'അധികാരം കിട്ടുമ്പോൾ ചിലർ അതിൽ മേയും, ഓടാൻ സാധ്യതയുള്ള പടങ്ങൾ ഇടവേള ബാബു പിടിച്ച് വെക്കും'; മണിയൻപിള്ള രാജു

എന്നാ‌ൽ‌ ആരോ​ഗ്യപരമായ വിമർശനങ്ങൾ കേൾക്കുമ്പോൾ അത് സ്വീകരിക്കാൻ തയ്യാറാവാതെ കൊറിയയിൽ സിനിമയെ ആരും വിമർശിക്കാറില്ലെന്ന ന്യായങ്ങൾ പറഞ്ഞ് പ്രേക്ഷകരോട് ചില സിനിമാക്കാർ അമർഷം പ്രകടിപ്പിക്കാറുമുണ്ട്.

അടുത്തിടെ പുറത്തിറങ്ങിയ സിനിമകളിൽ വ്യത്യസ്തമായൊരു ട്രീറ്റ്മെന്റ് സമ്മാനിച്ച സിനിമയായിരുന്നു വിനീത് ശ്രീനിവാസൻ നായകനായ മുകുന്ദനുണ്ണി അസോസിയേറ്റ്സ്. ഡാർക്ക് കോമഡിയായിരുന്നു സിനിമയുടെ പശ്ചാത്തലം.

ഒരു സിനിമയെന്ന രീതിയിൽ വളരെ പുതുമയുള്ള അനുഭവമായിരുന്നു മുകുന്ദനുണ്ണി അസോസിയേറ്റ്സ് എന്നായിരുന്നു സിനിമ കണ്ട പ്രേക്ഷകരിൽ ഏറെപ്പേരും പറഞ്ഞത്. എന്നാൽ കഴിഞ്ഞ ദിവസം ഒരു പരിപാടിയിൽ പങ്കെടുത്ത് സംസാരിക്കവെ നടൻ ഇടവേള ബാബു സിനിമയെ വല്ലാതെ പരിഹസിച്ചാണ് സംസാരിച്ചത്.

മുകുന്ദനുണ്ണി അസോസിയേറ്റ്സ് എന്ന സിനിമയ്ക്ക് എങ്ങനെ സെൻസറിങ് കിട്ടിയെന്ന് മനസിലാകുന്നതില്ലെന്നും സിനിമ മുഴുവനും നെഗറ്റീവാണെന്നും അതിലെ നായിക ക്ലൈമാക്‌സില്‍ ഉപയോഗിക്കുന്ന വാക്കുകളൊന്നും ഇവിടെ ഉപയോഗിക്കാന്‍ പറ്റില്ല എന്നായിരുന്നു ഇടവേള ബാബു പറഞ്ഞത്.

ഇടവേള ബാബുവിന്റെ വാക്കുകൾ വൈറലായതോടെ സൈബർ ലോകം ഇടവേള ബാബുവിനെതിരെ രം​ഗത്തെത്തി. ഇപ്പോൾ സോഷ്യൽമീഡിയ നിറയെ ഇടവേള ബാബുവിനെ പരിഹസിച്ചുള്ള മീമുകളാണ് നിറയുന്നത്.

ഈ സാഹചര്യത്തിൽ ഇടവേള ബാബുവിനെ കുറിച്ച് വർഷങ്ങൾക്ക് മുമ്പ് നടൻ മണിയൻ പിള്ള രാജു പറയുന്ന വീഡിയോ വീണ്ടും കുത്തിപ്പൊക്കിയിരിക്കുകയാണ് സോഷ്യൽമീഡിയ. ചിലർക്ക് അധികാരം കിട്ടുമ്പോൾ അവർ അതിൽ ഒന്ന് മേയുമെന്നാണ് ഇടവേള ബാബുവിനെ കുറിച്ച് മണിയൻ പിള്ള രാജു പറഞ്ഞത്.

'ചിലർക്ക് അധികാരം കിട്ടുമ്പോൾ അവർ അതിൽ ഒന്ന് മേയും. ചില സിനിമകൾ ഒരു ദിവസം പോലും ഓടില്ലാത്ത പടങ്ങൾ നേരത്തെ വരും. എന്നാൽ ഓടാൻ സാധ്യതയുള്ള പടങ്ങൾ ഇടവേള ബാബു ഇടപെട്ട് പിടിച്ച് വെക്കും. നമ്മൾ കണ്ടിട്ടുണ്ടാവും റോഡ് ടാർ ചെയ്യുന്ന സമയത്ത് ഒരു വശത്തെ ട്രാഫിക്ക് നിയന്ത്രിക്കാനായി ഒരാൾ ചുവന്ന കൊടിയും പിടിച്ച് നിൽക്കുന്നുണ്ടാവും.'

'ആ അധികാരം അരമണിക്കുറിലേക്ക് കിട്ടുമ്പോൾ അവൻ കാണിക്കുന്ന പെർഫോമൻസുണ്ട്. ബെൻസ് കാറൊക്കെ വരുമ്പോൾ പോകരുതെന്ന് ദേഷ്യപ്പെട്ട് പറഞ്ഞ് ചിലപ്പോൾ വണ്ടിയുടെ ബോണറ്റിൽ അടിക്കുകയൊക്കെ ചെയ്യും.'

'കൂടാതെ വണ്ടിയുമായി വരുന്ന ആളുകളെ ചീത്ത വിളിച്ച് പുറകിലോട്ട് പറഞ്ഞ് വിടും' മണിയൻപിള്ള രാജു പറഞ്ഞു. മലയാള സിനിമാ താരങ്ങളുടെ സംഘടനയായ അമ്മയുടെ ജനറൽ സെക്രട്ടറിയാണ് ഇപ്പോൾ ഇടവേള ബാബു.

പണ്ട് അമ്മയുടെ ഒരു മീറ്റിങ് നടക്കുമ്പോൾ അന്നത്തെ പ്രസിഡന്റ് ഇടവേള ബാബുവിനെ ആ മീറ്റിങ്ങിൽ നിന്നും ഇറക്കിവിട്ടിരുന്നെന്നും അന്ന് ഇടവേള ബാബു എടുത്ത ശപഥമാണ് ആ കസേരയെന്നുമായിരുന്നു കുറച്ച് ദിവസം മുമ്പ് ടിനി ടോം പറഞ്ഞത്. ഇടവേള ബാബു തന്നെയാണ് ഈ കഥ തന്നോട് ഒരിക്കൽ പറഞ്ഞതെന്നും ടിനി ടോം പറഞ്ഞിരുന്നു.