മമ്മൂക്കയുടെ ആ ശീലം അറിഞ്ഞ ശേഷമാണ് അന്ന് കാണാന്‍ പോയത്, മനസുതുറന്ന് ബോബി സഞ്ജയ്‌

മമ്മൂട്ടി ടൈംസ് യൂടൂബ് ചാനലിലാണ് ഈ വീഡിയോ പുറത്തിറങ്ങിയത്. മമ്മൂക്കയുമായുളള ആദ്യ ചിത്രമാണ് ഇതെന്ന് ബോബി പറയുന്നു. മമ്മൂക്കയുടെ അടുത്ത് തിരക്കഥ വായിക്കാന്‍ പോവുകയാണെന്ന് പറഞ്ഞപ്പോള്‍ സുഹൃത്തുക്കളെല്ലാം ഒരു കാര്യം ശ്രദ്ധിച്ചോളണമെന്ന് പറഞ്ഞിരുന്നു. നിങ്ങള് വായിക്കുമ്പോ പുളളി ഫുള്‍ടൈം മൊബൈലിലേക്ക് നോക്കികൊണ്ടിരിക്കും.

അതൊരു ട്രാപ്പ് ആണ്. പുളളി നിങ്ങളെ ടെസ്റ്റ് ചെയ്യുന്നതാണ്. അതില്‍ വീഴരുതെന്ന് പറഞ്ഞു. നിങ്ങള് വായിച്ചുകൊണ്ടിരുന്നാ മതി പ്രശ്‌നമൊന്നും ഇല്ലാ എന്ന് പറഞ്ഞു. അപ്പോ ഞങ്ങള് വിചാരിച്ചു കൊളളാമല്ലോ, വലിയൊരു ടിപ്പ് അല്ലെ കിട്ടിയത് എന്നൊക്കെ. അങ്ങനെ ഞങ്ങള്‍ മമ്മൂക്കയുടെ അടുത്ത് പോയി. ഞങ്ങള് തിരക്കഥ വായിക്കാന്‍ തുടങ്ങി.

അവര് പറഞ്ഞ പോലെ ഒന്നാമത്തെ സീന്‍ മുതല്‍ മമ്മൂക്കയുടെ കണ്ണ് മൊബൈലിലാണ്. അതില്‍ നിന്നും കണ്ണ് എടുക്കുന്നേയില്ല. ഞങ്ങള് ഒരു സീനായി, രണ്ട് സീനായി, മൂന്നായി ഇങ്ങനെ വായിച്ചുകൊണ്ടേയിരിക്കുന്നു. എന്നാല്‍ ഒരു തരത്തിലും ഒരു സംസാരമോ, നോട്ടമോ ഒന്നും മമ്മൂക്കയുടെ ഭാഗത്തുനിന്നും ഇല്ല. ഒരു ഘട്ടം എത്തിയപ്പോ ഞങ്ങള് ആ കെണിയില്‍ വീണു.

ഞങ്ങള് ചോദിച്ചു. മമ്മൂക്ക ഈ പറയുന്നതെല്ലാം കേള്‍ക്കുന്നുണ്ടോ എന്ന്. അപ്പോ തൊട്ടുമുന്‍പ് വായിച്ച സീന്‍ വളളിപുളളി വിടാതെ അദ്ദേഹം ഇങ്ങോട്ട് പറഞ്ഞു. അപ്പോഴാണ് ഞങ്ങള്‍ക്ക് മനസിലായത് വായിക്കുന്നത് ഫുള്‍ ശ്രദ്ധിച്ചുകൊണ്ടാണ് അദ്ദേഹം മൊബൈലിലും നോക്കുന്നത്. ഇത് മമ്മൂക്കയെ പറ്റിയുളള എന്റെ ഓര്‍മ്മകളില്‍ ഒന്നാണ്.

എന്നെ സംബന്ധിച്ച് പറയുകയാണെങ്കില്‍ പന്ത്രണ്ട് വയസുളളപ്പോഴാണ് അദ്ദേഹത്തെ കാണുന്നത്. അച്ഛന്‍ പ്രൊഡ്യൂസ് ചെയ്ത കൂടെവിടെ എന്ന സിനിമയുടെ ലെക്കേഷനില്‍ വെച്ച്. അന്ന് മുതല്‍ ഇന്ന് വരെ ആ പന്ത്രണ്ട് വയസുകാരന് തന്ന അതേ സ്‌നേഹവും അഫക്ഷനും പരിഗണനയുമെല്ലാം ഇന്നും എനിക്ക് അദ്ദേഹത്തില്‍ നിന്നും കിട്ടുന്നുണ്ട്

Recommended Video

Mammootty's new photo goes viral | FilmiBeat Malayalam

ഞങ്ങളെ സംബന്ധിച്ചിടത്തോളം തിരക്കഥ എഴുതിയ 11 സിനിമകള്‍ എടുത്തുനോക്കുമ്പോള്‍ അതിലെ എറ്റവും വലിയൊരു ഒരു അപൂര്‍ണ്ണതയായിരുന്നു മമ്മൂക്ക ഇല്ലാത്ത ഒരു സിനിമ എന്നത്. അതിനുളള എറ്റവും വലിയ പരിഹാരമാണ് ഞങ്ങള്‍ക്ക് വണ്‍ എന്ന സിനിമയിലൂടെ ലഭിച്ചത്. ബോബി പറഞ്ഞു.