ബിഗ് ബജറ്റോ താരമൂല്യമോ ഇല്ല, എന്നിട്ടും ക്വീന്‍ സൂപ്പര്‍ ഹിറ്റ്! നവാഗതരുടെ മാസിന് ഒരു വയസ്!

ക്വീന്‍

ഡിജോ ജോസ് ആന്റണി എന്ന നവാഗതന്റെ സംവിധാനത്തിലെത്തിയ ഡ്രാമ ത്രില്ലറായിരുന്നു ക്വീന്‍. 2018 ജനുവരിയിലെത്തിയ ഹിറ്റ് സിനിമകളില്‍ ഒന്നായിരുന്നു ഈ ചിത്രം. അഭിനേതക്കാളും പുതുമുഖങ്ങളായിരുന്നെങ്കിലും റിലീസിന് മുന്‍പ് തന്നെ സിനിമയിലെ പാട്ടുകളെല്ലാം സോഷ്യല്‍ മീഡിയ വഴി ഹിറ്റായിരുന്നു. റിലീസിനെത്തിയതിന് ശേഷം പ്രതീക്ഷകള്‍ക്കപ്പുറം വിജയമായിരുന്നു സിനിമയ്ക്ക് ലഭിച്ചത്. സിനിമയില്‍ അഭിനയിച്ച എല്ലാ താരങ്ങളും ശ്രദ്ധിക്കപ്പെട്ടിരുന്നു. നായികയായെത്തിയ സാനിയ ഇയ്യപ്പന് പിന്നീട് കൈനിറയെ സിനിമകളായിരുന്നു. നടന്‍ ധ്രുവന്‍ പുതിയ സിനിമകളുടെ തിരക്കിലാണ്.

ട്രോളന്മാരുടെ പ്രിയപ്പെട്ട ചിന്നു

പത്താം ക്ലാസുകാരിയായ സാനിയ ഇയ്യപ്പനായിരുന്നു ക്വീനില്‍ നായികയായെത്തിയത്. ചിന്നു എന്ന വേഷത്തില്‍ സാനിയ തകര്‍ത്തഭിനയിച്ചിരുന്നു. എന്നാല്‍ സ്വയം പരിചയപ്പെടുത്തുന്ന ചിന്നുവിനെ ഏറ്റവുമധികം ശ്രദ്ധിച്ചത് ട്രോളന്മാരായിരുന്നു. അക്കാലത്ത് സോഷ്യല്‍ മീഡിയിയല്‍ എന്ത് പറഞ്ഞാലും ചിന്നുവിന്റെ പേരിലുള്ള ട്രോളുകളായിരുന്നു. ആദ്യ സിനിമയ്ക്ക് ശേഷം ജയസൂര്യയുടെ പ്രേതം 2, മോഹന്‍ലാലിന്റെ ലൂസിഫര്‍ തുടങ്ങിയ സിനിമകളില്‍ അഭിനയിക്കാന്‍ സാനിയയ്ക്ക് അവസരം ലഭിച്ചിരുന്നു.

ഡിജോ ജോസ് ആന്റണിയുടെ വാക്കുകളിലേക്ക്

ജനുവരി 12, 2 വര്‍ഷത്തെ കാത്തിരിപ്പിനും, അധ്വാനത്തിനും, പരിശ്രമങ്ങള്‍ക്കും ശേഷം ക്വീന്‍ തിയേറ്ററുകളിലെത്തിയ ദിവസം. നവാഗതരുടെ ഒരു കൂട്ടായ്മ ആയിരുന്നു ഈ ക്വീന്‍ എന്ന ചിത്രം. അതൊരു ടീം വര്‍ക്ക് തന്നെ ആയിരിന്നു. ചിത്രത്തിന്റെ തിരക്കഥാകൃത്തുക്കള്‍, അഭിനേതാക്കള്‍, സാങ്കേതിക രംഗത്ത് പ്രവര്‍ത്തിച്ചവര്‍ എന്നിങ്ങനെ ഒരു കൂട്ടം യുവ പ്രതിഭകളുടെ പരിശ്രമങ്ങളുടെ ഫലം കൂടി പൂവണിഞ്ഞ ദിവസം. ഒരുപാട് നടീ നടന്മാരെക്കണ്ടു സംസാരിച്ചു പരാജയപ്പെട്ടിടത്തു നിന്നാണ് ക്വീന്‍ നവാഗതരെ അണിനിരത്തി ഒരുങ്ങുന്നത്. അതുകൊണ്ട് തന്നെ വെല്ലുവിളികള്‍ നിറഞ്ഞ ആ ദൗത്യം ഞങ്ങളെ വിശ്വസിച്ചു നിര്‍മ്മിക്കാന്‍ ഒരു നിര്‍മ്മാതാവ് തയ്യാറായി എന്നുള്ളത് തന്നെ ആയിരുന്നു മുന്‍പോട്ടുള്ള വഴികളിലെ യാത്ര സുഖമമാക്കിയത്.

