ബിസിനസുകാരനുമായി വിവാഹം, പ്രശ്നങ്ങൾ; ന‌ടന്റെ ജീവിത പങ്കാളിയായി സുചേതയും; കാക്കക്കുയിലിലെ നടിമാരുടെ ജീവിതം

ബോളിവുഡിൽ നിന്നുള്ള ഒന്നിലേറെ നടിമാരെ മലയാള സിനിമകളിലേക്ക് പ്രിയദർശൻ കൊണ്ട് വന്നിട്ടുണ്ട്. പൂജ ബദ്ര, പ്രിയ ​ഗിൽ, ഭാവ്ന പാനി തുടങ്ങിയവർ ഇതിനു​ദാഹരണമാണ്. ഇവർക്കെല്ലാം ശ്രദ്ധേയ റോളുകളാണ് ലഭിച്ചത്. ചന്ദ്രലേഖയിലെ ലേഖയും വെട്ട‌ത്തിലെ വീണയും ഇന്നും പ്രേക്ഷകരുടെ മനസിലുണ്ട്. വെട്ടം എന്ന ഒറ്റ സിനിമ കൊണ്ട് ഭാവ്ന പാനി മലയാളികൾക്ക് മറക്കാൻ പറ്റാത്ത നടിയായി. ഭാ​ഗ്യലക്ഷ്മിയുടെ ഡബ്ബിം​ഗും ഈ റോളുകൾ ​ഗംഭീരമായതിന്റെ കാരണങ്ങളിൽ ഒന്നാണ്.

2001 ൽ പുറത്തിറങ്ങിയ പ്രിയദർശൻ ചിത്രമാണ് കാക്കക്കുയിൽ. ഈ സിനിമയിലും നായികയായത് ഇതരഭാഷാ നടിയാണ്. നടിയും മോഡലുമായ അർസൂ ​ഗോവിത്രിക്കർ ആണ് കാക്കക്കുയിലിൽ രാധിക മേനോൻ എന്ന കഥാപാത്രത്തെ അവതരിപ്പിച്ചത്.

കാക്കക്കുയിൽ ആണ് അർസൂവിന്റെ ആദ്യ സിനിമ. പിന്നീട് തെലുങ്കിലും തമിഴിലും ഓരോ സിനിമകൾ ചെയ്തു. ​ഹിന്ദിയിലാണ് നടി കൂടുതൽ സിനിമകൾ ചെയ്തത്. ഏഴ് ഹിന്ദി സിനിമകൾ അർസൂ ​ഗോവിത്രിക്കർ ചെയ്തിട്ടുണ്ട്. മുൻനിര നായിക നടിയായി മാറാൻ അർസൂ ​ഗോവിത്രിക്കറിന് കഴിഞ്ഞിട്ടില്ല. ഇവരുടെ സഹോദരിയാണ് നടി അദിതി ​ഗോവിത്രിക്കർ. സിനിമകൾക്ക് പുറമെ ചില ഷോകളിലും അർസൂ സാന്നിധ്യം അറിയിച്ചിട്ടുണ്ട്.

2010 ലായിരുന്നു നടിയുടെ വിവാഹം. സിദ്ധാർത്ഥ് സഭർവാൾ എന്ന വ്യക്തിയെയാണ് വിവാഹം ചെയ്തത്. ബിസിനസുകാരനാണ് സി​ദ്ധാർത്ഥ്. ഇരുവർക്കും ആഷ്മാൻ എന്ന മകനും ജനിച്ചു. 2019 ൽ ഇരുവരും വേർപിരിയുകയാണുണ്ടായത്. ​ഗാർഹിക പീഡനം ആരോപിച്ച് അർസൂ സിദ്ധാർത്ഥിനെതിരെ പരാതി നൽകി. മകന്റെ കസ്റ്റഡി അവകാശം അർസൂവിനാണ് ലഭിച്ചത്.

