മറിയത്തെ നെഞ്ചോട് ചേര്‍ത്ത് പിടിച്ച് ദുല്‍ഖര്‍ പറയുന്നു, മമ്മൂട്ടിയാണ് ലോകത്തിലെ ഏറ്റവും നല്ല അച്ഛൻ

ദുല്‍ഖറിന്റെ കുടുംബം

താരരാജാവ് മമ്മൂട്ടിയുടെ പാത പിന്തുടര്‍ന്ന് സിനിമയിലേക്കെത്തിയ ദുല്‍ഖര്‍ സല്‍മാന്‍ ഇന്ന് ഇന്ത്യയില്‍ അറിയപ്പെടുന്ന പ്രമുഖതാരമായി മാറി. ദുല്‍ഖറിന്റെ വളര്‍ച്ച അതിവേഗമായിരുന്നു. ഇപ്പോള്‍ ബോളിവുഡിലടക്കം സജീവമായി താരം അഭിനയിച്ച് കൊണ്ടിരിക്കുകയാണ്. സിനിമയിലെത്തുന്നതിന് മുന്‍പായിരുന്നു ദുല്‍ഖറിന്റെ വിവാഹം നടന്നത്. 2011 ല്‍ അമാല്‍ സൂഫിയ ദുല്‍ഖറിന്റെ ഭാര്യയായി എത്തുകയും 2017 ല്‍ ഇരുവര്‍ക്കും ഒരു പെണ്‍കുഞ്ഞ് പിറക്കുകയും ചെയ്തിരുന്നു.

രാജകുമാരിയുടെ വരവ്...

2017 മേയ് അഞ്ചിനായിരുന്നു ദുല്‍ഖര്‍ സല്‍മാന്റെ രാജകുമാരി പിറന്നത്. മറിയം അമീറ സല്‍മാന്‍ എന്നായിരുന്നു കുഞ്ഞിന് ദുല്‍ഖര്‍ പേരിട്ടത്. കഴിഞ്ഞ മാസം മറിയം ഒന്നാം പിറന്നാള്‍ ആഘോഷിക്കുകയും ചെയ്തിരുന്നു. ജനിച്ചപ്പോള്‍ മുതല്‍ മറിയവും ഒരു സെലിബ്രിറ്റി ആണ്. ദുല്‍ഖറിന്റെ കുഞ്ഞിനൊപ്പമുള്ള ചിത്രങ്ങള്‍ പുറത്ത് വന്നാല്‍ ഉടനനടി സോഷ്യല്‍ മീഡിയ വഴി വൈറലാവുന്നത് പതിവായിരുന്നു. പിറന്നാള്‍ ആശംസകള്‍ അറിയിച്ചതും ആഘോഷങ്ങളുടെ ചിത്രങ്ങളുമെല്ലാം ആരാധകര്‍ ഏറ്റെടുത്തിരുന്നു.

മറിയത്തെ കുറിച്ച് ദുല്‍ഖര്‍ പറയുന്നത്...

രാത്രി ഒരുപാട് വൈകിയാണ് ഫാദേഴ്‌സ് ഡേ യില്‍ പോസ്റ്റുമായി ദുല്‍ഖര്‍ എത്തിയത്. ഫാദേഴ്‌സ് ഡേ യില്‍ ആശംസിക്കപ്പെടുകയെന്നത് വലിയൊരു അനുഗ്രഹമാണ്. വാക്കുകള്‍ കൊണ്ട് അതിനെ നിര്‍വചിക്കാന്‍ കഴില്ല. നീ ജനിച്ച ദിവസം ഞാന്‍ ഒന്ന് കൂടി ജനിച്ചു എന്ന് വേണമെങ്കില്‍ പറയാം. എല്ലാകാലത്തും ഈ സ്‌നേഹം അങ്ങനെയായിരിക്കും. എത്ര വളര്‍ന്നാലും എവിടേക്ക് പോയാലും നീ എന്നും എന്റെ കൊച്ചു മകള്‍ തന്നെയായിരിക്കും. പ്രതീക്ഷിച്ചതിലുംഒരുപാട് സന്തോഷം നീ കൊണ്ട് വന്നിരുന്നു. ഓരോ ദിവസം കഴിയുംതോറും സ്‌നേഹം വളര്‍ന്ന് കൊണ്ടിരിക്കുകയാണെന്നുമാണ് മറിയത്തെ കുറിച്ച് ദുല്‍ഖര്‍ പറയുന്നത്. യാത്രയ്ക്കിടെ മറിയത്തെ നെഞ്ചോട് ചേര്‍ത്ത് പിടിച്ചിരിക്കുന്ന ചിത്രവും ഇതിനൊപ്പം ദുല്‍ഖര്‍ പങ്കുവെച്ചിട്ടുണ്ട്. ചിത്രത്തിന്റെ ക്രെഡിറ്റ് മറിയത്തിന്റെ സ്‌നേഹനിധിയായ അമ്മയ്ക്കാണ്..

മമ്മൂട്ടിയെ കുറിച്ച്..

ലോകത്തിലെ ഏറ്റവും നല്ല അച്ഛന്‍ എന്നാണ് മമ്മൂട്ടിയെ ദുല്‍ഖര്‍ വിശേഷിപ്പിച്ചിരിക്കുന്നത്. എന്നും മാതൃകയായിരുന്നു. എന്തൊക്കെ ചെയ്യണം എന്ന് എന്നോട് ഒരിക്കലും പറഞ്ഞിട്ടില്ല. എന്റെ ജീവിതകാലം മുഴുവന്‍ നിങ്ങളെന്റെ സംരക്ഷകനായിരുന്നു. എന്റെ ചെറുപ്പകാലത്ത് അതെനിക്ക് മനസിലായിരുന്നില്ല. എന്നാല്‍ മറിയം വന്നതിന് ശേഷം അതെനിക്ക് മനസിലാകുന്നുണ്ട്. നിങ്ങളിലെ അച്ഛന്റെ മാതൃകയുടെ പകുതിയെങ്കിലും ആകാന്‍ കഴിയണമേ എന്നാണ് ഞാനിപ്പോള്‍ പ്രതീക്ഷിക്കുന്നതും പ്രാര്‍ത്ഥിക്കുന്നതും. ഹാപ്പി ഫാദേഴ്‌സ് ഡേ!