മുപ്പത് ലക്ഷം കൊണ്ട് സുഹൃത്ത് കടന്ന് കളഞ്ഞു; ദൈവദൂതനെന്ന് കരുതിയ ആളുടെ വഞ്ചനയെ കുറിച്ച് ഹരീശ്രി യൂസഫ്

ഒരു കട തുടങ്ങി അത് പരാജയമായി. പിന്നീടാണ് ഒരാള്‍ ഉണ്ടായിരുന്ന സമ്പത്തൊക്കെ കൊണ്ട് പോയത്. സിനിമയിലൊക്കെ അഭിനയിച്ച് ലക്ഷങ്ങളോ കോടികളോ വാങ്ങിക്കാത്ത ചെറിയ ആര്‍ട്ടിസ്റ്റാണ് ഞാന്‍. ടിവി പ്രോഗ്രാമുകളും ചെറിയ ചെറിയ ഷോ കളിലൊക്കെയാണ് പങ്കെടുത്തിട്ടുള്ളത്. അതെല്ലാം ചേര്‍ത്ത് ഞാന്‍ ചെറിയൊരു വീട് വച്ചു. ഒരു കാറ് വാങ്ങി, ഒരു സ്‌കൂട്ടറും വാങ്ങി. അങ്ങനെ എല്ലാം കുറച്ചായിട്ട് എനിക്ക് ദൈവം തന്നു.

ബാലന്‍സായി കുറച്ച് പൈസ ഉണ്ടായിരുന്നു. നാളെ പ്രോഗ്രാം ഇല്ലെങ്കില്‍ ജീവിക്കണ്ടേ, അതുകൊണ്ട് ഒരു മുപ്പത് ലക്ഷം പലയിടത്തായി സേവ് ചെയ്യാനായി ഇട്ടിരുന്നു. ഇതിനിടെ നിലമ്പൂരുള്ള ഒരാള്‍ അദ്ദേഹത്തിന്റെ കടയുടെ പരസ്യത്തില്‍ അഭിനയിക്കാന്‍ എന്നെ വിളിച്ചു. ഇവന് എന്നോട് ഭയങ്കര സൗഹൃദമായി. ഇവന്റെ സ്‌നേഹം വേറെയാണെന്ന് നമുക്ക് അറിയില്ലായിരുന്നു. ഞാന്‍ ബിസിനസൊക്കെ ചെയ്ത് കാശൊക്കെ കളഞ്ഞ് പൊളിഞ്ഞിരിക്കുന്നതടക്കം എന്നെ കുറിച്ച് എല്ലാം ഇവന്‍ അറിഞ്ഞു.

എന്നിട്ട് മനശാസ്ത്രപരമായി എന്നെ വിളിച്ചിട്ട്, ഇക്ക കൈയ്യിലുള്ള കാശൊക്കെ ഉണ്ടെങ്കില്‍ തരൂ.. ഇക്കായ്ക്ക് മാസത്തില്‍ ഞാന്‍ തരാം. ഒരു ഹോം അപ്ലേയിന്‍സ് തുടങ്ങാമെന്നൊക്കെ പറഞ്ഞു. ഇതൊക്കെ കേട്ടപ്പോള്‍ എന്നെ രക്ഷപ്പെടുത്താന്‍ ദൈവദൂതന്‍ വന്നോ എന്ന് വിചാരിച്ചു. പക്ഷേ എന്റെ കൈയ്യില്‍ നിന്ന് കാശൊക്കെ വാങ്ങിയതിന് ശേഷം ആ കടയും പൂട്ടി അവന്‍ മുങ്ങി കളഞ്ഞു.

എന്നെ മാത്രമല്ല ആ നാട്ടിലുള്ള പത്ത് പതിനഞ്ച് പേരെ അവന്‍ പറ്റിച്ചു. ഇപ്പോള്‍ ദുബായിലോ മറ്റോ ഉണ്ടെന്നാണ് അറിയുന്നത്. കൊവിഡ് ഒക്കെ വന്നതോടെ കേസ് പതുക്കെയായി. ഇതിനിടെ ക്യാന്‍സര്‍ വന്നു, കൊവിഡ് കാരണം ജോലിയില്ലാതെയായി. അങ്ങനെ കഷ്ടക്കാലത്തിന്റെ ഒരു ഘോഷയാത്ര തന്നെയാണ് തന്റെ ജീവിതത്തിലുണ്ടായതെന്ന് ഹരിശ്രീ യൂസഫ് പറയുന്നു. ഇതില്‍ നിന്നെല്ലാം ഒരു തിരിച്ച് വരവാണ് താന്‍ പ്രതീക്ഷിക്കുന്നതെന്നും നടന്‍ സൂചിപ്പിച്ചിരിക്കുകയാണ്.