അറിയപ്പെടുന്ന നടന്മാരൊക്കെ വന്നിട്ടും ആ മഹാനടന് ശബ്ദം നല്‍കാന്‍ ആര്‍ക്കും സാധിച്ചില്ല: ഭാഗ്യലക്ഷ്മി

മുരളിയുടെ തമിഴ് സിനിമയുമായി ബന്ധപ്പെട്ടുളള അനുഭവമാണ് ഭാഗ്യലക്ഷ്മി പറഞ്ഞത്. മലയാളികളുടെ പ്രിയപ്പെട്ട താരങ്ങളില്‍ ഒരാളാണ് നടന്‍ മുരളി. ശക്തമാര്‍ന്ന കഥാപാത്രങ്ങള്‍ ചെയ്ത് ഒരുകാലത്ത് മോളിവുഡില്‍ സജീവമായിരുന്നു അദ്ദേഹം. സൂപ്പര്‍ താരങ്ങളുടെയും യുവ താരങ്ങളുടെയുമെല്ലാം സിനിമകളിലും മുരളി ഭാഗമായി. ഇന്നും മുരളിയുടെ ശ്രദ്ധേയ ചിത്രങ്ങളെല്ലാം പ്രേക്ഷക മനസുകളില്‍ നിന്നും മായാതെ നില്‍ക്കുന്നവയാണ്.

അതേസമയം മുരളി എന്ന നടനെ കുറിച്ച് പറയുമ്പോള്‍ ഒരു തമിഴ് സിനിമയുമായി ബന്ധപ്പെട്ട കാര്യമാണ് ഓര്‍മ്മ വരുന്നതെന്ന് ഭാഗ്യലക്ഷ്മി പറയുന്നു. മലയാള സിനിമയിലെ സൂപ്പര്‍ താരങ്ങളായ മമ്മൂട്ടിയും, മോഹന്‍ലാലും തിലകനുമൊക്കെ തമിഴില്‍ അഭിനയിച്ചപ്പോള്‍ അവര്‍ തമിഴ് പഠിച്ച ശേഷം അവര്‍ തന്നെയാണ് അവര്‍ക്ക് വേണ്ടി ഡബ്ബ് ചെയ്തിരുന്നത്.

പക്ഷേ മുരളി എന്ന നടന് അതത്ര എളുപ്പമല്ലാതിരുന്നതിനാല്‍ ആദ്യ കാലങ്ങളില്‍ അദ്ദേഹത്തിന് വേണ്ടി ഡബ്ബ് ചെയ്യിക്കാന്‍ ഒരു സിനിമയ്ക്ക് വേണ്ടി പലരെയും വിളിച്ചു. ഇന്ത്യയിലെ പ്രമുഖരായ ഡബ്ബിംഗ് ആര്‍ട്ടിസ്റ്റും അറിയപ്പെടുന്ന നടന്മാരുമൊക്കെ വന്നിട്ടും മുരളി എന്ന നടന് ശബ്ദം നല്‍കാന്‍ ആര്‍ക്കും സാധിച്ചില്ല, ഭാഗ്യലക്ഷ്മി പറയുന്നു.

സ്‌ക്രീനിലെ അദ്ദേഹത്തിന്‌റെ വോയിസ് മോഡുലേഷന്‍ ആര്‍ക്കും എത്തിപ്പിടിക്കാന്‍ കഴിയില്ല. ഘന ഗാംഭീര്യത്തോടെയുളള ശബ്ദമാണ് അദ്ദേഹത്തിന്‌റെ ബോഡി ലാംഗ്വേജിന് ചേരുന്നതെന്ന് മനസിലാക്കിയ സംവിധായകന്‍ ഒടുവില്‍ മുരളി എന്ന നടന് വേണ്ടി ഡബ്ബ് ചെയ്യാന്‍ കണ്ടെത്തിയത് തമിഴിലെ ഹിറ്റ് സംവിധായകന്‍ ഭാരതി രാജയായിരുന്നു. അഭിമുഖത്തില്‍ ഭാഗ്യലക്ഷ്മി പറഞ്ഞു.

അതേസമയം മലയാളത്തില്‍ നായകനായും സഹനടനായും വില്ലന്‍ വേഷങ്ങളിലും തിളങ്ങിയ താരമാണ് മുരളി. മമ്മൂട്ടി, മോഹന്‍ലാല്‍ ഉള്‍പ്പെടെയുളളവര്‍ തിളങ്ങിനില്‍ക്കുന്ന കാലത്തും ശ്രദ്ധേയ വേഷങ്ങള്‍ ചെയ്ത് മുരളി പ്രേക്ഷക പ്രശംസ നേടി. മലയാളത്തിന് പുറമെ തമിഴിലും നിരവധി സിനിമകളില്‍ അഭിനയിച്ചിരുന്നു താരം, നെയ്ത്തുകാരന്‍ എന്ന ചിത്രത്തിലൂടെയായിരുന്നു മികച്ച നടനുളള ദേശീയ ചലച്ചിത്ര പുരസ്‌കാരം മുരളിക്ക് ലഭിച്ചത്.