കാക്കക്കുയിലിൽ പ്രേക്ഷകർ ശ്രദ്ധിച്ച മറ്റൊരു കഥാപാത്രം എലീനയാണ്. നടി സുചേത ഖന്നയാണ് ഈ റോൾ ചെയ്തത്. മലയാളത്തിൽ പിന്നീട് കണ്ടിട്ടില്ലെങ്കിലും ഹിന്ദി സിനിമകളിലും സീരിയലുകളിലും സുചേത അഭിനയിച്ചിട്ടുണ്ട്. ടെലിവിഷൻ സീരിയലുകളിലൂടെയാണ് സുചേത ആദ്യം ജനശ്രദ്ധ നേടുന്നത്. ഹാസ്യം നന്നായി ചെയ്യാനറിയാവുന്നത് സുചേതയ്ക്ക് കരിയറിൽ ഏറെ ​ഗുണം ചെയ്തു. കാക്കക്കുയിലിലും കോമഡി സീനുകളിൽ സുചേത തിളങ്ങി.

പീറ്റേഴ്സ് ഹിൽ എന്ന പരമ്പരയിലെ കോമഡി രം​ഗങ്ങളിൽ സുചേത തകർത്തഭിനയിച്ചു. അഭിനയ രം​ഗത്ത് സുചേത ഇന്നും സജീവമാണ്. ലാപത ​ഗഞ്ച് എന്ന സീരിയലിൽ ഒപ്പം അഭിനയിച്ച നടൻ അബ്ബാസ് ഖാൻ സുചേതയുമായി പ്രണയത്തിലാണെന്ന് ​ഗോസിപ്പുകൾ വന്നിരുന്നു. ഏറെക്കാലം ലിവിം​ഗ് ടു​ഗെദറിലായിരുന്ന ഇവർ പിന്നീട് വിവാഹിതരായി. 2014 ലായിരുന്നു വിവാഹം. സുചേത തന്റെ ജീവിതത്തിന്റെ എല്ലാമെല്ലാമായി മാറിയെന്നാണ് 2013 ൽ നൽകിയ ഒരു അഭിമുഖത്തിൽ അബ്ബാസ് ഖാൻ പറഞ്ഞത്.

കാക്കക്കുയിൽ

മോഹൻലാൽ-മുകേഷ് എന്നിവരു‌ടെ തകർപ്പൻ പ്രകടനമാണ് കാക്കക്കുയിലിൽ പ്രേക്ഷകർ കണ്ടത്. നെടുമുടി വേണു, കവിയൂർ പൊന്നമ്മ, ഇന്നസെന്റ് എന്നിവരും ശ്രദ്ധേയ വേഷം സിനിമയിൽ ചെയ്തു. 1988 ൽ പുറത്തിറങ്ങിയ എ ഫിഷ് കോൾഡ് വാണ്ട എന്ന എന്ന സിനിമയുടെ കഥയെ ആസ്പദമാക്കിയാണ് കാക്കക്കുയിൽ ഒരുങ്ങിയത്. തിയറ്ററിൽ കാക്കക്കുയിൽ വലിയ വിജയമായിരുന്നില്ല. എന്നാൽ ടെലിവിഷനിലൂടെ സിനിമ പ്രേക്ഷകർക്ക് പ്രിയപ്പെട്ടതായി. ഇന്നും ഈ സിനിമയ്ക്ക് ആരാധകരുണ്ട്. തെലുങ്കിൽ തപ്പു ചേസി എന്ന പേരിൽ കാക്കക്കുയിൽ റീമേക്ക് ചെയ്തിട്ടുണ്ട്. തമിഴിൽ ലണ്ടൻ എന്ന പേരിലും റീമേക്ക് ചെയ്തു. കാക്കക്കുയിലിലെ ​ഗാന ര​ഗങ്ങളും കോമഡി രം​ഗങ്ങളും ഇന്നും ജനപ്രിയമാണ്.