'ആരാണ് ആരതി പൊടിയെന്ന് ചോദിച്ചവർക്ക്.... ഇപ്പോൾ ഉത്തരം ഊഹിക്കാൻ കഴിയുന്നുണ്ടോ?'; മധുര പ്രതികാരവുമായി ആരതി!

ആരതി പൊടി നടിയും സംരംഭകയുമെല്ലാമാണ്. വളരെ ചെറിയ പ്രായത്തിൽ തന്നെ റോബിനെക്കാൾ കൂടുതൽ സിനിമാലോകത്ത് ബന്ധമുണ്ടാക്കാൻ ആരതി പൊടിക്ക് സാധിച്ചിട്ടുണ്ട്.

റോബിനുമായി പ്രണയത്തിലായ ശേഷം റോബിന്റെ സഹമത്സരാർഥികളുടെ പരിഹാസത്തിന് ആരതി പൊടിയും ഇരയാകാറുണ്ട്. അടുത്തിടെ റിയാസ് ആരതി പൊടിയെ പരിഹസിച്ച് പറഞ്ഞ കാര്യങ്ങൾ സോഷ്യൽമീഡിയയിൽ വൈറലായിരുന്നു. റോബിന്റെ പ്രശസ്തിയുടെ ചുവടുപിടിച്ച് ഉയർന്ന് വന്നതാണ് ആരതി പൊടിയെന്നാണ് അന്ന് പരിഹസിച്ച് റിയാസ് പറഞ്ഞത്.

നിരവധി ആരാധകരെയും കൊണ്ട് ബിഗ് ബോസിൽ നിന്നും പുറത്തെത്തിയ റിയാസ് സ്വന്തമായി ഒരു യുട്യൂബ് ചാനൽ ആരംഭിച്ചിരുന്നു. ആ ചാനലിൽ പങ്കുവെച്ച വീഡിയോയിലാണ് ആരതിയെ പരിഹസിച്ചത്. 'ഹു ദ ഹെൽ ഈസ് ആരതി പൊടി?' എന്നാണ് റിയാസ് ഒരു പ്രേക്ഷകന്റെ ചോദ്യത്തിന് മറുപടിയായി അന്ന് പറഞ്ഞത്.

'സ്വന്തം കഴിവുകൊണ്ട് വളർന്ന ആരെങ്കിലുമാണെങ്കിൽ എനിക്ക് അറിയാൻ ചാൻസുണ്ട്. ഇനി അതല്ല പോപ്പുലറായ ഒരാളെ ബോയ്ഫ്രണ്ട് ആക്കിയതുകൊണ്ട് മാത്രം പോപ്പുലറായ വ്യക്തിയാണ് ആരതി പൊടിയെങ്കിൽ‌ എനിക്ക് അറിയാൻ ചാൻസില്ല.'

'അത്തരം ആളുകൾക്ക് വേണ്ടി എന്റെ സമയം ഞാൻ ചിലവഴിക്കാറുമില്ലെന്നുമാണ്' റിയാസ് പറഞ്ഞത്. റിയാസിനെപ്പോലെ സ്ത്രീകൾക്ക് വേണ്ടി എപ്പോഴും സംസാരിക്കാറുള്ള ഒരു വ്യക്തി ആരതിയെ പരിഹസിച്ചത് വളരെ മോശപ്പോയി എന്നാണ് അന്ന് ആ വീഡിയോ കണ്ടവരെല്ലാം പറഞ്ഞത്.

ഇത്രയും പ്രകോപനപരമായ കമന്റ് റിയാസ് പറഞ്ഞിട്ടും ആരതി പൊടി പ്രതികരിച്ചിരുന്നില്ല. ഇപ്പോഴിതാ റിയാസിനുള്ള മറുപടി മധുര പ്രതികാരത്തിലൂടെ വീട്ടിയിരിക്കുകയാണ് ആരതി പൊടി.

ആരതി പൊടി തന്റെ ആദ്യ തമിഴ് സിനിമയിലെ ​ഗാനം പങ്കുവെച്ചുകൊണ്ടാണ് തനിക്ക് നൽകാനുള്ള മറുപടി ആരതി പൊടി റിയാസിന് നൽകിയത്. ആരതി നായികയായ പുതിയ തമിഴ് ചിത്രത്തിന്റെ ലിറിക്കൽ വീഡിയോ കഴിഞ്ഞ ദിവസം റിലീസ് ചെയ്തിരുന്നു.

അതിന്റെ ചെറിയൊരു റീൽ വീഡിയോ പങ്കുവെച്ചാണ് ആരതി പൊടി റിയാസിനെ കുത്തിയുള്ള ചോദ്യം ചോദിച്ചത്. 'ആരാണ് ആരതി പൊടിയെന്ന് ചോദിച്ചവർക്ക്.... ഇപ്പോൾ ഉത്തരം ഊഹിക്കാൻ കഴിയുന്നുണ്ടോ?' എന്നാണ് തന്റെ സിനിമയുടെ ​ഗാനം പങ്കുവെച്ചുകൊണ്ട് ആരതി പൊടി ചോദിച്ചത്.

വീഡിയോ പ്രത്യക്ഷപ്പെട്ടതോടെ നിരവധി പേരാണ് ആരതി പൊടിയെ അഭിനന്ദിച്ച് എത്തിയത്.

കാണേണ്ടവർ കാണും കൊള്ളേണ്ടവർക്ക് കൊള്ളും, ഇതൊരു സാമ്പിൾ വെടിക്കെട്ട്‌ മാത്രം. തൃശൂർ പൂരം കാണാൻ ഇരിക്കുന്നതെയുള്ളു മക്കളെ തുടങ്ങി നിരവധി കമന്റുകളാണ് ആരതിയെ സപ്പോർട്ട് ചെയ്ത് വന്നത്.