'അതിനുശേഷം ഫഹദിന്റെ ഫാനാണ് ഞാൻ, ദുൽഖറിനെ കാണുമ്പോൾ വീട്ടിലുള്ള ആളെപ്പോലെ തോന്നും'; സത്യൻ അന്തിക്കാട്

ജയറാമിനും മീരയ്ക്കുമൊപ്പം ദേവിക സഞ്ജയ്, ശ്രീനിവാസന്‍, സിദ്ദിഖ്, നസ്‍ലെന്‍, ഇന്നസെന്‍റ്, അല്‍ത്താഫ് സലിം, ജയശങ്കര്‍, ഡയാന ഹമീദ്, മീര നായര്‍, ശ്രീധന്യ, നില്‍ജ ബേബി, ബാലാജി മനോഹര്‍ തുടങ്ങിയവരാണ് മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്.

സെന്‍ട്രല്‍ പ്രൊഡക്ഷന്‍സ് നിര്‍മ്മിച്ചിരിക്കുന്ന ചിത്രത്തിന്‍റെ തിരക്കഥ ഡോ. ഖ്ബാല്‍ കുറ്റിപ്പുറത്തിന്‍റേതാണ്. 2018ല്‍ പുറത്തെത്തിയ ഞാന്‍ പ്രകാശനാണ് സത്യൻ അന്തിക്കാടിന്റെ സംവിധാനത്തില്‍ പുറത്തെത്തിയ അവസാന ചിത്രം.

സംവിധായകനാകും മുമ്പ് സത്യൻ അന്തിക്കാട് കൈവെച്ചത് ​ഗാനരചനയിലായിരുന്നു. ഗാനരചയിതാവ് എന്ന നിലയില്‍ പേരെടുത്തപ്പോഴും സംവിധായകനാവുക എന്ന മോഹം സത്യന്‍ ഉപേക്ഷിച്ചില്ല. ഉപേക്ഷിച്ചിരുന്നെങ്കില്‍ ഏറ്റവുമധികം വിജയങ്ങള്‍ നേടിയ ഒരു സംവിധായകനെ മലയാളത്തിന് നഷ്ടമായേനെ.

കിന്നാരം, കുറുക്കന്‍റെ കല്യാണം, ടി.പി. ബാലഗോപാലന്‍ എം.എ, സന്‍മനസുള്ളവര്‍ക്ക് സമാധാനം, ഗാന്ധിനഗര്‍ സെക്കന്‍ഡ് സ്ട്രീറ്റ്, നാടോടിക്കാറ്റ്, കുടുംബപുരാണം, പൊന്‍മുട്ടയിടുന്ന താറാവ്, തലയണമന്ത്രം, സസ്നേഹം, സന്ദേശം, മഴവില്‍ക്കാവടി, ഗോളാന്തരവാര്‍ത്ത, ഇരട്ടക്കുട്ടികളുടെ അച്ഛന്‍, വീണ്ടും ചില വീട്ടുകാര്യങ്ങള്‍, കൊച്ചു കൊച്ചു സന്തോഷങ്ങള്‍, നരേന്ദ്രന്‍ മകന്‍ ജയകാന്തന്‍ വക തുടങ്ങി നീണ്ടുകിടക്കുന്ന സിനിമകളുടെ പട്ടികയാണ് സത്യൻ അന്തിക്കാടിനെ മലയാള സിനിമയിലെ അവിഭാജ്യ ഘടകമാക്കി മാറ്റിയത്.

മലയാളത്തിൽ തിളങ്ങി നിൽക്കുന്ന ഒട്ടനവധി പ്രതിഭകൾക്കൊപ്പം പ്രവർത്തിച്ചിട്ടുള്ള സത്യൻ മലയാള സിനിമയിലെ യുവ തലമുറെയ കുറിച്ച് പറഞ്ഞ വാക്കുകളാണ് വൈറലാകുന്നത്.

എല്ലാ യുവതാരങ്ങളും പലതരത്തിലാണ് മികച്ച് നിൽക്കുന്നതെന്നാണ് കൗമുദി മൂവീസിന് നൽകിയ അഭിമുഖത്തിൽ സത്യന്‍ അന്തിക്കാട് പറഞ്ഞത്.

'പുതിയ തലമുറയില്‍ എല്ലാവരും നല്ല അഭിനേതാക്കളാണ്. അത് പല തലത്തിലാണ്. ജോമോന്റെ സുവിശേഷങ്ങളില്‍ ദുല്‍ഖറിന്റെ ചില രംഗങ്ങളെടുക്കുമ്പോള്‍ നമ്മുടെ വീട്ടിലെ ഒരു ചെറുപ്പക്കാരന്‍ ചെയ്യുന്നത് പോലെ തോന്നും.'

'ഞാന്‍ പ്രകാശനും ഇന്ത്യന്‍ പ്രണയകഥയും ഷൂട്ട് ചെയ്യുന്ന സമയത്ത് ഞാന്‍ ഫഹദിന്റെ ഫാന്‍ ആയി മാറി. ഫഹദിന് കഥാപാത്രത്തെ ഉൾക്കൊള്ളാനുള്ള കഴിവാണ് അത്ഭുതപ്പെടുത്തിയത്.'

'സ്ക്രീൻ പ്രസൻസ് കൊണ്ടാണ് ഫഹദ് അത്ഭുതപ്പെടുത്തുന്നത്. അത് ഫഹദിന് കിട്ടിയ അനു​ഗ്രഹമാണ്. നിവിനും ടൊവിനോയുമടക്കം യുവതാരങ്ങളെല്ലാം വിവിധ മേഖലകളിലാണ് കഴിവ് തെളിയിക്കുന്നത്. അതിനാൽ‌ ഇവരെ താരതമ്യം ചെയ്ത് മികച്ചത് കണ്ടെത്തുക സാധ്യമല്ല' സത്യൻ അന്തിക്കാട് പറഞ്ഞു.