മത്സരാർഥികളുടെ വിവരങ്ങളുമായി മോഹൻലാൽ, മാർച്ച് 27 മുതൽ ബി​ഗ് ബോസ് സീസൺ 4 പ്രേക്ഷകരിലേക്ക്!

ഏറ്റവും കൂടുതൽ നാമനിർദ്ദേശങ്ങൾ ലഭിച്ചവരെ പുറത്താക്കുന്നതിനായി പ്രേക്ഷകർക്കും വോട്ട് രേഖപ്പെടുത്താവുന്നതാണ്. ഒരാളൊഴികെ എല്ലാ അംഗങ്ങളും പുറത്താകുന്നതു വരെ വോട്ടെടുപ്പ് തുടരുന്നു. ഏറ്റവുമൊടുവിൽ വീട്ടിൽ അവശേഷിക്കുന്നയാളെ വിജയിയായി പ്രഖ്യാപിക്കുന്നതോടെയാണ് ബിഗ് ബോസ് പരിപാടി അവസാനിക്കുന്നത്. സിനിമ, സീരിയൽ, സാമൂഹ്യപ്രവർത്തനം എന്നീ മേഖലകളിൽ പ്രശസ്തരായ 16 പേരാണ് ഈ പരിപാടിയിൽ മത്സരിക്കുന്നത്. പുറംലോകവുമായി ബന്ധമില്ലാത്ത ഒരു വീട്ടിൽ 100 ദിവസം ഒരുമിച്ച് ജീവിക്കുകയും അവസാന ദിവസം പുറത്താകാതിരിക്കുകയും ചെയ്യുന്നയാളാണ് മത്സരത്തിൽ വിജയിക്കുക. കഴിഞ്ഞ കുറച്ച് നാളുകളായി ബി​ഗ് ബോസ് നാലാം സീസൺ വരുന്നുവെന്ന് അറിയിച്ചുള്ള പ്രമോകളാണ് പുറത്തുവിട്ടിരുന്നത്.

ആദ്യ ലോ​ഗോയാണ് റിലീസ് ചെയ്തത്. പിന്നാലെ മോഹൻലാൽ തന്നെ നാലാം സീസണിലും അവതാരകനാകുമെന്ന് അറിയിച്ചുള്ള പ്രമോ വന്നു. പിന്നീട് വന്നത് സോഷ്യൽമീ‍ഡിയകളിൽ‌ പ്രചരിക്കുന്ന ബി​ഗ് ബോസ് മത്സരാർഥികളെ സംബന്ധിച്ചുള്ള പ്രഡിക്ഷൻ ലിസ്റ്റുകളെ ട്രോളിയുള്ള പ്രമോയായിരുന്നു. ഇപ്പോൾ ഏറ്റവും പുതിയതായി ബി​ഗ് ബോസ് ആരംഭിക്കാൻ പോകുന്ന തിയ്യതി അറിയിച്ചുള്ള പ്രമോയാണ് പുറത്ത് വന്നിരിക്കുന്നത്. ഇത്തവണ എന്ത് മാനദണ്ഡം നോക്കിയാണ് മത്സരാർഥികളെ തെരഞ്ഞെടുത്തിരിക്കുന്നത് എന്നും പ്രമോയിൽ മോഹൻലാൽ വിവരിക്കുന്നുണ്ട്. മാർച്ച് 27 മുതലാണ് ബി​ഗ് ബോസ് നാലാം സീസണിന്റെ സംപ്രേഷണം തുടങ്ങുന്നത്. തിങ്കൾ മുതൽ വെള്ളി വരെയുള്ള ദിവസങ്ങളിൽ രാത്രി 9.30 മുതലും ശനിയും ഞായറും ദിവസങ്ങളിൽ ഒമ്പത് മണിക്കുമാണ് ഷോയുടെ സംപ്രേഷണം.

വ്യത്യസ്ത നിലപാടുകളും തീരുമാനങ്ങളും ഇഷ്ട​ങ്ങളുമുള്ള ആളുകളാണ് സീസൺ ഫോറിൽ മത്സരിക്കാൻ എത്തുന്നത് എന്നാണ് പ്രമോ വീഡിയോയിൽ മോഹൻലാൽ പറയുന്നു. സം​ഗതി കളറാകും എന്ന ടാ​ഗ് ലൈനും പുതിയ പ്രമോയ്ക്ക് നൽകിയിട്ടുണ്ട്. പ്രമോ വന്നതോടെ ബി​ഗ് ബോസ് ആരാധകരും പ്രതീക്ഷയിലാണ്. ബി​ഗ് ബോസ് സീസൺ ഫോറിനായി കാത്തിരിക്കുകയാണ്, നിലവാരുമുള്ള മത്സരങ്ങളും മത്സരാർഥികളും വരണം, ദയവുചെയ്ത് മത്സരാർഥികളുടെ കണ്ണീർ കഥ ഇടരുത്. അവരുടെ ഗെയിം കാണാനാണ് ഞങ്ങൾ പ്രേക്ഷകർ ഇരിക്കുന്നത്. സിംപതി ഗെയിംങ്ങ് ഈ കൊല്ലമെങ്കിലും ഒന്ന് ഒഴിവാക്കി തരണം തുടങ്ങി നിരവധി കമന്റുകളാണ് പുതിയ പ്രമോ വന്നതോടെ പ്രത്യക്ഷപ്പെടുന്നത്.