പുതുജീവിതം നല്‍കി ക്വീന്‍

എങ്കിലും പിന്നെയും ഒരുപാട് പ്രതിസന്ധികള്‍ ഉണ്ടായിരുന്നു, നവാഗതവരുടെ ചിത്രം തിയേറ്ററില്‍ എത്തിക്കുമ്പോള്‍ പ്രേക്ഷകര്‍ അതിനെ എത്തരത്തില്‍ സ്വീകരിക്കും എന്നൊക്കെയുള്ളത് അതിലേറെ വെല്ലുവിളി നിറഞ്ഞ ചോദ്യങ്ങളായിരുന്നു. എങ്കിലും ഒരുപാട് സന്തോഷമുണ്ട് ഒരു നല്ല സന്ദേശം അതിന്റെ വാണിജ്യ മൂല്യങ്ങളില്‍ കുറവ് വരുത്താതെ പ്രേക്ഷകരിലേക്ക് എത്തിക്കാന്‍ സാധിച്ചു എന്നോര്‍ക്കുമ്പോള്‍. ക്വീന്‍ നല്‍കിയ വിജയം ഞങ്ങള്‍ക്കെല്ലാവര്‍ക്കും ഒരു പുതുജീവിതം നല്‍കി. പിന്നീട് അത്തരത്തില്‍ പുതുമുഖങ്ങള്‍ക്ക് അവസരങ്ങള്‍ നല്‍കി എത്തിയ ഒരുപാട് ചിത്രങ്ങള്‍ക്ക് ക്വീന്‍ ഒരു പ്രചോദനമായി മാറി എന്നറിഞ്ഞപ്പോള്‍ ഒരുപാട് സന്തോഷം തോന്നി.

സ്വപ്നങ്ങള്‍ക്ക് ചിറക് മുളപ്പിച്ച ദിനം

എങ്കിലും ചെറിയ വിഷമമുള്ളത് എന്തെന്നാല്‍ കഴിഞ്ഞ വര്‍ഷം റിലീസായത്തില്‍ ചുരുക്കം ഹിറ്റുകള്‍ ഒന്നായിട്ടും പലയിടത്തു നിന്നും, പല ഓണ്‍ലൈന്‍ ഗ്രൂപ്പുകളിലെ ഹിറ്റ് ചാര്‍ട്ടിലും ക്വീന്‍ തഴയപ്പെട്ടതായി കണ്ടു. നവാഗതര്‍ മാത്രമായതുകൊണ്ടാകാം. കണ്ടില്ലെന്നു നടിക്കാനാവുന്നില്ല... എന്നിരുന്നാലും എല്ലാവര്‍ക്കും നന്മകള്‍ വരുത്തട്ടെ. പ്രാര്‍ഥനകള്‍ മാത്രം. ഞങ്ങളുടെ സ്വപ്നങ്ങള്‍ക്ക് ചിറക് മുളപ്പിച്ച ആ ദിനം വീണ്ടും ആഗതമായിരിക്കുകയാണ്.

പുതിയ വിശേഷങ്ങള്‍

ഇത്തവണ പുതിയ ചിന്തകള്‍, പുതിയ വിശേഷങ്ങള്‍, പുതിയ പദ്ധതികള്‍. ഞങ്ങളെ ചിറക് വെച്ചു പറക്കാന്‍ പഠിപ്പിച്ചത് നിങ്ങളാണ്. പ്രതീക്ഷകള്‍ ഏറെയാണ്, 2018 ജനുവരി 12 നു ഞങ്ങളെ നിങ്ങള്‍ പ്രോത്സാഹിപ്പിച്ചത് പോലെ ഇനിയുള്ള കാലത്തും ആ പിന്തുണയുണ്ടാവണം... ക്വീന്‍ കുടുംബാംഗങ്ങളുമായി ഒരുമിച്ചൊരു ഒത്തുചേരല്‍ ആഗ്രഹിക്കുന്നുണ്ട്. അതിനെ പറ്റിയുള്ള വിവരങ്ങള്‍ അറിയിക്കാം... അതോടൊപ്പം ഇന്ന് വൈകിട്ട് 6 മണിക്കാണ് നെഞ്ചിനകത്ത് റിലീസ് ചെയ്യുന്നത്. അതിനും സപ്പോര്‍ട്ട് ഉണ്ടാവണം.. ഡിജോ ജോസ് ആന്റണി എന്നുമാണ് സംവിധായകന്‍ പറഞ്ഞിരിക്കുന്നത്.