'ഞാനിതൊന്നും പരാതിപ്പെട്ടിട്ടില്ല'; ചിത്രയ്ക്ക് വേണ്ടി സുജാതയെ തഴഞ്ഞോ?; സുജാത അന്ന് പറഞ്ഞത്

മലയാളികൾക്ക് എക്കാലത്തും പ്രിയപ്പെട്ട ശബ്ദമാണ് ​ഗായിക സുജാതയുടേത്. മലയാളത്തിന് പുറമെ തമിഴിലും ഹിന്ദിയിലും ശ്രദ്ധിക്കപ്പെട്ട സുജാതയുടെ കരിയറിൽ ഐക്കണിക്കായ ഒരുപിടി ​ഗാനങ്ങളുമുണ്ട്. റൊമാന്റിക് ​ഗാനങ്ങളിൽ ഒരു കാലത്ത് മറ്റാരേക്കാളും തിളങ്ങാൻ സുജാതയ്ക്ക് കഴിഞ്ഞു. മണിച്ചിത്രത്താഴ് എന്ന സിനിമയിൽ ഒരു മുറെെ എന്ന പാട്ട് പാടിയത് കെഎസ് ചിത്രയാണെങ്കിലും ​ഗാനത്തിന്റെ സുജാത പാടിയ വെർഷൻ ഇന്നും ജനപ്രിയമാണ്.

സമ്മർ ഇൻ ബത്ലേഹം, കാണാക്കൺമണി, സല്ലാപം, പരദേശി തുടങ്ങിയ സിനിമകളിൽ അന്നും സുജാത പാടിയ ​ഗാനങ്ങൾ ഇന്നും പ്രേക്ഷക മനസ്സിൽ നിലനിൽക്കുന്നു. തമിഴിൽ എആർ റഹ്മാന്റെ സം​ഗീത സംവിധാനത്തിൽ നിരവധി ​ഗാനങ്ങൾ സുജാതയ്ക്ക് പാടാനായി. 90 കളിൽ എർആർ റഹ്മാൻ-സുജാത കോംബോ വളരെ ഹിറ്റായിരുന്നു. പൂ പൂക്കും ഓസൈ ഉൾപ്പെടെയുള്ള ​ഗാനങ്ങൾ ഇതിന് ഉദാഹരണമാണ്. സുജാതയ്ക്ക് ഇന്ന് 60 വയസ്സ് പൂർത്തിയായിരിക്കുകയാണ്.

അറുപതാം വയസ്സിലും സുജാതയുടെ സ്വര മാധുര്യത്തിന് ഒരു കോട്ടവും വന്നിട്ടില്ല. പ്രിയപ്പെട്ട ​ഗായികയുടെ പിറന്നാൾ ദിനത്തിൽ ആശംസകളുമായി നിരവധി പേരെത്തി. സോഷ്യൽ മീഡിയയിലൂടെ തനിക്ക് പിറന്നാൾ ആശംസ അറിയിക്കുന്നവർക്ക് സുജാത നന്ദിയറിയിക്കുന്നുണ്ട്. സം​ഗീത ലോകത്ത് ഒരേ കാലഘട്ടത്തിൽ തിളങ്ങി നിന്നവരാണ് സുജാതയും കെഎസ് ചിത്രയും. ഇരുവരും ഒരേ പ്രായക്കാരാണ്.‌ ചിത്രയും സുജാതയും മലയാള സിനിമാ ലോകത്തെ പിന്നണി ​ഗാന രം​ഗത്ത് മറ്റേത് ​ഗായികമാരേക്കാളും സജീവ സാന്നിധ്യമായി നിന്ന കാലവുമുണ്ടായിരുന്നു.

അന്ന് ഇരുവരും പിന്നണി ​ഗാന രം​ഗത്ത് ചർച്ചാ വിഷയമായിരുന്നു. സുജാതയേക്കാളും കെഎസ് ചിത്രയ്ക്ക് സം​ഗീത ലോകത്തെ പ്രമുഖർ പ്രാധാന്യം നൽകിയെന്ന് ആക്ഷേപവുമുണ്ടായിരുന്നു. ഇത്രയും വർഷങ്ങൾ നീണ്ട കരിയറിൽ ദേശീയ പുരസ്കാരം സുജായ്ക്ക് ലഭിച്ചിട്ടില്ല. ഇതിന് പിന്നിലും ചിലരുടെ നീക്കമാണെന്നും അഭ്യൂഹം പരന്നു. തനിക്ക് അർഹമായ അം​ഗീകാരം ലഭിച്ചില്ലെന്ന് മുമ്പൊരിക്കൽ സുജാതയും തുറന്ന് പറഞ്ഞിട്ടുണ്ട്.

1997 ലെ മിൻസാര കനവ് എന്ന സിനിമയിൽ സുജാത പാടിയ പൂ പൂക്കും ഓസൈ എന്ന ​ഗാനത്തിന് ദേശീയ അവാർഡ് ലഭിക്കാത്തതിനെക്കുറിച്ച് സുജാത സംസാരിച്ചിരുന്നു. മികച്ച ​ഗായികയ്ക്കുള്ള അവാർഡ് മൂന്ന് പേരും സംഘവും ചേർന്ന് പാടിയ പാട്ടിനാണ് കൊടുത്തതെന്ന് വാസ്തവമാണ്. പക്ഷെ ചിത്ര ഈ വില കുറഞ്ഞ പൊളിറ്റിക്സിൽ ഇടപെടില്ലെന്ന് എനിക്കുറപ്പുണ്ടെന്നും അന്ന് സുജാത പറഞ്ഞു. പിന്നീട് വർഷങ്ങൾക്കിപ്പുറം കെെരളി ജെബി ജംങ്ഷനിൽ അതിഥിയായെത്തിയപ്പോൾ സുജാതയോട് ഇതേപറ്റി ചോദ്യം വന്നു.

ചിത്ര തന്റെ അവസരങ്ങൾ കൈക്കലായിട്ടില്ലെന്നും അവർ നല്ല ​ഗായികയാണെന്നും സുജാത വ്യക്തമാക്കി. കഴിഞ്ഞ കാര്യങ്ങളെക്കുറിച്ച് ഇപ്പോൾ പറയേണ്ടതില്ലെന്നും സുജാത അഭിപ്രായപ്പെട്ടു. അഭ്യൂഹങ്ങൾക്കപ്പുറത്ത് അടുത്ത സുഹൃത്തുക്കളാണ് സുജാതയും കെഎസ് ചിത്രയും. ഇരുവരും ഒരുപിടി ​ഗാനങ്ങൾ ഒരുമിച്ച് പാടിയിട്ടുണ്ട്. സുജാതയുടെ മകൾ ശ്വേത മോഹൻ കെഎസ് ചിത്രയുടെ വലിയ ആരാധികയാണ്. സുജാത തന്നെ അടുത്തിടെ നൽകിയ അഭിമുഖത്തിൽ ഇക്കാര്യം ചൂണ്ടിക്കാട്ടിയിരുന്നു.