തിലകന്‍ ആ വാക്ക് പറയില്ലെന്ന് വാശിപിടിച്ചു, ഞങ്ങള്‍ തമ്മില്‍ തര്‍ക്കത്തിലായി, അനുഭവം പറഞ്ഞ് സംവിധായകന്‍

അതേസമയം തിലകനൊപ്പമുളള ഒരു രസകരമായ അനുഭവം പങ്കുവെക്കുകയാണ് സംവിധായകന്‍ തുളസീദാസ്. മാസ്റ്റര്‍ ബിന്‍ ചാനലിന് നല്‍കിയ അഭിമുഖത്തിലാണ് തുളസീദാസ് മനസുതുറന്നത്. തുളസീദാസ് സംവിധാനം ചെയ്ത സിനിമകളില്‍ പ്രധാന വേഷങ്ങളില്‍ തിലകന്‍ അഭിനയിച്ചിട്ടുണ്ട്. 1995ലാണ് ഈ കൂട്ടുകെട്ടില്‍ മിന്നാമിനുങ്ങിനും മിന്നുകെട്ട് എന്ന ചിത്രം പുറത്തിറങ്ങുന്നത്. ജയറാം നായകനായ സിനിമയില്‍ തിലകന്‍, ശോഭന, ജഗദീഷ്, കവിയൂര്‍ പൊന്നമ്മ ഉള്‍പ്പെടെയുളള താരങ്ങളാണ് പ്രധാന വേഷങ്ങളില്‍ എത്തിയത്.

കുടുംബ പശ്ചാത്തലത്തിലുളള കഥ പറഞ്ഞ സിനിമ ഏറെ ശ്രദ്ധിക്കപ്പെട്ടിരുന്നു. ചിത്രത്തില്‍ എംകെ മേനോന്‍ എന്ന കഥാപാത്രത്തെയാണ് തിലകന്‍ അവതരിപ്പിച്ചത്. ജയന്‍ മേനോന്‍ എന്ന കഥാപാത്രമായി ജയറാമും എത്തി. ജയറാമും തിലകനും ഒരുമിച്ചുളള ഒരു സീനിനിടെ നടന്ന സംഭവമാണ് തുളസീദാസ് അഭിമുഖത്തില്‍ പങ്കുവെച്ചത്. എന്റെ ആദ്യ സിനിമയില്‍ തന്നെ തിലകന്‍ ചേട്ടന്‍ അഭിനയിച്ചിട്ടുണ്ട് എന്ന് തുളസീദാസ് പറയുന്നു.

അതിന് മുന്‍പ് തന്നെ അദ്ദേഹത്തെ പരിചയപ്പെട്ടിട്ടുണ്ട്. അങ്ങനെ നല്ല അടുപ്പം തിലകന്‍ ചേട്ടനുമായി ഉണ്ട്. മിന്നാമിനുങ്ങിനും മിന്നുകെട്ട് സിനിമയുടെ ഒരു പ്രധാനപ്പെട്ട സീന്‍ എടുക്കുകയാണ്. ആ സീനില്‍ എല്ലാവരുമുണ്ട്. അതില്‍ തിലകന്‍ ചേട്ടന്‍ ജയറാമിനെ നോക്കി പറയുന്ന ഒരു ഡയലോഗുണ്ട്; 'നീ എന്നോട് ഇത് ചെയ്യുമെന്ന് കരുതിയില്ല എന്ന്'.

അന്ന് തിലകന്‍ ചേട്ടന്‍ ആ 'നീ' അങ്ങ് കട്ട് ചെയ്യാന്‍ അസോസിയേറ്റിനോട് പറഞ്ഞു. ;എന്നോട് ഇത് ചെയ്യുമെന്ന് കരുതിയില്ല; എന്ന് പോരെ എന്ന് പറഞ്ഞു. എന്നാല്‍ റിഹേഴ്‌സല്‍ സമയത്തൊക്കെ ഈ 'നീ' വെച്ചാണ് ഡയലോഗ് പറഞ്ഞത്. എന്നാല്‍ ടേക്ക് എടുത്തപ്പോ കണ്ടില്ല. ഞാന്‍ തിലകന്‍ ചേട്ടനോട് ആ നീ എന്തായാലും വേണമെന്ന് പറഞ്ഞു. എന്നാല്‍ 'അത് ആവശ്യമില്ല, ഞാന്‍ വിരല് ചൂണ്ടുന്നണ്ടല്ലോ എന്നായിരുന്നു തിലകന്‍ ചേട്ടന്‍റെ മറുപടി.

