പണം മുടക്കാന്‍ ആരും മുന്നോട്ട് വന്നില്ല, എന്നിട്ടും ദിലീപിന്റെ തലേവര മാറ്റി മറിച്ചു ആ ചിത്രം!!!

ജോണി ആന്റണി എന്ന നവാഗത സംവിധായകന്‍. നായകനാകുന്നത് ദിലീപ്. ചിത്രത്തിന് തിരക്കഥയെളുതുന്നതാകട്ടെ ഉദയ്കൃഷ്ണ സിബി കെ തോമസ് കൂട്ടുകെട്ടും. പക്ഷെ, എന്ത് ചെയ്യാം ചിത്രം നിര്‍മിക്കാന്‍ ആളില്ല. ടോം ആന്‍ഡ് ജെറി മൂഡിലുള്ള സിനിമയുടെ കഥയില്‍ നിര്‍മാതാക്കള്‍ക്ക് വിശ്വാസമില്ല.

തിയറ്ററില്‍ വന്‍ വിജയമായി മാറിയ സിഐഡി മൂസ നിര്‍മാതാക്കള്‍ തള്ളിക്കളഞ്ഞ ചിത്രമായിരുന്നു. ചിത്രത്തിലെ കോമഡി ട്രാക്ക് വേണ്ട വിധത്തില്‍ ഉള്‍ക്കൊള്ളാന്‍ നിര്‍മാതാക്കള്‍ക്കായില്ല. ജോണി ആന്റണി എന്ന നവാഗത സംവിധായകന് സധിക്കുമോ എന്ന സംശയവും അവര്‍ക്കുണ്ടായിരുന്നു.

നിര്‍മാതാക്കള്‍ പിന്മാറിയെങ്കിലും ദിലീപിന് ആ കഥയില്‍ വിശ്വാസമായിരുന്നു. അതുകൊണ്ടുതന്നെ ആ ചിത്രം ഉപേക്ഷിക്കാന്‍ ദിലീപ് തയാറായില്ല. ചിത്രം നിര്‍മാണം ദിലീപ് ഏറ്റെടുത്തു. ദിലീപും സഹോദരന്‍ അനൂപും ചേര്‍ന്നാണ് ചിത്രം നിര്‍മിച്ചത്.

കോമഡി ത്രില്ലര്‍ ചിത്രം സൂപ്പര്‍ ഹിറ്റായി മാറി. ചിത്രം കുട്ടികളെ ഏറെ ആകര്‍ഷിച്ചു. കുട്ടികളുടെ ഇഷ്ടതാരമായി മാറുകയായിരുന്നു ദിലീപ്. കുടുംബ പ്രേക്ഷകര്‍ക്കും സിഐഡി മൂസ പ്രിയങ്കരമായി മാറി.

ചിത്രത്തില്‍ നായികയായി എത്തിയ ഭാവനയുടെ ആദ്യ മുഴുനീള നായിക വേഷമായിരുന്നു സിഐഡി മൂസയിലേത്. തിളക്കത്തില്‍ ദിലീപിനൊപ്പം തന്നെ അതിഥി താരമായി ഭാവന അഭിനയിച്ചിരുന്നു. അതിന് മുമ്പ് ക്രോണിക് ബാച്ചിലറില്‍ മമ്മുട്ടിയുടെ അനുജത്തിയായും എത്തി. പിന്നീടാണ് സിഐഡി മൂസയിലേക്ക് എത്തുന്നത്. കമല്‍ സംവിധാനം ചെയ്ത നമ്മളായിരുന്നു ആദ്യ ചിത്രം.

ദിലീപിന്റെ കരിയറില്‍ ജൂലൈ നാലിന് റിലീസ് ചെയ്ത സിനിമകളെല്ലാം വന്‍ വിജയങ്ങളായിരുന്നു. തന്റെ ഭാഗ്യ ദിവസമായിട്ടാണ് ദിലീപ് ജൂലൈ നാലിനെ കണ്ടിരുന്നത്. ജൂലൈ നാലിന്റെ വിജയ പരമ്പരയ്ക്ക് തുടക്കം കുറിച്ച ചിത്രം സിഐഡി മൂസയായിരുന്നു.

സൂപ്പർ ഹിറ്റായി മാറുന്ന ചിത്രങ്ങൾക്ക് രണ്ടാം ഭാഗം ഒരുങ്ങുന്നത് സിനിമാ ലോകത്തെ പതിവ് കാഴ്ചയാണ്. സിഐഡി മൂസയ്ക്കും രണ്ടാം ഭാഗം ഒരുക്കുന്നുണ്ടെന്ന് അണിയറ പ്രവർത്തകർ വ്യക്തമാക്കി കഴിഞ്ഞു. എന്നാൽ ചിത്രം സംബന്ധിച്ച കൂടുതൽ വിവരങ്ങൾ പുറത്ത് വിട്ടിട്ടില്ല.