'ഭർത്താവ് ഏഴ് വയസിന് ഇളയത്, പതിയെ ഭർത്താവ് ശത്രുവായി തീർന്നു, സ്ത്രീയുടെ ഏറ്റവും മോശം അവസ്ഥ'; മനീഷ കൊയ്രാള!

2013ലാണ് മനീഷ അര്‍ബുദ ബാധിതയായത്. മനശ്ശക്തി കൈവിടാതെ രോഗത്തിനെതിരെ പോരാടി. രോഗമുക്തി നേടി. ഇപ്പോള്‍ ഒമ്പത് വര്‍ഷം പിന്നിട്ടിട്ടും അതിജീവനത്തിന്‍റെ പാതയിലാണ് താരം.

നേപ്പാളിലെ രാഷ്ട്രീയ രംഗത്ത് മുന്നിട്ട് നിന്ന ഒരു ഹിന്ദു കുടുംബത്തിലാണ് മനീഷ ജനിച്ചത്. മനീഷയുടെ മുത്തച്ഛനായിരുന്ന ബിവേശ്വർ പ്രസാദ് കൊയ്‌രാള 1960 കളുടെ ആദ്യത്തിൽ നേപ്പാൾ പ്രധാനമന്ത്രിയായിരുന്നു. അതുപോലെ കുടുംബത്തിലെ പല അംഗങ്ങളും പാർലമെന്റ് അം​ഗങ്ങളുമാണ്.

സിനിമയെ സ്നേഹിക്കുന്നവർക്കെല്ലാം മനീഷയിലെ അഭിനേത്രിയെ ഇഷ്ടമാണ്. ഏത് കഥാപാത്രവും അനായാസം അവതരിപ്പിച്ച് കൈയ്യടി വാങ്ങാൻ മനീഷയ്ക്ക് സാധിക്കുമെന്നത് തന്നെയാണ് കാരണം.

മനീഷയുടെ സിനിമാ ജീവിതം എല്ലാവർക്കും സുപരിചിതമാണെങ്കിലും താരത്തിന്റെ വിവാഹ​ ജീവിതത്തില‍ുണ്ടായ ദുരന്തം ഇതുവരേയും സോഷ്യൽമീഡിയയിൽ അധികം ചർച്ച ചെയ്യപ്പെട്ടിട്ടില്ല. വളരെ ആ​ഗ്രഹിച്ചും സന്തോഷിച്ചുമാണ് മനീഷ വിവാ​ഹ ജീവിതത്തിലേക്ക് കടന്നത്. പക്ഷെ ആ ബന്ധത്തിന് അധികം ആയുസുണ്ടായിരുന്നില്ല.

മനീഷ കൊയ്‌രാള 2010ലാണ് നേപ്പാളി വ്യവസായിയായ സാമ്രാട്ട് ദഹലിനെ വിവാഹം ചെയ്തത്. മനീഷയേക്കാൾ ഏഴ് വയസിന് ഇളയതായിരുന്നു സാമ്രാട്ട്. ഭ്രാന്തമായ പ്രണയത്തിനിടയിൽ ആ പ്രായ വ്യത്യാസം ഇരുവരും ​ഗൗനിച്ചില്ല.

കാഠ്മണ്ഡുവിൽ പരമ്പരാഗത രീതിയിൽ വളരെ സ്വകാര്യമായാണ് വിവാഹ ചടങ്ങുകൾ നടന്നത്. തങ്ങളുടെ ബന്ധത്തെക്കുറിച്ചും വിവാഹത്തെക്കുറിച്ചും ഇരുവരും മാധ്യമങ്ങളെ പോലും അറിയിച്ചിരുന്നില്ല. അതിനാലാൽ ആരാധകർ ആദ്യം കരുതിയത് മനീഷയുടേത് അറേഞ്ച്ഡ് മാരേജാണെന്നായിരുന്നു.

പിന്നീട് വിവാഹം കഴിഞ്ഞ് കുറച്ച് ആഴ്ചകൾ പിന്നിട്ട ശേഷം തന്റേത് പ്രണയ വിവാഹം ആയിരുന്നുവെന്നും ഫേസ്ബുക്കിലൂടെയാണ് ഭർത്താവ് സാമ്രാട്ട് ദഹലിനെ കണ്ടുമുട്ടിയതെന്നും മനീഷ വെളിപ്പെടുത്തി. തങ്ങളുടെ ബന്ധം അതി തീവ്രമാണെന്ന് മനസിലാക്കിയത് കൊണ്ടാണ് വിവാഹത്തിലേക്ക് കടന്നതെന്നും മനീഷ് അന്ന് പറഞ്ഞിരുന്നു.

എന്നാൽ ദാമ്പത്യം ആറ് മാസം പിന്നിട്ടപ്പോൾ ഒരു ദിവസം മനീഷ കൊയ്‌രാള തന്റെ ഔദ്യോഗിക ഫേസ്ബുക്ക് പേജിൽ തന്റെ ഭർത്താവ് സാമ്രാട്ട് ദഹലിൽ നിന്ന് വിവാഹമോചനം നേടാൻ ഒരുങ്ങുകയാണെന്ന് വെളിപ്പെടുത്തി.

'എന്റെ ഭർത്താവ് എന്റെ ശത്രുവായിത്തീർന്നിരിക്കുന്നു... ഒരു സ്ത്രീയെ സംബന്ധിച്ചിടത്തോളം അത് എത്ര മോശമായിരിക്കും' എന്നാണ് വിവാഹമോചനം പ്രഖ്യാപിച്ച് മനീഷ എഴുതിയത്. പിന്നീട് മനീഷ കൊയ്രാളയും സാമ്രാട്ട് ദഹലും 2012ൽ വിവാഹമോചനത്തിന് അപേക്ഷ നൽകുകയും എന്നെന്നേക്കുമായി വേർപിരിയുകയും ചെയ്തു.

അതേ വർഷം തന്നെയാണ് മനീഷയ്ക്ക് കാൻസർ ബാധിച്ചതായി കണ്ടെത്തിയത്. കാൻസറിന്റെ ലാസ്റ്റ് സ്റ്റേജിലാണ് അത് തിരിച്ചറിഞ്ഞതെങ്കിലും നിശ്ചയദാർഢ്യവും പരിശ്രമവും കൊണ്ട് മനീഷ് ജീവിതത്തിലേക്ക് തിരികെ വന്നു. പിന്നീട് ഒരു വിവാഹ ജീവിതം താരത്തിന് ഉണ്ടായിട്ടില്ല.