'തെറ്റിദ്ധരിക്കരുതെന്ന് തൃഷയോട് നേരിട്ട് പോയി പറഞ്ഞു, അത്രയും ഭം​ഗിയായിരുന്നു'; ജയറാം

'ഈ സിനിമയുടെ ഏറ്റവും വലിയ പ്രത്യേകത ഈ അഭിനേതാക്കളെ തെരഞ്ഞെടുത്തിരിക്കുന്നതിലാണ്. അരുൾമൊഴി വർമനായി ജയം രവിയിലേക്ക് എത്തിയത് എന്താണെന്ന് നമ്മൾ ചിന്തിക്കേണ്ട കാര്യം ഇല്ല. രാജാരാജ ചോളനായിട്ട് രാവിലെ വേഷം കെട്ടി രവി കാരവനിൽ നിന്നിറങ്ങി നടന്നു വരുമ്പോൾ കണ്ണ് പെടേണ്ട എന്ന് പറയും. അത്ര ഭം​ഗിയാണ്'

'ഓരോരുത്തരുടെ ഡ്രസിം​ഗും അത്ര മനോഹരമായാണ് ചെയ്തിരിക്കുന്നത്. കുന്ദവി ദേവിയായി തൃഷയാണ് അഭിനയിച്ചത്. സുന്ദര ചോഴന്റെ കൊട്ടാരം ഉണ്ട്, ആ കൊട്ടാരത്തിലെ സീൻ എടുക്കുമ്പോൾ കുന്ദവി ദേവി സിം​ഹാസനത്തിൽ ഇരിക്കുന്നുണ്ട്'

'ഞാനിങ്ങനെ കുറേ നേരം ആ ഭം​ഗി ആസ്വദിച്ചു. ഭം​ഗി നമ്മൾ ആണിന്റെ ഭം​ഗി ആയാലും പെണ്ണിന്റെ ഭം​ഗി ആയാലും പ്രകൃതിയുടെ ഭം​ഗി ആയാലും ആസ്വദിക്കുമല്ലോ. ഒരുപാട് നേരം നോക്കുമ്പോൾ തൃഷയ്ക്ക് തെറ്റായി തോന്നേണ്ട എന്ന് കരുതി ഞാൻ പോയി പറഞ്ഞു, അമ്മാ നല്ല ഭം​ഗിയായിരിക്കുന്നത് കൊണ്ടാണ് ഞാൻ നോക്കിയിരിക്കുന്നത്. മറ്റൊന്നും വിചാരിക്കരുതെന്ന്. അത്ര ആപ്റ്റ് ആണ് ആ കഥാപാത്രത്തിന് തൃഷ'

'ഐശ്വര്യ റായുടെ ഭം​ഗി പറയേണ്ട കാര്യം ഇല്ലല്ലോ. ലോക സുന്ദരി എന്ന് പറഞ്ഞാലും മണിരത്നത്തിന്റെ ക്യാമറയുടെ മുന്നിൽ വരുമ്പോൾ അവർക്കൊരു പ്രത്യേക സൗന്ദര്യം ഉണ്ട്. വന്ദിയ തേവനായി എന്റെ കൂടെയുള്ള കാർത്തിക്ക് പകരം വേറെ ആളില്ല എന്ന് തോന്നിപ്പോവും'

വിക്രം പത്ത് പേജ് ‍ഡയലോ​ഗ് പറയുന്ന ഒരു സീനുണ്ട്, അത് രണ്ടാം ഭാ​ഗത്തിലാണോ വരികയെന്ന് അറിയില്ല. ഐശ്വര്യ ലക്ഷ്മി ചെയ്യുന്ന പൂങ്കുഴലിയും എടുത്ത് പറയേണ്ടതാണ്. മണിരത്നം സാറിനെ അനുകരിച്ചത് കണ്ട് ഐശ്വര്യ റായ് ഓടി വന്ന് ജയറാം, എക്സലന്റ് പെർഫോമൻസ് എന്ന് പറഞ്ഞു. എന്റെ സീൻ കഴിഞ്ഞാലും ഷൂട്ടിം​ഗ് കണ്ട് താനൊരുപാട് സമയം സെറ്റിൽ ചിലവഴിക്കുമായിരുന്നെന്നും ജയറാം പറഞ്ഞു. ബിഹൈന്റ് വുഡ്സിനോടാണ് പ്രതികരണം.

ചോഴ രാജവംശത്തിന്റ കഥയാണ് പൊന്നിയിൻ സെൽവൻ സിനിമ. ഇതേപേരിലുള്ള നോവലിനെ ആസ്പദമാക്കിയാണ് സിനിമ ഒരുങ്ങുന്നത്. കൽക്കി കൃഷ്ണ മൂർത്തിയാണ് മൂന്ന് വർഷമെടുത്ത് ഈ നോവൽ എഴുതിയത്. വർഷങ്ങളായി നിരവധി പേർ ഈ നോവൽ സിനിമയാക്കാൻ ശ്രമിച്ചിരുന്നെങ്കിലും മണിരത്നത്തിന് മാത്രമാണ് ഇത് സാധ്യമായത്.