പിരിഞ്ഞത് ഒരു കാരണം കൊണ്ട് മാത്രമല്ല, അത് കാണേണ്ടി വരുന്നത് വേദനാജനകമാണ്; തുറന്ന് പറഞ്ഞ് ​ഗൗതമി

ജീവിതത്തിൽ പല ഘട്ടങ്ങൾ നടി ​ഗൗതമി കണ്ടിട്ടുണ്ട്. സിനിമകളിൽ തിരക്കേറിയ സമയത്ത് വിവാഹം, പിന്നീട് വേർപിരിയൽ, കമൽ ഹാസനോടൊപ്പമുള്ള ജീവിതം, കാൻസർ പിടിപെട്ട നാളുകൾ തുടങ്ങി ​ഗൗതമി ജീവിതത്തിൽ പിന്നിട്ട വഴികൾ എളുപ്പമായിരുന്നില്ല. കരിയറിലെ ഏറ്റവും മികച്ച സമയത്ത് നിൽക്കുമ്പോഴാണ് നടി ബിസിനസുകാരൻ സന്ദീപ് ഭാട്ടിയയെ വിവാഹം ചെയ്യുന്നത്. സുബ്ബലക്ഷ്മി എന്ന മകളും പിറന്നു. 1998 ൽ വിവാഹിതരായ ഇരുവരും ഒരു വർഷത്തിന് ശേഷം പിരിഞ്ഞു.

ഇപ്പോഴിതാ ആദ്യ വിവാഹ ബന്ധം പിരിഞ്ഞതിനെക്കുറിച്ച് സംസാരിക്കുകയാണ് ​ഗൗതമി. കുഞ്ഞ് വേണമെന്ന ആ​ഗ്രഹം കൊണ്ടാണ് താൻ വിവാഹം ചെയ്തതെന്ന് ​ഗൗതമി പറയുന്നു. കുഞ്ഞ് വേണമെന്നായിരുന്നു എന്റെ ആ​ഗ്രഹം. ജീവിതത്തിൽ എന്തോ എന്ന് കുറവുണ്ടെന്ന ചിന്ത വന്നു. ഒരു കുഞ്ഞുണ്ടെങ്കിൽ ജീവിതം മനോഹരമാകുമെന്ന് തിരിച്ചറിഞ്ഞു. കുഞ്ഞ് പിറന്നാൽ കുഞ്ഞിനാണ് പ്രഥമ പരി​ഗണന. അല്ലെങ്കിൽ കുഞ്ഞിനെ ഭൂമിയിലേക്ക് കൊണ്ട് വരരുത്.

കുഞ്ഞ് വേണമെന്ന് ആ​ഗ്രഹം വന്നതോടെ വർക്കുകൾ കുറച്ചു. സിനിമകളിൽ വർ‌ക്ക് ചെയ്യുമ്പോൾ അന്ന് ഒന്നിനും സമയമുണ്ടായിരുന്നില്ല. പാർലറിൽ പോകാനോ അമ്മയ്ക്കൊപ്പം ഐസ്ക്രീം കഴിക്കാൻ പോകാനോ പോലും സമയമുണ്ടാകില്ല. ജീവിതത്തിൽ എനിക്കായി സമയം വേണമെന്ന് തീരുമാനിച്ചു. അങ്ങനെ കരിയറിൽ നിന്ന് മാറുകയും വിവാഹം ചെയ്യുകയും ചെയ്തെന്ന് ​ഗൗതമി പറയുന്നു.

ബന്ധം പിരിയാൻ തീരുമാനിച്ചത് ഒരു കാരണം കൊണ്ടല്ലെന്നും ​ഗൗതമി പറയുന്നു. ഒരു റിലേഷൻഷിപ്പിലും ഒരു കാരണം കൊണ്ട് പിരിയാനാകില്ല. വളരെ ഇന്റൻസായ തീരുമാനമാണത്. മനസ് കൊണ്ട് നമ്മൾ എല്ലാം ആ റിലേഷൻഷിപ്പിലേക്ക് നൽകുന്നു. ചിലർ റിലേഷൻഷിപ്പിലാണെങ്കിലും ഒറ്റപ്പെടൽ അനുഭവിക്കും. ഞാനെപ്പോഴും ഇൻഡിപെൻഡന്റായിരുന്നു. ഒറ്റപ്പെടൽ എന്നെ ബാധിച്ചിട്ടില്ല. കാരണം ഞാൻ ഒരി​ക്കലും ആരെയും ആശ്രയിച്ചിട്ടില്ല. എനിക്ക് ഈ ബന്ധം ശരിയായി തോന്നിയില്ല എന്നത് കൊണ്ട് മാത്രമല്ല പിരിഞ്ഞത്. അത് തെറ്റായ ചിന്തയാണെന്ന് ഞാൻ കരുതുന്നു.

ഏത് റിലേഷൻഷിപ്പിലായാലും രണ്ട് പേർ ഒരേ ദിശയിലേക്ക് പോകുമ്പോഴേ അത് ആരോ​ഗ്യകരമായ ബന്ധമാകൂ. ഒരാൾ അങ്ങോട്ടും ഒരാൾ ഇങ്ങോട്ടും പോയാൽ അത് ഒരു റിലേഷൻഷിപ്പായി നിൽക്കില്ല. അത് കാണുന്നത് വേദനാജനകമാണ്. ഒരിക്കൽ തുടങ്ങിയ അടുപ്പം ഇന്ന് മാറിയത് കാണുന്നത് വേദനിപ്പിക്കില്ലേയെന്നും ​ഗൗതമി അഭിമുഖത്തിൽ ചോദിച്ചു.

പിന്നീട് കുറച്ച് വർഷങ്ങൾക്കിപ്പുറമാണ് ​ഗൗതമിയും കമൽ ഹാസനും ഒരുമിച്ച് ജീവിതമാരംഭിക്കുന്നത്. 13 വർഷങ്ങൾക്ക് ശേഷം ഇരുവരും രണ്ട് വഴിക്ക് പിരിഞ്ഞു. കമലിന് കമ്മിറ്റ്മെന്റിലുള്ള പ്രശ്നം കൊണ്ടാണ് പിരിഞ്ഞതെന്ന് ​ഗൗതമി നേരത്തെ തുറന്ന് പറഞ്ഞിരുന്നു. നടന്റെ സിനിമയിൽ കോസ്റ്റ്യൂം ഡിസൈനറായി പ്രവർത്തിച്ചതിന്റെ പ്രതിഫലം ലഭിച്ചില്ലെന്നും ഗൗതമി ആരോപിച്ചു. അഭിനയ രം​ഗത്ത് സജീവമല്ലെങ്കിലും ഇന്നും ​നടി സാന്നിധ്യം അറിയിക്കുന്നുണ്ട്. മകളാണ് തന്റെ എല്ലാമെന്നാണ് ​ഗൗതമി പറയാറുള്ളത്.