സേതുരാമയ്യറിൽ മമ്മൂട്ടിക്കൊപ്പം പുതിയ ടീം, നാലു ഭാഗങ്ങളിൽ ഉണ്ടായിരുന്ന ഒരാൾ കൂടി ചിത്രത്തിലുണ്ടാവും

ഇപ്പോഴിത സിനിമയെ കുറിച്ച് മനസ് തുറക്കുകയാണ് സംവിധായകൻ മധു. ട്രെൻഡുകൾക്കും അപ്പുറം നിൽക്കുന്ന കഥാപാത്രവുമൊത്ത് ഒന്നര പതിറ്റാണ്ടിനു ശേഷം വീണ്ടുമെത്തുമ്പോൾ സന്തോഷം തോന്നുന്നു എന്നാണ് സംവിധായകൻ പറയുന്നത്. മനോരമ ഓൺലൈന് നൽകിയ അഭിമുഖത്തിലാണ് സേതുരാമയ്യരുടെ മടങ്ങി വരവിനെ കുറിച്ച് പറയുന്നത്. 'മമ്മൂട്ടിയെപ്പോലെ തന്നെയാണ് സേതുരാമയ്യരും. കാലാതീതമാണ് ഈ രണ്ട് പ്രതിഭാസങ്ങളും. മലയാളികളുടെ മനസ്സിൽ ചിരപ്രതിഷ്ഠ നേടിയ കഥാപാത്രങ്ങളിലൊന്നാണ് സേതുരാമയ്യർ. ട്രെൻഡുകൾക്കും അപ്പുറം നിൽക്കുന്ന ഈ കഥാപാത്രവുമൊത്ത് ഒന്നര പതിറ്റാണ്ടിനു ശേഷം വീണ്ടുമെത്തുമ്പോൾ നിറഞ്ഞ സന്തോഷം തോന്നുന്നു. ഒരു സിനിമയുടെ അഞ്ച് ഭാഗങ്ങളിലും സംവിധായകനും നായകനും തിരക്കഥാകൃത്തും ഒരേ ആളുകളായി തുടരുന്നത് സിനിമാ ചരിത്രത്തിൽ തന്നെ അപൂർവമായി സംഭവിക്കുന്നതാണെന്നാണ് അദ്ദേഹം പറയുന്നത്.

മമ്മൂട്ടിക്കൊപ്പം , സിബിഐ അഞ്ചാം ഭാഗത്തിൽ എത്തുന്ന താരങ്ങളെ കുറിച്ചും സംവിധായകൻ പറയുന്നുണ്ട്. മുകേഷ് തന്നെയാണ് അഞ്ചാം ഭാഗത്തും ചാക്കോയായി എത്തുന്നത്. ഒപ്പം ഒരു പുതിയ ടീം ഉണ്ടാകുമെന്നും അദ്ദേഹം പറയുന്നു. രൺജി പണിക്കർ, അനൂപ് മേനോൻ, സായികുമാർ, സൗബിൻ ഷാഹിർ, ദിലീഷ് പോത്തൻ, പ്രശാന്ത് അലക്സാണ്ടർ, രമേശ് പിഷാരടി, ജയകൃഷ്ണൻ, സുദേവ് നായർ, അസീസ് നെടുമങ്ങാട്, സന്തോഷ് കീഴാറ്റൂർ, ഇടവേള ബാബു, കോട്ടയം രമേശ്, മുകേഷ്, സുരേഷ് കുമാർ, തന്തൂർ കൃഷ്ണൻ, ആശാ ശരത്ത്, അന്നാ രേഷ്മ രാജൻ, അൻസിബ ഹസൻ, മാളവിക മേനോൻ, മാളവിക നായർ, സ്വാസിക എന്നിവരാണ് മറ്റ് താരങ്ങൾ.

സംവിധായകൻ, നായകൻ, തിരക്കഥാകൃത്ത് എന്നിവരല്ലാതെ സിബിഐ നാലു ഭാഗങ്ങളിലും ഉണ്ടായിരുന്ന മറ്റൊരാൾ കൂടി അഞ്ചാം ഭാഗത്തിലും ഉണ്ടാവുമെന്നും മധു പറയുന്നു. പ്രൊഡക്‌ഷൻ ഡിസൈനർ അരോമ മോഹൻ. നിരവധി ചിത്രങ്ങളിൽ ഞാനും മോഹനും ഒരുമിച്ച് പ്രവർത്തിച്ചിട്ടുണ്ട്. എന്റെ മനസ്സറിഞ്ഞ് മോഹൻ പ്രവർത്തിക്കും. ഞങ്ങളുടേത് ഒരേ മനസ്സാണ്- നിർമാതാവിന് അധികച്ചെലവ് ഉണ്ടാക്കാതെ ചിത്രം പൂർത്തീകരിക്കുക. എറണാകുളം, ഹൈദരാബാദ്, ഡൽഹി എന്നിവടങ്ങളിലായി ഒറ്റ ഷെ‍ഡ്യൂളില്‍ ഷൂട്ടിങ് പൂർത്തിയാക്കും. ശ്രീകർ പ്രസാദ് ആണ്. ചിത്രത്തിന്റെ എഡിറ്റിംഗ് നിർവഹിക്കുന്നത്. സംഗീത സംവിധാനം -ജേക്സ് ബിജോയി. ഛായാഗ്രഹണം- അഖിൽ ജോർജ് ആണ്.

Recommended Video

Sreesanth act as a CBI officer in a Bollywood movie | FilmiBeat Malayalam

ഒരു സിനിമയുടെ രണ്ടു ഭാഗങ്ങൾ റിലീസ് ചെയ്യുന്നത് പതിവാണ്. എന്നാൽ സിബിഐ സീരിസിന്റെ മൂന്നും നാലും ഭാഗങ്ങൾ ഇറങ്ങി. അതെല്ലാം സൂപ്പർഹിറ്റുകളായി. അതിൽ പ്രേക്ഷകർക്കും വലിയ പങ്കുണ്ട്. കഴിഞ്ഞ നാലു ഭാഗങ്ങളിലും പ്രേക്ഷകർ ഏല്‍പിച്ച ഉത്തരവാദിത്തം പരിപൂർണമായി ഉൾക്കൊണ്ട് തന്നെ അഞ്ചാം ഭാഗവും എത്തിക്കും. നിങ്ങളുടെ അനുഗ്രഹവും ആശീർവാദവും ഞങ്ങളുടെ കൂടെ ഉണ്ടാകണമെന്നും സംവിധായകൻ അഭിമുഖത്തിൽ പറയുന്നു..