ്യലക്ഷ്മിയാണ്. ശോഭന, ഉർവശി, രേവതി തുടങ്ങിയ നടിമാരുടെ മലയാളത്തിലെ ഏറ്റവും മികച്ച കഥാപാത്രങ്ങളെടുത്താൽ ഇവയിൽ പലതിലും ഡബ് ചെയ്തത് ഭാ​ഗ്യലക്ഷ്മിയാണ്. പ്രിയദർശന്റെ മലയാള സിനിമകളിലെ നായികമാരിൽ മിക്കവർക്കും ഭാ​ഗ്യലക്ഷ്മി ശബ്ദം നൽകി. എന്നാൽ പലപ്പോഴും ശബ്ദം നൽകിയ നടിമാർ തന്റെ വർക്കിനെ അം​ഗീകരിച്ചില്ല എന്ന പരാതി ഭാ​ഗ്യലക്ഷ്മിക്കുണ്ടായിരുന്നു.

തുടരും എന്ന സിനിമയിൽ ശോഭന താൻ ഡബ് ചെയ്ത ശബ്ദം മാറ്റി സ്വന്തം ശബ്ദം ഉപയോ​ഗിച്ചപ്പോൾ തന്നോടൊന്ന് വിളിച്ച് സംസാരിക്കുക പോലും ചെയ്തില്ലെന്ന് അടുത്തിടെ ഭാ​ഗ്യലക്ഷ്മി പറയുകയുണ്ടായി. എന്നാൽ ഭാ​ഗ്യലക്ഷ്മിക്ക് നടി കനകയെക്കുറിച്ച് പറയാനുള്ളത് നല്ല വാക്കുകളാണ്. കനകയുടെ ​ഗോഡ്ഫാദർ, വിയറ്റ്നാം കോളനി എന്നീ സിനിമകളിൽ ശബ്ദം നൽകിയത് ഭാ​ഗ്യലക്ഷ്മിയാണ്.

യെസ് 27 ന് നൽകിയ അഭിമുഖത്തിൽ കനകയെക്കുറിച്ച് ഭാ​ഗ്യലക്ഷ്മി പറഞ്ഞ വാക്കുകളാണിപ്പോൾ ശ്രദ്ധ നേടുന്നത്. എനിക്ക് ശബ്ദം നൽകുന്ന ഭാ​ഗ്യലക്ഷ്മിയെ കാണണമെന്ന് വലിയ ആ​ഗ്രഹമുണ്ടെന്ന് കനക ഒരിക്കൽ ഏതോ അഭിമുഖത്തിൽ പറഞ്ഞു. ഒരു ദിവസം ​ഗുരുവായൂർ അമ്പലത്തിൽ തൊഴാൻ പോയപ്പോൾ കനക അവിടെയുണ്ട്. ഞാനവരുടെ മുന്നിൽ പോയി ഹലോ പറഞ്ഞു. ഹലോയെന്ന് അവരും. നിങ്ങൾക്ക് ശബ്ദം നൽകുന്ന ഭാ​ഗ്യലക്ഷ്മി ഞാനാണെന്ന് പറഞ്ഞു. അയ്യോ, ആണോ ​ഗുരുവായൂരപ്പൻ അമ്പലത്തിൽ വെച്ച് നിങ്ങളെ കാണിച്ച് തന്നല്ലോ എന്ന് കനക പറഞ്ഞു. ജീവിതത്തിൽ ഇത്രയേറെ ഇഷ്ടത്തോടെ എന്നെ നോക്കിയ ആർട്ടിസ്റ്റാണ് അവരെന്നും ഭാ​ഗ്യലക്ഷ്മി പറഞ്ഞു.

തന്റെ കരിയറിലെ സുവർണകാലഘട്ടത്തെക്കുറിച്ചും ഭാ​ഗ്യലക്ഷ്മി ഓർത്തു. എന്റെ അത്രയും ഭാ​ഗ്യമുള്ള ഡ‍ബ്ബിം​ഗ് ആർട്ടിസ്റ്റുകൾ ഉണ്ടായിട്ടില്ലെന്ന് തോന്നുന്നു. അത്രയും മനോഹരമായ കഥാപാത്രങ്ങളും ഹിറ്റ് സിനിമകളും ലെജൻഡായ സംവിധായകരും. എല്ലാവരുടെ പടങ്ങളും ചെയ്യാൻ സാധിച്ചു. എല്ലാത്തിനുമപ്പുറം സംവിധായകരുമായുള്ള സൗഹൃദം. വേറെ ഒരു ഡബ്ബിം​ഗ് ആർട്ടിസ്റ്റിനും ഇത്രയും സൗഹൃദം ഉണ്ടായിട്ടില്ല. ഒരുപാട് വിഷയങ്ങളിൽ ഇടപെടുന്നതും സമകാലിക വിഷയങ്ങളിൽ സംസാരിക്കുന്നതും കൊണ്ടാകാം തനിക്ക് പ്രത്യേക പരി​ഗണന അവർ തന്നതെന്നും ഭാ​ഗ്യലക്ഷ്മി പറഞ്ഞു.