എന്നാല്‍ ഞാന്‍ അത് സമ്മതിച്ചില്ല. നീ വേണമെന്ന് തന്നെ പറഞ്ഞു, തുളസീദാസ് പറയുന്നു. അങ്ങനെ തിലകന്‍ ചേട്ടനും ഞാനും തര്‍ക്കമായി. ഒരു മണിക്കൂറോളം തര്‍ക്കം തുടര്‍ന്നു. ചിത്രീകരണത്തിനിടെ ബ്രേക്ക് വന്നു,. ജയറാമൊക്കെ ഇത് കണ്ട് ചിരിക്കുകയാണ്. പിന്നെ തിലകന്‍ ചേട്ടന്‍ ജയറാമിന്‌റെ അടുത്ത് വന്ന് പറഞ്ഞു; ജയറാമേ ഞാന്‍ ആ നീ പറയാം, പക്ഷേ നീ എന്റെയടുത്ത് വന്ന് സൂക്ഷിച്ചുനോക്കണം എന്ന്. ജയറാം പൊട്ടിച്ചിരിച്ചുപോയി.

കാരണം തിലകന്‍ ചേട്ടന് ഒരു ചമ്മലുണ്ടായിരുന്നു. അനാവശ്യമായി വാശിപിടിച്ചത് കൊണ്ട്. അത് ആവശ്യമാണെന്ന് പുളളിക്ക് മനസിലായി. എന്നാല്‍ അതൊരു സഹോദര സ്‌നേഹത്തിലുളള വാശി ആയിരുന്നു എന്ന് തുളസീദാസ് പറയുന്നു. ഞാനും തിലകന്‍ ചേട്ടനും അന്ന് കുറെ പിണങ്ങിയിട്ടുണ്ട്. എന്നാല്‍ അപ്പോഴൊക്കെ പിണക്കം മാറിയിട്ടുമുണ്ട്. അഭിമുഖത്തില്‍ സംവിധായകന്‍ ഓര്‍ത്തെടുത്തു.

മിന്നാമിനുങ്ങിന് മിന്നുകെട്ട് ചിത്രത്തിന് പുറമെ നിരവധി സിനിമകളില്‍ തിലകനും ജയറാമും ഒരുമിച്ച് അഭിനയിച്ചിട്ടുണ്ട്. സത്യന്‍ അന്തിക്കാട് സംവിധാനം ചെയ്ത വീണ്ടും ചില വീട്ടുകാര്യങ്ങള്‍ ഈ കൂട്ടുകെട്ടില്‍ ഏറെ ശ്രദ്ധിക്കപ്പെട്ട ചിത്രമാണ്. അച്ഛനും മകനുമായി തന്നെയാണ് ഈ സിനിമയിലും തിലകനും ജയറാമും എത്തിയത്. കൂടാതെ സത്യന്‍ അന്തിക്കാടിന്‌റെ തന്നെ സന്ദേശത്തിലും അച്ഛനും മകനുമായി തിലകനും ജയറാമും എത്തി. ശ്രീനിവാസനും പ്രധാന വേഷത്തില്‍ എത്തിയ സിനിമ തിയ്യേറ്ററുകളില്‍ വിജയം നേടി.

Recommended Video

അറിയണം തിലകന്‍ എന്ന അതുല്യ പ്രതിഭയെ | FilmiBeat Malayalam

മൂന്നാംപക്കം, ബന്ധുക്കള്‍ ശത്രുക്കള്‍, നഗരങ്ങളില്‍ ചെന്ന് രാപ്പാര്‍ക്കാം, ജോര്‍ജജ്ജ്കുട്ടി കെയര്‍ ഓഫ് ജോര്‍ജ്ജ്കുട്ടി ഉള്‍പ്പെടെ നിരവധി സിനിമകള്‍ ജയറാം-തിലകന്‍ ടീമിന്‌റെതായി മലയാളത്തില്‍ പുറത്തിറങ്ങി. കാരക്ടര്‍ റോളുകളിലായിരുന്നു തിലകന്‍ മലയാളത്തില്‍ കൂടുതല്‍ തിളങ്ങിയത്. കിരീടം, കൗരവര്‍ ഉള്‍പ്പെടെയുളള സിനിമകളില്‍ എല്ലാം നടന്‍ ചെയ്ത വേഷങ്ങള്‍ ഏറെ ശ്രദ്ധിക്കപ്പെട്ടു. 2012ല്‍ പുറത്തിറങ്ങിയ അഞ്ജലി മേനോന്‍ ചിത്രം ഉസ്താദ് ഹോട്ടലിലെ നടന്റെ റോളും മികച്ച പ്രേക്ഷക പ്രശംസകള്‍ ലഭിച്ച കഥാപാത്രമാണ്. ഉസ്താദ് ഹോട്ടലിലെ കരീം ഇക്ക ഏറെക്കാലത്തിന് ശേഷം തിലകന് ലഭിച്ച മികച്ച കഥാപാത്രങ്ങളില്‍ ഒന്നായി മാറി. ബാങ്കിള്‍സ് എന്ന ചിത്രമാണ് തിലകന്‌റെതായി അവസാനമായി പുറത്തിറങ്ങിയത്. മൂന്ന് ദേശീയ പുരസ്‌കാരങ്ങളും 11 സംസ്ഥാന പുരസ്‌കാരങ്ങളും തിലകന്‍ കരിയറില്‍ നേടി.