മോഹന്‍ലാലിന്‍റെ ആത്മസുഹൃത്ത്! കല്യാണിയുടെയും സിദ്ധാര്‍ത്ഥിന്റെയും അച്ഛന്‍! പ്രിയദര്‍ശന് പിറന്നാള്‍!

മരക്കാറിലെത്തി നില്‍ക്കുന്നു

സിനിമയിലെത്തുന്നതിന് മുന്‍പ് തന്നെ അടുത്ത സുഹൃത്തുക്കളായിരുന്നു പ്രിയദര്‍ശനും മോഹന്‍ലാലും. സിനിമാസ്വപ്‌നങ്ങള്‍ പങ്കുവെച്ച് നടന്നിരുന്ന കൂട്ടുകാര്‍ വെള്ളത്തിരയിലെത്തിയപ്പോഴും സൗഹൃദം അതേ പോലെ തുടര്‍ന്നിരുന്നു. പ്രതിസന്ധി ഘട്ടത്തിലെല്ലാം ഇരുവരും ഒരുമിച്ചായിരുന്നു. മലയാളത്തിലെ ഏറ്റവും ചെലവേറിയ സിനിമകളിലൊന്നായ മരക്കാര്‍ അറബിക്കടലിന്റെ സിംഹത്തിന്റെ ലൊക്കേഷനിലാണ് ഇരുവരും. ഹൈദരാബാദിലെ റാമോജി ഫിലിംസിറ്റിയില്‍ വെച്ചാണ് ചിത്രീകരണം.

എക്കാലത്തെയും മികച്ച സിനിമകള്‍

എന്നെന്നും ഓര്‍ത്തിരിക്കാവുന്ന തരത്തിലുള്ള നിരവധി സിനിമകളാണ് പ്രിയദര്‍ശനും മോഹന്‍ലാലും ചേര്‍ന്ന് മലയാളിക്ക് സമ്മാനിച്ചത്. എല്ലാവിധ ചേരുവകളുമടങ്ങുന്ന സിനിമകളുമായാണ് ഇവരെത്തിയത്. അതിനാല്‍ത്തന്നെ ഇവര്‍ ഒരുമിക്കുന്നുവെന്ന് കേള്‍ക്കുമ്പോള്‍ മുതല്‍ ആരാധകര്‍ക്ക് സന്തോഷമാണ്. ഒപ്പത്തിന് ശേഷം ഇരുവരും ഒരുമിച്ചെത്തുന്നത് മരക്കാറിലൂടെയാണ്. കുഞ്ഞാലി മരക്കാര്‍ നാലാമന്റെ ജീവിതകഥ പറയുന്ന ചരിത്രസിനിമയുമായാണ് ഇത്തവണത്തെ വരവ്.

മക്കളും പിന്നാലെയെത്തി

മോഹന്‍ലാലും പ്രിയദര്‍ശനും മാത്രമല്ല ഇവരുടെ മക്കളും സിനിമയില്‍ സജീവമാണ്. പ്രണവ് മോഹന്‍ലാലായിരുന്നു ആദ്യം അരങ്ങേറിയത്. ജീത്തു ജോസഫ് ചിത്രമായ ആദിയിലൂടെയായിരുന്നു അരങ്ങേറ്റം. കൃത്യം ഒരുവര്‍ഷം പിന്നിടുന്നതിനിടയിലാണ് താരപുത്രന്‍ രണ്ടാമത്തെ സിനിമയുമായെത്തിയത്. ജനുവരി 25ന് റിലീസ് ചെയ്ത ഇരുപത്തിയൊന്നാം നൂറ്റാണ്ട് മികച്ച പ്രതികരണം നേടി മുന്നേറുകയാണ്.

