വലിയ ഇടവേളയ്ക്ക് ശേഷം ഉദ്​ഘാടകനായി ദിലീപ് പൊതുവേദിയിലേക്ക്, ആശംസകൾ നേർന്ന് ആരാധകരും!

പഞ്ചാബി ഹൗസ്, പാണ്ടിപ്പട, ചൈന ടൗൺ, തെങ്കാശിപ്പട്ടണം, റിങ് മാസ്റ്റർ എന്നിവയ്ക്ക് ശേഷം ദിലീപും റാഫിയും ഒന്നിക്കുന്ന ചിത്രമാണ് വോയിസ് ഓഫ് സത്യനാഥൻ. ഇരുവരും ഒന്നിച്ച ചിത്രങ്ങൾ എല്ലാം തന്നെ സൂപ്പർഹിറ്റുകൾ ആയിരുന്നു. ഹിറ്റ് കോമ്പോ വീണ്ടും ഒന്നിക്കുമ്പോൾ ചിരിയുടെ പൂരമാണ് പ്രേക്ഷകർ പ്രതീക്ഷിക്കുന്നത്.

ബാദുഷ സിനിമാസിന്റേയും ഗ്രാന്റ് പ്രൊഡക്ഷന്‍സിന്റേയും ബാനറിൽ എൻ.എം ബാദുഷ, ഷിനോയ് മാത്യു, ദിലീപ്, പ്രിജിൻ ജെ.പി എന്നിവർ ചേർന്നാണ് ചിത്രം നിർമ്മിക്കുന്നത്. റാഫി തന്നെയാണ് കഥ, തിരക്കഥ, സംഭാഷണം, സംവിധാനം എന്നിവ നിര്‍വഹിച്ചിരിക്കുന്നത്‌.

കഴിഞ്ഞ വർഷം ഒക്ടോബറിലാണ് വോയ്സ് ഓഫ് സത്യനാഥൻ എന്ന സിനിമയുടെ ചിത്രീകരണം തുടങ്ങിയത്. എന്നാൽ പിന്നീട് പലകാരണങ്ങൾ കൊണ്ട് ചിത്രീകരണം നിർത്തിവെക്കേണ്ടി വന്നു. ചിത്രത്തിൽ ജോജു ജോർജും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്.

സിദ്ധിഖ്, ജോണി ആന്റണി, വീണ നന്ദകുമാർ തുടങ്ങിയവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. ചിത്രത്തിന്റെ ഫസ്റ്റ് ലുക്ക് പോസ്റ്റർ ഏറെ ശ്രദ്ധ നേടിയിരുന്നു.

വിവാദങ്ങളിൽ ഉൾപ്പെട്ടതോടെ പൊതുവേദിയിൽ വളരെ വിരളമായി മാത്രമെ ദിലീപ് പ്രത്യക്ഷപ്പെടാറുള്ളു. കേരളത്തിൽ പ്രത്യേകിച്ചു. താര സംഘടനയുടെ പരിപാടികളിലോ ഉദ്ഘാടകനായോ ഒന്നും ദിലീപ് വരാതായിട്ട് നാളുകളായി.

ഇപ്പോഴിത വളരെ നാളുകൾക്ക് ശേഷം കൊച്ചിയിൽ ആരംഭിക്കാൻ പോകുന്ന പുതിയൊരു ഷോപ്പിന്റെ ഉദ്ഘാടനത്തിനായി ദിലീപ് സുഹൃത്ത് നാദിർഷയ്ക്കൊപ്പം എത്താൻ പോവുകയാണ്. ഇതുമായി ബന്ധപ്പെട്ടൊരു പരസ്യവും ഇപ്പോൾ സോഷ്യൽമീഡിയയിൽ വൈറലാകുന്നുണ്ട്.

പരസ്യ വീഡിയോ വൈറലായതോടെ നിരവധി ദിലീപ് ആരാധകരാണ് കമന്റുമായി എത്തുന്നത്. 'അങ്ങിനെ വലിയ ഇടവേളയ്ക്കു ശേഷം ദിലീപ് ഏട്ടൻ ഒരു പൊതു വേദിയിൽ, വരാൻ പറ്റില്ലെങ്കിലും ആശംസകളും പ്രാർഥനകളും നേരുന്നു' തുടങ്ങിയ കമന്റുകളാണ് ദിലീപ് ആരാധകർ വീഡിയോയ്ക്ക് താഴെ കുറിച്ചിരിക്കുന്നത്.

അടുത്തിടെ തെന്നിന്ത്യന്‍ താര സുന്ദരി തമന്ന ഭാട്ടിയ ദിലീപിനൊപ്പം മലയാളത്തിൽ അരങ്ങേറ്റം കുറിക്കുന്ന സിനിമയുടെ സ്വിച്ച് ഓൺ കർമ്മവും നടന്നിരുന്നു. ദിലീപിന്‍റെ 147-ാമത്തെ ചിത്രമാണിത്. രാമലീലയ്ക്ക് ശേഷം ദിലീപും അരുൺ ​ഗോപിയും ഒന്നിക്കുന്ന ചിത്രമെന്ന പ്രത്യേകതയും ഇതിനുണ്ട്.

ഉദയകൃഷ്ണയാണ് ചിത്രത്തിന് തിരക്കഥയൊരുക്കുന്നത്. ഒട്ടേറെ മാസ് ചിത്രങ്ങള്‍ക്ക് തിരക്കഥയൊരുക്കിയിട്ടുള്ള തിരക്കഥാകൃത്താണ് ഉദയകൃഷ്ണ. ചടങ്ങിന്റെ ചിത്രങ്ങളും വീഡിയോകളും സോഷ്യല്‍ മീഡിയയില്‍ വൈറലായി മാറിയിരുന്നു. കേശു ഈ വീടിന്റെ നാഥനാണ് ഏറ്റവും അവസാനം റിലീസ് ചെയ്ത ദിലീപ് ചിത്രം.