ചെമ്പന്‍ വിനോദിന്റെ തോളില്‍ ചാരി സണ്ണി ലിയോണ്‍; മച്ചാനെ ഇത് പോരെന്ന് വിനയ് ഫോര്‍ട്ട്, ചിരിയെ കുറിച്ച് റിമയും

അടുത്ത സുഹൃത്തുക്കളെന്ന് തോന്നിപ്പിക്കുന്ന വിധത്തിലുള്ള ചിത്രം ഫേസ്ബുക്കിലും ഇന്‍സ്റ്റാഗ്രാമിലുമൊക്കെ ചെമ്പന്‍ വിനോദ് പോസ്റ്റ് ചെയ്തിട്ടുണ്ട്. 'സണ്ണി ലിയോണിനൊപ്പം (എ ഗുഡ് സോള്‍)' എന്നാണ് ചിത്രത്തിന് താഴെ ക്യാപ്ഷനായി കൊടുത്തിരിക്കുന്നത്. ആരാധകരും സിനിമാ താരങ്ങളുമടക്കം നിരവധി പേരാണ് ഫോട്ടോയ്ക്ക് കമന്റുകളുമായി എത്തിയത്.

'മച്ചാനേ ഇത് പോരേ അളിയാ' എന്നാണ് നടന്‍ വിനയ് ഫോര്‍ട്ട് എഴുതിയത്. നിങ്ങളുടെമുഖത്തെ ആ ചിരി കാണുമ്പോഴാണെന്ന് നടി റിമ കല്ലിങ്കലും പറയുന്നു. നടന്മാരായ ജിനു ജോസഫ്, സൗബിന്‍ ഷാഹിര്‍, സംവിധായകനും എഴുത്തുകാരനുമായ പരാരി മുഹ്‌സിന്‍, എന്നിങ്ങനെ ഒത്തിരി താരങ്ങളും ഫോട്ടോയ്ക്ക് കമന്റുമായി എത്തിയിട്ടുണ്ട്. എല്ലാവര്‍ക്കും ചെമ്പന്‍ വിനോദ് മറുപടി പറയുകയും ചെയ്തിട്ടുണ്ട്.

സണ്ണി ലിയോണ്‍ കേന്ദ്രകഥാപാത്രത്തെ അവതരിപ്പിക്കുന്ന സിനിമയുടെ ചിത്രീകരണം നടന്ന് കൊണ്ടിരിക്കുകയാണ്. ഇതിന്റെ ലൊക്കേഷനില്‍ നിന്നുള്ള ഫോട്ടോ ആണെന്നാണ് അറിയുന്നത്. മലയാളത്തിലടക്കം തെന്നിന്ത്യന്‍ ഭാഷകളില്‍ ഒന്നിച്ച് നിര്‍മ്മിക്കുന്ന ഷീറോ എന്ന സിനിമയിലാണ് സണ്ണി അഭിനയിക്കുന്നത്. സൈക്കോളജിക്കല്‍ ത്രില്ലറായി ഒരുക്കുന്ന ചിത്രം ഇക്കിഗായ് മോഷന്‍ പിക്‌ചേഴ്‌സിന്റെ ബാനറിലാണ് നിര്‍മ്മിക്കുന്നത്. ശ്രീജിത്ത് വിജയന്‍ സംവിധാനം ചെയ്യുന്ന ചിത്രത്തില്‍ ചെമ്പന്‍ വിനോദും അഭിനയിക്കുന്നുണ്ടെന്നാണ് അറിയുന്നത്.

Sunny Leone and husband Daniel Weber supply food boxes to the needy

സിനിമയുടെ ചിത്രീകരണവുമായി ബന്ധപ്പെട്ട് സണ്ണി ലിയോണ്‍ കുടുംബസമേതം കേരളത്തിലെത്തിയിട്ട് മാസങ്ങളായി. ഭര്‍ത്താവിനും മക്കള്‍ക്കുമൊപ്പമുള്ള നിരവധി ഫോട്ടോസ് സണ്ണിയും സോഷ്യല്‍ മീഡിയ പേജുകളിലൂടെ പങ്കുവെക്കാറുണ്ട്. കൊവിഡ് കാലത്ത് സാമൂഹ്യ സേവനങ്ങള്‍ നടത്തിയും സണ്ണി വാര്‍ത്തകളില്‍ നിറഞ്ഞിരുന്നു. ഭര്‍ത്താവിനൊപ്പം തെരുവില്‍ താമസിക്കുന്നവര്‍ക്ക് ഭക്ഷണം നല്‍കാനെത്തിയ നടിയുടെ ഫോട്ടോസും വീഡിയോസും മുന്‍പ് വൈറലായിരുന്നു. രംഗീല, വീരമാദേവി എന്നിങ്ങനെ രണ്ട് തമിഴ് ചിത്രങ്ങളാണ് ചിത്രീകരണം നടക്കുന്ന മറ്റ് സിനിമകള്‍.