'അനൂപിന്റെ ജീവിതത്തിലേക്ക് ഐശ്വര്യ വന്നപ്പോലെ'; വിവാഹം എപ്പോഴെന്ന ചോദ്യത്തിന് മറുപടിയുമായി മണിക്കുട്ടൻ!

സിനിമ തേടി നടന്ന കാലത്ത് ഒരുപാട് തിരസ്കരിക്കപ്പെട്ടിട്ടുണ്ടെന്നും അഭിനയം നിർത്തിപോകണം എന്നുപോലും തോന്നിയ അവസരങ്ങൾ ഉണ്ടായിട്ടുണ്ടെന്നും മണിക്കുട്ടൻ തന്നെ പലപ്പോഴായി പറഞ്ഞിട്ടുണ്ട്. സിനിമയ്ക്ക് വേണ്ടി ആത്മാർത്ഥമായി സമർപ്പിച്ച് കഴിഞ്ഞാൽ അത് ഒരുപാട് അനുഗ്രഹങ്ങൾ നൽകുമെന്ന വിശ്വാസം എന്നും ഒപ്പം ഉണ്ടായിരുന്നുവെന്നും മറക്കാനാകാത്ത ഒരുപാട് എക്സ്പീരിയൻസ് നൽകുന്ന ഒന്നാണ് സ്ട്രഗ്ലിങ് സ്റ്റേജെന്നും മണിക്കുട്ടൻ വ്യക്തമാക്കിയിട്ടുണ്ട്. അവസാനമായി മണിക്കുട്ടൻ അഭിനയിച്ച് റിലീസ് ചെയ്ത സിനിമ മരക്കാർ അറബിക്കടലിന്റെ സിംഹമാണ്. മോഹൻലാൽ അവതരിപ്പിച്ച മരക്കാർ എന്ന കഥാപാത്രത്തിന്റെ സഹായി ആയിരുന്നു ചിത്രത്തിൽ മണിക്കുട്ടൻ. ബി​ഗ് ബോസ് മണിക്കുട്ടന്റെ ജീവിതത്തിൽ വഴിത്തിരിവായിട്ടുണ്ട്. ബി​ഗ് ബോസിലേക്ക് മണിക്കുട്ടൻ‌ എത്തിയത് കാലിന് പരിക്കുമായിട്ടാണ്.

ആദ്യത്തെ കുറച്ച് ദിവസങ്ങളിൽ കാര്യമായ പ്രകടനമൊന്നും കാലിന് സുഖമില്ലാത്തതിനാൽ മണിക്കുട്ടന് ചെയ്യാൻ സാധിച്ചിരുന്നില്ല. പിന്നീട് മണിക്കുട്ടൻ നന്നായി എല്ലാ ടാസ്ക്കുകളിലും മത്സരിക്കാൻ തുടങ്ങി. ഓരോ ദിവസം കഴിയുന്തോറും മണിക്കുട്ടനുള്ള ജനപിന്തുണ ഏറികൊണ്ടിരുന്നു. ബി​ഗ് ബോസ് സീസൺ മൂന്നിലെ വിജയി വലിയ പ്രേക്ഷക പിന്തുണയോടെ മണിക്കുട്ടനായിരുന്നു. എം.കെ എന്ന ഓമനപ്പേരിലാണ് മണിക്കുട്ടനിപ്പോൾ ആരാധകർക്കിടയിൽ അറിയപ്പെടുന്നത്. മണിക്കുട്ടനെ സ്നേഹിക്കുന്നവരുടെ കൂട്ടായ്മയായ മണിക്കുട്ടൻ ആർമി പോലും ഇപ്പോൾ സോഷ്യൽമീഡിയയിൽ ഉണ്ട്. മണിക്കുട്ടന്റെ വിവാഹവും എല്ലാവരും കാത്തിരിക്കുന്ന ഒന്നാണ്. മുപ്പത്തിയഞ്ചുകാരനായ മണിക്കുട്ടൻ ഇതുവരെ വിവാഹിതനായിട്ടില്ല. ബി​ഗ് ബോസിൽ ആയിരുന്ന സമയത്ത് സഹ മത്സരാർഥിയായിരുന്നു സൂര്യ മണിക്കുട്ടനോട് പ്രണയം പറഞ്ഞിരുന്നു. എന്നാൽ മണിക്കുട്ടൻ മറുപടിയൊന്നും പറഞ്ഞിരുന്നില്ല.

സീരിയൽ താരം അനൂപ് കൃഷ്ണന്റെ വിവാഹത്തിൽ പങ്കെടുക്കാനെത്തിയ മണിക്കുട്ടൻ തന്റെ വിവാഹം എപ്പോഴുണ്ടാകുമെന്ന് വ്യക്തമാക്കിയിരിക്കുകയാണ് ഇപ്പോൾ. ഫിലിമി ബീറ്റിന് നൽകിയ പ്രത്യേക അഭിമുഖത്തിലാണ് വിവാഹത്തെ കുറിച്ചും ഭാര്യാ സങ്കൽപ്പങ്ങളെ കുറിച്ചും മണിക്കുട്ടൻ മനസ് തുറന്നത്. 'ഇന്നിപ്പോൾ അനൂപിന്റെ വിവാഹ സന്ധ്യ കഴിക്കാം... എന്നിട്ട് എന്റെ വിവാഹത്തെ കുറിച്ച് ആലോചിക്കണം. വിവാഹം വന്നുചേരേണ്ടതാണ്. അനൂപിന് ഐശ്വര്യ വന്ന് ചേർന്നപ്പോലെ എനിക്കും ആരെങ്കിലും ഒരാൾ വന്ന് ചേരും എന്നാണ് പ്രതീക്ഷിക്കുന്നത്. വിവാഹത്തെ കുറിച്ച് ആലോചനകൾ നടക്കുന്നുണ്ട്. ഇതുവരെ ഒന്നും റെഡിയായിട്ടില്ല. എല്ലാം വന്നുചേരേണ്ടതാണ് എന്നാണ് ഞാൻ‌ വിശ്വസിക്കുന്നത്. വലിയ സങ്കൽപ്പങ്ങളൊന്നുമില്ല. എന്റെ ജോലി എന്താണ് എന്ന് മനസിലാക്കുന്ന ഒരാളായിരിക്കണം എന്ന് മാത്രമെയുള്ളൂ' മണിക്കുട്ടൻ പറയുന്നു.