ദിലീപിന്റെ വിവാഹം രഹസ്യം, മഞ്ജുവാണ് വധുവെന്ന് അറിഞ്ഞപ്പോൾ ഞെട്ടി: മിമിക്രി താരം ഓർക്കുന്നു

ദിലീപിന്റെയും മഞ്ജു വാര്യരുടെയും വിവാഹം മലയാള സിനിമ ഇൻഡസ്ട്രിക്ക് ലഭിച്ച ഏറ്റവും വലിയ സർപ്രൈസുകളിൽ ഒന്നായിരുന്നു. മലയാളത്തിന്റെ ഏറ്റവും പ്രശസ്ത താര ജോഡികളായിരുന്ന ഇരുവരുടെയും പ്രണയം ഗോസിപ്പ് കോളങ്ങളിൽ ഇടം പിടിച്ചിരുന്നുവെങ്കിലും, ദിലീപും മഞ്ജുവും വിവാഹിതരാവുകയാണെന്ന് നടന്റെ അടുത്ത സുഹൃത്തുക്കൾ മാത്രമേ അറിഞ്ഞിരുന്നുള്ളു. ആലുവയിലെ ഒരു അമ്പലത്തിൽ വച്ച്, വെറും പത്തിൽ താഴെ അതിഥികളുടെ സാന്നിധ്യത്തിലാണ് താര വിവാഹം നടന്നത്.

കുറച്ചു കാലം മുൻപ് കേരള കൗമുദിക്ക് നൽകിയ അഭിമുഖത്തിൽ, മിമിക്രി താരം കണ്ണൻ സാഗർ ദിലീപിന്റെയും മഞ്ജുവിന്റെയും വിവാഹത്തെ കുറിച്ച് മനസ്സ് തുറന്നിരുന്നു. വിവാഹദിവസം തന്നെ മുൻ ദമ്പതികളോടൊപ്പം ഫോട്ടോ എടുക്കാൻ തനിക്ക് അവസരം ലഭിച്ചതിനെ കുറിച്ചും, അന്ന് നടൻ കൂടിയായ കണ്ണൻ തുറന്നു പറഞ്ഞു.

ദിലീപിന്റെ വിവാഹം അതിരാവിലെ, വധു മഞ്ഞുവെന്ന് അറിഞ്ഞപ്പോൾ ഞെട്ടി

നടനും മിമിക്രി ആർട്ടിസ്റ്റുമായ കണ്ണൻ സാഗർ കേരള കൗമുദിയോട് ഒരിക്കൽ ദിലീപിന്റെയും മഞ്ജു വാര്യരുടെയും വിവാഹത്തിന്റെ ചില രസകരമായ വിവരങ്ങൾ വെളിപ്പെടുത്തിയിരുന്നു. അതീവ രഹസ്യമായി നടന്ന താരവിവാഹത്തെ കുറിച്ച് ആദ്യം അറിഞ്ഞ ചിലരിൽ ഒരാളാണ് കണ്ണൻ. വിവാഹത്തിന്റെ അന്ന് കാലത്ത് ഏഴു മണിക്കാണ്, താൻ വിവരം അറിഞ്ഞതെന്നും, ദിലീപിന്റെ വധു മഞ്ജു വാര്യരാണെന്ന് അറിഞ്ഞപ്പോൾ ഞെട്ടിയെന്നും നടൻ പറഞ്ഞു.

Photo Credit: OneIndia

"ആലുവ ടാസ് ഓഡിറ്റോറിയത്തിൽ കൊച്ചിൻ സാഗറിന്റെ ബാനറിൽ 'അവ്വൈ ഷൺമുഖൻ' എന്ന കോമഡി നാടകത്തിന്റെ റിഹേഴ്‌സൽ ക്യാമ്പ് നടക്കുകയായിരുന്നു. ഓഡിറ്റോറിയത്തിൽ നിന്ന് അൽപ്പം അകലെയുള്ള ശ്രീകൃഷ്ണസ്വാമി ക്ഷേത്രത്തിൽ ഒരു ദിവസം രാവിലെ ഒരു വിവാഹം നടന്നു. ഒന്നും മനസ്സിലാകുന്നില്ലായിരുന്നു. പക്ഷെ, ആരുടെ വിവാഹമാണ് നടക്കുന്നതെന്ന് അറിയാൻ ആകാംക്ഷയുണ്ടായിരുന്നു. ഞാൻ നോക്കുമ്പോൾ കലാഭവൻ രാജൻ ഇടുക്കി മാസ്റ്റർ പോകാൻ ഒരുങ്ങുന്നു. എന്റെ ഓർമ്മയിൽ, രാവിലെ 7 മണിക്ക് മുമ്പ് അദ്ദേഹം ഒരുങ്ങുകയായിരുന്നു," കണ്ണൻ സാഗർ ഓർത്തെടുത്തു.

