നിർമാതാവ് വിശാഖ് സുബ്രഹ്മണ്യം വിവാ​ഹിതനായി, താരനിബിഢമായി ചടങ്ങ്, സൗഹൃദം പങ്കുവെച്ച് ലാലും ശ്രീനിവാസനും!

മോഹൻലാൽ, ശ്രീനിവാസൻ, ധ്യാൻ ശ്രീനിവാസൻ, അജു വർ​ഗീസ്, വിനീത് ശ്രീനിവാസൻ, എം.ജി ശ്രീകുമാർ, വിധു പ്രതാപ്, റഹ്മാൻ, മേനക, കല്യാണി പ്രിയദർശൻ ഉൾപ്പടെയുള്ള നിരവധി പേർ സകുടുംബമാണ് വിവാഹത്തിൽ പങ്കെടുത്തത്.

അവശതകളെല്ലാം മാറ്റിവെച്ച് വിനീതിന്‍റെ കയ്യും പിടിച്ച് ശ്രീനിവാസൻ വിവാഹ വേദിയിൽ എത്തിയതിന്‍റെ വീഡിയോകള്‍ സമൂഹമാധ്യമങ്ങളില്‍ ശ്രദ്ധനേടുന്നുണ്ട്. മോഹൻലാലിനൊപ്പം ഇരുന്ന് സൗഹൃദം പങ്കുവെക്കുന്നതിന്റെ വീഡിയോയും വൈറലാണ്.

കഴിഞ്ഞ കുറച്ച് ദിവസങ്ങളായി വിവാഹവുമായി ബന്ധപ്പെട്ട് ഹൽദി അടക്കമുള്ള ചടങ്ങുകൾ നടന്നുവരികയാണ്. വിനീത് ശ്രീനിവാസന്റെ കുടുംബവും അജു വർ​ഗീസിന്റെ ഭാര്യ അ​ഗസ്റ്റീനയും ഹൽദി ചടങ്ങുകളുടെ ചിത്രങ്ങൾ സോഷ്യൽമീഡിയയിൽ പങ്കുവെച്ചിരുന്നു.

സ്വർണ്ണ നിറത്തിലുള്ള മുണ്ടും ഷർട്ടുമായിരുന്നു വിശാഖിന്റെ വേഷം. വധു അദ്വൈത സ്വർണ്ണ നിറത്തിലുള്ള സാരിയും ആഭരണങ്ങളുമണിഞ്ഞ് അതീവ സുന്ദരിയായാണ് എത്തിയത്. വിനിതീ, അജു വർ​ഗീസ്, ധ്യാൻ തുടങ്ങിയവരെല്ലാം ചുവന്ന നിറത്തിലുള്ള ഷർട്ടും മുണ്ടുമാണ് ധരിച്ചിരുന്നത്.

മോഹൻലാലിനൊപ്പം ഇരുന്നാണ് ശ്രീനിവാസൻ ചടങ്ങുകൾ വീക്ഷിച്ചത്. വളരെ നാളുകളായി അസുഖം ബാധിച്ച് ചികിത്സയിലായിരുന്ന ശ്രീനിവാസൻ രോ​ഗമുക്തി നേടി വരികയാണ്. വളരെ കുറച്ച് നാളുകളെയായുള്ളൂ പൊതു പരിപാടികളിലും ഇത്തരം ആഘോഷങ്ങളിലും പങ്കെടുക്കാൻ തുടങ്ങിയിട്ട്.

അസുഖം ബേധമായശേഷം ആദ്യം ശ്രീനിവാസൻ പ്രത്യക്ഷപ്പെട്ടത് മഴവിൽ‌ എന്റർടെയ്ൻമെന്റ് അവാർഡിലായിരുന്നു. അന്ന് മോഹൻലാൽ വേദിയിലെത്തിയ ശ്രീനിവാസനെ ചുംബിക്കുന്ന രം​ഗങ്ങൾ വലിയ രീതിയിൽ വൈറലായിരുന്നു.

ആ പരിപാടിക്ക് ശേഷം ഇപ്പോഴാണ് ശ്രീനിവാസനും മോഹൻലാലും ഒരുമിച്ച് ഒരു പരിപാടിയിൽ പങ്കെടുക്കുന്നത്. അജു വർഗീസ്, ധ്യാൻ ശ്രീനിവാസൻ എന്നിവരോടൊപ്പം ഫൺടാസ്റ്റിക് ഫിലിംസ് എന്ന നിർമാണ കമ്പനിയിലും പങ്കാളിയാണ് വിശാഖ് സുബ്രഹ്മണ്യം.

പ്രകാശൻ പറക്കട്ടെയാണ് ഈ കൂട്ടുകെട്ടിൽ അവസാനമായി തിയറ്ററുകളിൽ എത്തിയ ചിത്രം. കുറച്ച് മാസം മുമ്പാണ് വിശാഖിന്റെ വിവാഹ നിശ്ചയം ആഘോഷമായി നടന്നത്. പൊതുവെ ഇത്തരം പരിപാടികളിൽ പങ്കെടുക്കാറില്ലാത്ത പ്രണവ് മോഹൻലാലും സുഹൃത്തിന്റെ വിവാഹ നിശ്ചയത്തിൽ പങ്കെടുക്കാനെത്തിയിരുന്നു.

ലവ് ആക്ഷൻ ഡ്രാമ വലിയ ​ഹിറ്റായ സിനിമയായിരുന്നു. ചിത്രത്തിൽ നയൻതാര, നിവിൻ പോളി, അജു വർ​ഗീസ് തുടങ്ങിയവരായിരുന്നു പ്രധാന വേഷങ്ങൾ ചെയ്തത്. സംവിധായകനായുള്ള ധ്യാനിന്റെ അരങ്ങേറ്റം കൂടിയാണ് ലവ് ആക്ഷൻ ഡ്രാമയിലൂടെ സംഭവിച്ചത്.

ശേഷമാണ് സാജൻ ബേക്കറി എന്ന അജു വർ​ഗീസ് സിനിമ വിശാഖ് നിർമിച്ചത്. പക്ഷെ സിനിമ വേണ്ടത്ര ഓടിയില്ല. പിന്നീട് വിനീത് ശ്രീനിവാസന് വേണ്ടി പ്രണവിനെ നായകനാക്കി ഹൃദയം വിശാഖ് നിർമിച്ചു. 2022ൽ മലയാളത്തിൽ പിറന്ന ഹിറ്റ് സിനിമകളിലൊന്നാണ് ഹൃദയം.