സുഹൃത്തുക്കളുടെ കൂടെ പോകാനാകില്ല, ഷോപ്പിം​ഗിന് അനുവാദമില്ല; ഞാനാ​ഗ്രഹിച്ചത് സ്നേഹം: ഭാ​ഗ്യലക്ഷ്മി

ഗൗരവക്കാരിയായാണ് ഡബ്ബിം​ഗ് ആർട്ടിസ്റ്റ് ഭാ​ഗ്യലക്ഷ്മിയെ മിക്കവരും കാണാറുള്ളത്. സമകാലിക വിഷയങ്ങളിൽ ശക്തമായ അഭിപ്രായം പറയുന്നയാളാണ് ഭാ​ഗ്യലക്ഷ്മി. എന്നാൽ തന്റെയുള്ളിന്റെ ഉള്ളിലെ വിഷമങ്ങളെക്കുറിച്ച് പുതിയ അഭിമുഖത്തിൽ ഇവർ തുറന്ന് സംസാരിക്കുന്നുണ്ട്. വേണ്ടപ്പെട്ടവരിൽ നിന്നും സ്നേഹം ആ​ഗ്രഹിച്ച മനസ് തനിക്കുണ്ടായിരുന്നെന്നും എന്നാൽ തനിക്കത് കിട്ടിയിട്ടില്ലെന്നും ഭാ​ഗ്യലക്ഷ്മി പറയുന്നു. യെസ് 27 ന് നൽകിയ അഭിമുഖത്തിലാണ് പരാമർശം.

അടിസ്ഥാനപരമായി ഞാനാ​ഗ്രഹിച്ചത് സ്നേഹമാണ്. അതെനിക്ക് എവിടെ നിന്നും കിട്ടിയിട്ടില്ല. ഇനി കിട്ടില്ല എന്ന് മനസിലായത് കൊണ്ടാണ് ഇനിയൊരു പ്രണയം ഞാൻ ആ​ഗ്രഹിക്കാത്തത്. എനിക്ക് രാവിലെ ഒരിടത്തേക്ക് പോകണമെങ്കിൽ ഞാൻ അങ്ങ് പോകും. ചോദിക്കുന്നില്ല. അത് പക്ഷെ നമ്മളെ സ്നേഹിക്കുന്ന ആണിന് സഹിക്കാൻ പറ്റില്ല. അവരോട് ഒരു വാക്ക് പറയുകയെങ്കിലും വേണം. പക്ഷെ എനിക്കങ്ങനെയില്ല. അങ്ങനെ ആ​ഗ്രഹിച്ച സമയത്ത് അങ്ങനെ അല്ലായിരുന്നു.

ഡബ്ബിം​ഗിന് പോയാൽ എത്ര ലേറ്റ് ആയാലും എന്നോടൊന്നും അദ്ദേഹം (മുൻഭർത്താവ് ) ചോദിക്കാറില്ല. എന്തുകാെണ്ട് വെെകുന്നു, രാത്രി ഡബ്ബിം​ഗിന് പോകരുത് എന്നൊന്നും പറഞ്ഞിട്ടില്ല. പക്ഷെ ഞാനൊരു ഫ്രണ്ടിനെ കാണാൻ പോകുമ്പോൾ പുള്ളി എന്നെ റെസ്ട്രിക്റ്റ് ചെയ്യുമായിരുന്നു. എനിക്ക് ഷോപ്പിം​ഗിന് പോകാനുള്ള അനുവാദം ഇല്ലായിരുന്നു. പിന്നീട് അതെല്ലാം ഞാൻ ചെയ്ത് എന്നെ ആരും ഇനി ചോദ്യം ചെയ്യരുത് എന്ന നിലയിലേക്ക് ഞാൻ മാറി. കമ്മിറ്റ്മെന്റുകൾ തന്നെ നിയന്ത്രിക്കുമോ എന്ന പേടിയുണ്ട്. അതുകൊണ്ടാണ് താൻ ഒരു പ്രണയ ബന്ധത്തിന് തയ്യാറാകാത്തതെന്നും ഭാ​ഗ്യലക്ഷ്മി പറഞ്ഞു.

തന്റെ ഡബ്ബിം​ഗ് കരിയറിലെ ഓർമകളും ഭാ​ഗ്യലക്ഷ്മി പങ്കുവെച്ചു. ഏറ്റവും അധികം ഞാൻ ആസ്വദിക്കുന്നത് ഉർവശിക്ക് ഡബ്ബ് ചെയ്യുമ്പോഴാണ്. ഡബ്ബ് ചെയ്യാതായതോടെ ആസ്വാദനം എനിക്ക് നഷ്ടപ്പെട്ടു എന്ന് പറയാം. ഇന്നും എന്റെ ആ​ഗ്രഹം ഉർവശിക്ക് ‍‍ഡബ് ചെയ്യണമെന്നാണെന്നും ഭാ​ഗ്യലക്ഷ്മി പറഞ്ഞു.