ഇത്രയും നേരത്ത എവിടേക്കാണ് പോകുന്നതെന്ന് കണ്ണൻ സാഗർ ചോദിച്ചപ്പോൾ, "നീ ആരോടും പറയരുത്, ഇന്ന് ദിലീപിന്റെ വിവാഹം നടക്കുന്നുണ്ട്, അതീവ രഹസ്യമായിട്ടാണ്" എന്നാണ് ഇടുക്കി രാജൻ മാസ്റ്റർ മറുപടി പറഞ്ഞത്. "അഭിക്ക് മാത്രമേ ഇതിനെക്കുറിച്ച് അറിയുമായിരുന്നുള്ളു. ഇപ്പൊ ഞാൻ അറിഞ്ഞതു കൊണ്ട് ഞാൻ അങ്ങോട്ട് പോവുകയാണ്. വളരെ കുറച്ചു പേർ മാത്രമേ ഉണ്ടാകൂ," മാസ്റ്റർ കണ്ണൻ സാഗറിനോട് പറഞ്ഞു. വധു ആരാണെന്ന് കണ്ണൻ ചോദിച്ചപ്പോഴാണ്, സല്ലാപം എന്ന സിനിമയിൽ അഭിനയിച്ച പെൺകുട്ടിയെയാണ് ദിലീപ് വിവാഹം കഴിക്കുന്നതെന്ന് ഇടുക്കി രാജൻ വെളിപ്പെടുത്തിയത്.

Photo Credit: OneIndia / IMDb

""ഞാൻ ഞെട്ടിപ്പോയി. മാസ്റ്റർ തിടുക്കത്തിൽ നടന്നു പോയി. രാത്രി മുഴുവൻ പരിശീലനം നടത്തി ക്ഷീണിതനായിരുന്നു ഞാൻ, അതുകൊണ്ട് ഞാൻ എഴുന്നേറ്റ ഉടനെയാണ് ഇതെല്ലാം സംഭവിച്ചത്. ഞാൻ അദ്ദേഹത്തോടൊപ്പം വന്നോട്ടെ എന്ന് ചോദിച്ചിരുന്നെങ്കിൽ അദ്ദേഹം ശരിയെന്ന് പറഞ്ഞേനെ. പക്ഷെ ഞാൻ ഒരുങ്ങി വരുമ്പോഴേക്ക് വിവാഹിതരായ ആളുകൾ സ്ഥലം വിട്ടിട്ടുണ്ടാകും," കണ്ണൻ സാഗർ പറഞ്ഞു. വിവാഹത്തിന് ശേഷം മാസ്റ്റർ വന്ന് കണ്ണനോട് എല്ലാം വിശദീകരിച്ചു. പത്ത് പേരിൽ താഴെ മാത്രമേ വിവാഹത്തിന് ഉണ്ടായിരുന്നുള്ളൂ. നാദിർഷയും ദിലീപിന്റെ ചില അടുത്ത സുഹൃത്തുക്കളും അവിടെ ഉണ്ടായിരുന്നു.

പിന്നീട് മറ്റ് മിമിക്രി താരങ്ങൾക്കൊപ്പം നവ ദമ്പതികളെ കാണാൻ കണ്ണൻ സാഗറിന് അവസരം ലഭിച്ചിരുന്നു. അന്ന് ദിലീപിന്റെ അടുത്ത സുഹൃത്തായ നടൻ അഭിയുടെ വീട്ടിലേക്ക് മഞ്ജുവിനെയും കൂട്ടി നടൻ എത്തിയപ്പോഴാണ് അത്. അന്ന് പ്രശസ്ത താരങ്ങൾക്കൊപ്പം, ഇന്നത്തെ തിരക്കുള്ള നടൻ ആയ ഷെയിൻ നിഗമിനെയും എടുത്തു എല്ലാവരും ഫോട്ടോയ്ക്ക് പോസ് ചെയ്തതായും കണ്ണൻ ഓർത്തെടുത്തു.