കമലുമായുള്ള ബന്ധം വരെ ഉപേക്ഷിച്ച് വളർത്തിയ മകൾ; ​ഗൗതമിയുടെ മകളുടെ ചിത്രങ്ങൾ വൈറൽ

വ്യക്തി ജീവിതത്തിൽ പല ഘട്ടങ്ങളിലൂടെ കടന്ന് പോയ താരമാണ് ​ഗൗതമി. കാൻസർ ബാധിച്ച് ഏറെ നാൾ ചികിത്സയിൽ ആയിരുന്ന ​ഗൗതമി ഇത് അതിജീവിച്ച് ജീവിതത്തിലേക്ക് തിരിച്ചെത്തി. 35ാം വയസ്സിലാണ് ​ഗൗതമിക്ക് സ്തനാർബുദം ബാധിക്കുന്നത്. 1998 ലാണ് ​ഗൗതമി ബിസിനസ്കാരനായ സന്ദീപിനെ വിവാഹം കഴിക്കുന്നത്. ഒന്നര വർഷത്തിനുള്ളിൽ ഈ വിവാഹ ബന്ധം വേർപിരിഞ്ഞു. ഈ ബന്ധത്തിൽ സുബ്ബലക്ഷ്മി എന്ന മകളും ​ഗൗതമിക്കുണ്ട്.

Also Read: മൂന്ന് വിവാ​ഹങ്ങളും പരാജയപ്പെട്ടു, മകൻ അകന്നു, മകൾ മുൻ ഭർത്താവിനൊപ്പം; ഇനി വിവാഹത്തിനില്ലെന്ന് വനിത

മകളെ ഒറ്റയ്ക്കാണ് ​ഗൗതമി വളർത്തിയത്. ഇതിനിടെ നടൻ കമൽ ഹാസനുമായി ലിവിം​ഗ് ടു​ഗദറിലേക്കും ​ഗൗതമി കടന്നു. അർബുദം ബാധിച്ച കാലത്ത് കമലിന്റെ പിന്തുണ ​ഗൗതമിക്ക് ഉണ്ടായിരുന്നു. നീണ്ട 13 വർഷം ഈ ബന്ധം നീണ്ടു നിന്നു. എന്നാൽ പിന്നീട് ഈ ബന്ധം അവസാനിച്ചു. തങ്ങൾ വേർപിരിയുകയാണെന്ന് ​ഗൗതമി ഔദ്യോ​ഗിക പ്രസ്താവനയിലൂടെ വ്യക്തമാക്കി.

തന്റെ മകൾ നല്ല ഭാവിക്ക് വേണ്ടി കൂടിയാണ് ഇത്തരമാെരു തീരുമാനം എടുത്തതെന്ന് ​ഗൗതമി പറഞ്ഞിരുന്നു. ഇപ്പോഴിതാ ​ഗൗതമിയുടെ മകൾ സുബ്ബലക്ഷ്മിയുടെ ചിത്രമാണ് സോഷ്യൽ മീഡിയയിൽ വൈറലാവുന്നത്. സോഷ്യൽ മീഡിയയിൽ സജീവമായ സുബ്ബ ലക്ഷ്മി തന്നെയാണ് ഈ ഫോട്ടോ പങ്കുവെച്ചത്. കാർത്തിക ദീപം ആഘോഷങ്ങളുടെ ചിത്രമാണ് സുബ്ബലക്ഷ്മി പങ്കുവെച്ചത്. നിരവധി പേരാണ് ഫോട്ടോയ്ക്ക് താഴെ കമന്റുകളുമായി എത്തുന്നത്.

കമൽ ഹാസനും ​ഗൗതമിയും തമ്മിലുള്ള വേർപിരിയൽ വലിയ വിവാദം അക്കാലത്ത് ഉണ്ടാക്കിയിരുന്നു. കമൽ ഹാസനെതിരെ അന്ന് ​ഗൗതമി ആരോപണങ്ങളും ഉന്നയിച്ചിരുന്നു, കമൽഹാസന്റെ സിനിമകളിൽ കോസ്റ്റ്യൂം ഡിസൈൻ ചെയ്തതിന്റെ ശമ്പളം ലഭിച്ചില്ലെന്നായിരുന്നു ആരോപണം.

ഇതിനിടെ കമൽ ഹാസന്റെ മകൾ ശ്രുതി ഹാസനും ​ഗൗതമിയും തമ്മിലുളള പ്രശ്നങ്ങളും വേർപിരിയലിന് കാരണമായെന്നും അഭ്യൂഹങ്ങൾ പരന്നിരുന്നു. എന്നാൽ ഈ ആരോപണത്തെ ​ഗൗതമി നിഷേധിച്ചു. പ്രശ്നത്തിൽ മക്കൾക്ക് പങ്കില്ലെന്ന് ​ഗൗതമി വ്യക്തമാക്കി.

എന്റെ മകൾക്കും എനിക്കും സുസ്ഥിരവും സുരക്ഷിതവുമായ അന്തരീക്ഷം പുനർനിർ‌മിക്കാനുള്ള ശ്രമത്തിന്റെ ഭാ​ഗമായാണ് വേർപിരിയൽ നടന്നതെന്ന് ​ഗൗതമി അന്ന് പുറത്ത് വിട്ട പ്രസ്താവനയിൽ വ്യക്തമാക്കിയിരുന്നു. ഇരുവരും ഒരുമിച്ച് ​പാപനാശം എന്ന സിനിമയിലാണ് അവസാനമായി അഭിനയിച്ചത്. മലയാള ചിത്രം ദൃശ്യത്തിന്റെ തമിഴ് റീമേക്ക് ആണിത്. മലയാളത്തിൽ മീന ചെയ്ത വേഷമാണ് തമിഴിൽ ​ഗൗതമി ചെയ്തത്. ഈ സിനിമയ്ക്ക് ശേഷം ​ഗൗതമിയും ​കമൽഹാസനും ഒരുമിച്ച് പ്രവർത്തിച്ചിട്ടില്ല. രണ്ട് പേരും തങ്ങളുടേതായ കരിയർ തിരക്കുകളിലാണ്.