'എന്റെ ആൺമക്കൾ വീട്ടിലെ എല്ലാ ജോലിയും ചെയ്യും, ഞാനും അടുക്കളയിൽ കയറും'; പരിഹസിക്കുന്നവരോട് ഷാജി കൈലാസ്

ഷാജി കൈലാസിന്റെ സിനിമകൾപ്പോലെ തന്നെ മലയാളികൾക്ക് സുപരിചിതമാണ് അദ്ദേഹത്തിന്റെ കുടുംബവും. നടിയും അവതാരികയുമായ ആനിയെയാണ് ഷാജി കൈലാസ് വിവാ​ഹം ചെയ്തത്.

താരദമ്പതികൾക്ക് മൂന്ന് ആൺമക്കളുമുണ്ട്. ഷാജി കൈലാസ് സിനിമകൾ കാലം മാറിയപ്പോൾ വളരെ അധികം ചർച്ചകൾക്ക് വിധേയമാക്കപ്പെട്ട ഒന്നാണ്.

കാരണം അദ്ദേഹത്തിന്റെ സിനിമകളിലെ ആൺകോയ്മയും സ്ത്രീകളെ പരിഹസിക്കുന്ന ഡയലോ​​ഗുകളുമായിരുന്നു.

വർഷങ്ങൾക്കിപ്പുറം തന്റെ സിനിമകൾ കീറിമുറിച്ച് പരിശോധിക്കുന്നവർക്കുള്ള മറുപടി നൽകിയിരിക്കുകയാണ് ഷാജി കൈലാസ് ഇപ്പോൾ. വനിത മാ​ഗസീനിന് നൽകിയ അഭിമുഖത്തിലാണ് അദ്ദേഹം മനസ് തുറന്നത്.

'നിങ്ങൾ സിനിമയെ സിനിമയായി കാണൂ. അത് എന്‍റർടെയ്നറാണ്. അതാണോ ജീവിതം?. നരസിംഹം സംവിധാനം ചെയ്തതു കൊണ്ട് ഞാൻ അടുക്കളയിൽ കയറില്ലെന്ന് പറയാനാവുമോ?.'

'എന്റെ മൂന്ന് ആൺമക്കളും വീട്ടിലെ എല്ലാ ജോലിയും ചെയ്യും. പെൺകുട്ടികൾ മാത്രമാണ് അടുക്കളയിൽ കയറണ്ടത് എന്നൊന്നും ഞാനും ചിത്രയും അവരെ പഠിപ്പിച്ചിട്ടില്ല. ജീവിതത്തിലെ എല്ലാ പ്രതിസന്ധിയും അറിയിച്ച് തന്നെയാണ് വളർത്തിയിരിക്കുന്നത്.'

'എന്ത് വാങ്ങുമ്പോഴും ബ്രാൻഡ് മാത്രമല്ല പ്രൈസ് ടാഗും കൂടി അവർ‌ നോക്കാറുണ്ട്. രൺ‌ജി പണിക്കരുമായി ചേർന്ന് ഭാവിയിൽ ചിലപ്പോൾ സിനിമകൾ സംഭവിച്ചേക്കാം. ഞാൻ ദൈവവിശ്വാസിയാണ്.'

'എല്ലാം ദൈവത്തിന് വിട്ടുകൊടുത്തു. കർമ്മം ചെയ്യുക മാത്രമാണ്. അമിതമായ ആഗ്രഹങ്ങളൊന്നുമില്ല. ഇത്രയും നാൾ വീട്ടിലിരുന്നില്ലേ? ഇനി സിനിമയിലേക്ക് വീണ്ടും പോരൂ എന്ന് പറഞ്ഞ് കൈ പിടിച്ച് കൊണ്ടുവന്നതായാണ് എനിക്ക് തോന്നിയത്.'

'എലോൺ തന്നെ അങ്ങനെയുണ്ടായ സിനിമയാണ്. കൊവിഡ് കാലത്ത് എല്ലാവരും വീട്ടിലിരുന്നപ്പോൾ ലാൽസാർ തന്ന സിനിമ. വെറും ഇരുപതു ദിവസം കൊണ്ടാണതുണ്ടായത്.'

Recommended Video

Shaji Kailas Kaduva Interview | ഷാജി കൈലാസിന്റെ അടുത്ത കടുവ മമ്മൂട്ടിയോ | *Interview

'കൊവിഡ് കാരണം സാമ്പത്തികമായി എല്ലാവരും തളർന്ന് പോയപ്പോൾ ആ സിനിമ ഒരുപാട് പേർക്ക് കൈത്താങ്ങായി' ഷാജി കൈലാസ് പറയുന്നു. മുമ്പ് നടി ആനി പെൺകുട്ടികളെ കുറിച്ച് നടത്തിയ ചില പ്രസ്താവനകൾ വൈറലായിരുന്നു.

ശേഷം കടുവ ഇറങ്ങിയപ്പോൾ അതിലെ ഒരു രം​ഗവും ഏറെ ചർച്ച ചെയ്യപ്പെട്ടിരുന്നു. ഭിന്നശേഷി കുട്ടികളെ തരംതാഴ്ത്തുന്ന തരത്തിലുള്ള ഡയലോ​ഗുകൾ കടുവയിലെ ചില സീനിലുണ്ടായിരുന്നുവെന്നതായിരുന്ന വിവാ​ദത്തിന് കാരണമായത്.

സംഭവം വലിയ ചർച്ചയിലേക്ക് നീങ്ങിയപ്പോൾ സംവിധായകൻ ഷാജി കൈലാസും നായകൻ പൃഥ്വിരാജും ക്ഷമ ചോദിച്ചിരുന്നു.