നിവിൻ ബിഗ് ബിയിലെ മമ്മൂക്കയെ പോലെ, ടൊവിനോയും ഞാനും അലമ്പാണ്, സഹോദരങ്ങളെ കുറിച്ച് ധീരജ്

ടൊവിനോ എന്റെ അമ്മയുടെ ചേട്ടന്റെ മകനാണ്. നിവിൻ ചേട്ടൻ എന്റെ അച്ഛന്റെ ചേട്ടന്റെ മകനും. നിവിൻ ചേട്ടനും ടൊവിയും ബന്ധുക്കളാണെന്ന് പലർക്കും അറിയാം എങ്കിലും അത്ര അധികമാർക്കും അറിയില്ല. അവരെ രണ്ട് പേരെയും ബന്ധുക്കളാക്കുന്ന ആ 'ലിങ്ക്' എന്റെ കുടുംബമാണ്. നിവിൻ ചേട്ടൻ എനിക്ക്മൂത്ത ജ്യേഷ്ഠന്റെ സ്ഥാനത്താണ്. ഈ ബിഗ് ബിയിലെ മമ്മൂക്കയെ ഒക്കെ പോലെ. കുഞ്ഞിലേ തൊട്ട് റോൾ മോഡലായി കണ്ടിരുന്ന ആളാണ്. പണ്ടേ തൊട്ട് ഞങ്ങളൊന്നിച്ചാണ്. സിനിമയോടുള്ള എന്റെ ഇഷ്ടം പറഞ്ഞ സമയത്ത് പുള്ളി എനിക്ക് ഒരുപാട് ടിപ്സ് ഒക്കെ പറഞ്ഞു തന്നിരുന്നു. പുള്ളിയുടെ കഷ്ടപാടുകളിൽ നിന്നും അനുഭവങ്ങളിൽ നിന്നും മനസിലാക്കിയ കാര്യങ്ങളാണത്.

ടൊവിനോയുടെ കാര്യം അങ്ങനെയല്ല. ഞങ്ങൾ ഏതാണ്ട് ഒരേ പ്രായമാണ്. കുഞ്ഞിലേ തൊട്ട് അലമ്പാണ്. സത്യം പറഞ്ഞാൽ ടൊവിയുടെ അടുത്ത് ഒരു ഉപദേശം ചോദിക്കാൻ എനിക്ക് ചമ്മലാണ്. ഒരേ പ്രായമല്ലേ..ഒരേ വൈബാണ്. സിനിമയുടെ കാര്യത്തിൽ അവനും ഭയങ്കര പിന്തുണയാണ്. അവനൊപ്പം അഭിനയിക്കുമ്പോൾ ഞാൻ വളരെയധികം കംഫർട്ടബിളായിരുന്നു. പിന്നെ പലരും പറഞ്ഞിട്ടുണ്ട് ടൊവിയുടെ ശബ്ദവുമായി എന്റെ ശബ്ദത്തിന് വളരെയധികം സാമ്യമുണ്ടെന്ന്. കർണന്റെ ഡബ്ബിങ്ങിന് അത് മാറ്റിപിടിക്കണം. എന്റെ സംസാരത്തിലും ഒരു തൃശ്ശൂർ സ്ലാങ്ങ് ഉണ്ട്. എന്നാൽ ഞാൻ പക്കാ ആലുവക്കാരനാണ്.

സ്കൂൾ കാലം തൊട്ടേ നാടകത്തിലൊക്കെ പങ്കെടുക്കാറുണ്ട്. പിന്നെ ഞങ്ങളുടെ പള്ളിയിൽ സിഎംസി എന്ന യൂത്തിന്റെ ഒരു കൂട്ടായ്മ ഉണ്ട്. എല്ലാ മാസാവസാനവും ഈ കൂട്ടായ്മയുടെ ഭാഗമായി എന്തെങ്കിലും പരിപാടികൾ ഉണ്ടാവാറുണ്ട്. തെരുവുനാടകം പോലുള്ളവ. അതിലൊക്കെ സജീവമായിരുന്നു. എന്റെ പള്ളിയിൽ തന്നെയായിരുന്നു നിവിൻ ചേട്ടനും സിജു വിത്സണും അൽഫോൺസ് ചേട്ടനുമെല്ലാം. ഞാൻ നോക്കുമ്പോൾ നമ്മുടെ സീനിയേഴ്സൊക്കെ ഈ പള്ളി പരിപാടികളിലും കൂട്ടായ്മകളിലുമൊക്കെ സജീവമാണ്. . അങ്ങനെ അവരുടെ പാത പിന്തുടർന്ന് അതിലേക്ക് തന്നെ എത്തി.

സ്വജനപക്ഷപാതമെന്ന സംഗതി വേണ്ടെന്ന് കരുതിയാണ് നിവിൻ ചേട്ടനും ടൊവിയുമായുള്ള ബന്ധമൊന്നും താൻ എങ്ങും പറയാതിരുന്നതെന്നും ധീരജ് പറയുന്നു.എന്റെതായ രീതിയിൽ ശ്രമിക്കുന്നത് എനിക്ക് തന്നെ ഗുണം ചെയ്യുമല്ലോ. ആളുകൾ കുറച്ചെങ്കിലും തിരിച്ചറിഞ്ഞു തുടങ്ങിയത് കൽക്കിയിലൂടെയാണ്. ആർക്കും പാവം തോന്നിപ്പോകുന്ന ഗോവിന്ദൻ എന്ന കഥാപാത്രമായിരുന്നു തന്റേത്. ടൊവി വഴിയാണ് കൽക്കിയുടെ ഓഡിഷനിലെത്തുന്നത്. ഈ സിനിമയുടെ ചിത്രീകരണ സമയത്താണ് കർണൻ നെപ്പോളിയൻ ടീം എന്നെ സമീപിക്കുന്നത്..