മറ്റൊരാളെ കൊണ്ട് വരാതെ രക്ഷയില്ല; എന്നിട്ടും വിനയൻ ആ സീൻ കളഞ്ഞില്ല, ഭര്‍ത്താവിൻ്റെ വേഷത്തെ കുറിച്ച് റാണി ശരണ്‍

'പത്തൊമ്പതാം നൂറ്റാണ്ട് എന്ന സിനിമ വിജയ യാത്രയില്‍ ആണ്. എല്ലാവരും ഏറെ കാത്തിരുന്ന ഒരു സിനിമ എന്നതിനപ്പുറം ഞങ്ങള്‍ക്ക് ഒരു സ്വകാര്യ സന്തോഷം എന്നത് ആ സിനിമയിലെ വലിയ ഒരു നിര താരങ്ങള്‍ക്കിടയില്‍ ഏട്ടനും ഉണ്ട് എന്നതാണ്. ഏട്ടനെ കണ്ടല്ലോ എന്ന് ആളുകള്‍ മെസ്സേജ് അയക്കുമ്പോള്‍ ഉള്ള സന്തോഷം ചെറുതല്ല.

എല്ലാ ചിത്രങ്ങളും കഴിയുന്നതും ആദ്യ ദിവസം പോയി കാണുന്ന ഞങ്ങള്‍ക്ക് ചില വ്യക്തിപരമായ അസൗകര്യങ്ങള്‍ കൊണ്ട് നിര്‍ഭാഗ്യവശാല്‍ ഇന്നും പടം പോയി കാണാന്‍ സാധിച്ചിട്ടില്ല. പക്ഷേ ഏട്ടന്‍ ശ്രദ്ധിക്കപ്പെട്ടു എന്ന അറിവ് വലിയ സന്തോഷം തന്നെ. വിവേക് മുഴക്കുന്ന് തിയറ്ററില്‍ നിന്നുള്ള ഈ പിക് അയച്ച് തന്നിട്ട് മെസ്സേജ് ഇട്ടത് പഞ്ച് ആയിരുന്നു എന്നാണ്.

നന്ദി വിനയേട്ടാ.. ഒരു സീന്‍ ചെയ്ത് പിന്നീട് ക്വാറന്റൈന്‍ കാരണം ഏട്ടന് ബാക്കി ചിത്രീകരണം പൂര്‍ത്തീകരിക്കാന്‍ കഴിഞ്ഞില്ല. മറ്റൊരാളെ പകരം കൊണ്ട് വരികയല്ലാതെ അവര്‍ക്കും മറ്റു ഓപ്ഷന്‍ ഉണ്ടായിരുന്നില്ല. ഒരു സീന്‍ മാത്രമേ ഷൂട്ട് ചെയ്തിരുന്നുള്ളു എന്നത് കൊണ്ട് പുതിയ ആള്‍ വരുമ്പോള്‍ ഈ സീന്‍ ഇല്ലാതെ ആവും എന്ന് തന്നെ വിചാരിച്ചു. ഏട്ടനെ ഡബ്ബ് ചെയ്യാന്‍ വിളി വന്നപ്പോഴാണ് ഞങ്ങള്‍ അറിഞ്ഞത് ഇത് ഉണ്ടെന്ന്.

ഈ സീന്‍ കട്ട് ചെയ്യാതെ പുതിയ കഥാപാത്രത്തെ കൊണ്ട് വരികയാണ് വിനയേട്ടന്‍ ചെയ്തത്. ഒരു പക്ഷെ, ഏട്ടന് സിനിമയില്‍ നല്ല കഥാപാത്രങ്ങള്‍ ചെയ്യാനുള്ള കൊതി മനസ്സിലാക്കിയ ആളുകളില്‍ ഒരാള്‍ ആയത് കൊണ്ടാവാം അത്. ഏട്ടന്‍ ഭാഗമായ ഓരോ സിനിമ പുറത്ത് വരുമ്പോഴും ആ മനസ്സിലെ സ്വപ്നത്തിന് ഒരു പടി കൂടി അടുത്ത് യാഥാര്‍ഥ്യം എത്തിയല്ലോ എന്ന് തോന്നും..

ഇനിയും തേടി എത്താനുള്ള കഥാപാത്രങ്ങളുടെ മുന്നൊരുക്കത്തിലേക്ക് പത്തൊമ്പതാം നൂറ്റാണ്ടും ചേരുന്നത് ദൈവാനുഗ്രഹം.

NB: ഈ കഥാപാത്രത്തിന് വേണ്ടി മീശ എടുക്കുന്നത് ഏട്ടന്‍ ചെയ്തു കൊണ്ടിരിക്കുന്ന മറ്റൊരു കഥാപാത്രത്തെ ബാധിക്കരുത് എന്നുള്ളത് കൊണ്ട് യുദ്ധകാലാടിസ്ഥാനത്തില്‍ വെപ്പ് മീശ ഒരുക്കി തന്ന ഞങ്ങളുടെ ഇക്ക, റഷീദ് ഇക്കയോടും സ്‌നേഹം' എന്നുമാണ് റാണി പറയുന്നത്.