മരക്കാറിലെ അപൂര്‍വ്വസംഗമം

മലയാള സിനിമയിലെ എക്കാലത്തെയും മികച്ച കൂട്ടുകെട്ടുകളിലൊന്നാണ് ഐവി ശശി-മോഹന്‍ലാല്‍. ഇവരുടേതായി പുറത്തുവന്നിട്ടുള്ള സിനിമകളെല്ലാം ഇന്നും പ്രേക്ഷകര്‍ ഓര്‍ത്തിരിക്കുന്നുണ്ട്. മോഹന്‍ലാലിനും മമ്മൂട്ടിക്കും ഒട്ടേറെ കരിയര്‍ ബ്രേക്ക് ചിത്രങ്ങള്‍ സമ്മാനിച്ചിട്ടുണ്ട് ഐവി ശശി. അദ്ദേഹത്തിന്റെ ഭാര്യയായ സീമയ്‌ക്കൊപ്പവും ഈ താരങ്ങള്‍ അഭിനയിച്ചിട്ടുണ്ട്. പ്രിയദര്‍ശനും മോഹന്‍ലാലും ഐവി ശശിയും സുരേഷ് കുമാറുമൊക്കെയായിരുന്നു അന്നെങ്കില്‍ ഇന്ന് അവരുടെ മക്കളെല്ലാം ഒരുമിച്ചെത്തുകയാണ് മരക്കാറിലൂടെ. മരക്കാര്‍ അറബിക്കടലിന്റെ സിംഹത്തിന്റെ മുന്നണിയിലും പിന്നണിയിലുമായാണ് താരപുത്രന്‍മാരും താരപുത്രികളും ഒരുമിക്കുന്നത്.

ലിസിയുമായി സൗഹൃദം

പ്രിയദര്‍ശനും ലിസിയും വിവാഹമോചിതരായ സംഭവം ആരാധകരെ ഞെട്ടിച്ചിരുന്നു. സിനിമയില്‍ നിറഞ്ഞു നിന്നിരുന്ന സമയത്താണ് പ്രിയദര്‍ശന്‍ ലിസിയെ ജീവിതസഖിയാക്കുന്നത്. മുന്‍നിര അഭിനേത്രികളിലൊരാളായിരുന്നിട്ട് കൂടി ലിസിയും സിനിമയില്‍ നിന്നും മാറി നില്‍ക്കുകയായിരുന്നു. 1990 ലായിരുന്നു ലിസിയും പ്രിയദര്‍ശനും വിവാഹിതരായത്. 24 വര്‍ഷത്തിന് ശേഷം 2016 ല്‍ ഇരുവരും വേര്‍പിരിയുകയായിരുന്നു. പരസ്പരം പഴി ചാരലുകളില്ലാതെ മാന്യമായാണ് ഇവര്‍ വേര്‍പിരിഞ്ഞത്. വേര്‍പിരിഞ്ഞതിന് ശേഷവും അടുത്ത സുഹൃത്തുക്കളായാണ് ഇവര്‍ കഴിയുന്നത്.

കല്യാണിയെ അഭിനയിപ്പിച്ചപ്പോള്‍

തന്റെ ഏറ്റവും വലിയ വിമര്‍ശകരിലൊരാളാണ് ഡാഡിയെന്നും കല്യാണി പറഞ്ഞിരുന്നു. അച്ഛനൊപ്പം ആദ്യമായി അഭിനയിക്കുന്നതിന്‍രെ ടെന്‍ഷന്‍ തനിക്കുണ്ടായിരുന്നു. തന്റെ അഭിനയം കണ്ട് അദ്ദേഹം വിമര്‍ശിക്കാറുണ്ട്. എവിടെയാണ് താന്‍ ഇംപ്രൂവ് ചെയ്യേണ്ടതെന്നതിനെക്കുറിച്ച് അദ്ദേഹത്തിന് കൃത്യമായ ധാരണയുണ്ട്. പ്രിയദര്‍ശന്റെ അസോസിയേറ്റായി പ്രവര്‍ത്തിച്ച വിക്രം കുമാറിന്റെ ഹലോ എന്ന തെലുങ്ക് സിനിമയിലൂടെയാണ് കല്യാണി തുടക്കം കുറിച്ചത്. മരക്കാറിനെ പുറമെ പുതിയ തെലുങ്ക് സിനിമകളിലും കല്യാണി അഭിനയിക്കുന്നുണ്ട്.