കല്യാണി പ്രിയദര്‍ശന്‍റെ പ്രിയപ്പെട്ട നടന്‍ അദ്ദേഹം തന്നെ! പ്രണവിനും സന്തോഷിക്കാനുള്ള വകയുണ്ട്!

പ്രിയപ്പെട്ട നടന്‍

തുടക്കം മുതലേ തന്നെ ആരാധകര്‍ കല്യാണിയെ സ്വീകരിച്ചിരുന്നു. ഹലോ എന്ന ചിത്രത്തിന് ഗംഭീര സ്വീകരണമായിരുന്നു ലഭിച്ചത്. തെലുങ്കിലൂടെ തുടക്കം കുറിച്ച താരപുത്രി എന്നാണ് മലയാളത്തിലേക്ക് എത്തുന്നതെന്നായിരുന്നു എല്ലാവരുടേയും ചോദ്യം. അച്ഛന്റെ സിനിമകയിലൂടെയായിരിക്കുമോ വരവെന്ന ചോദ്യവും ഇതിനിടയില്‍ ഉയര്‍ന്നുവന്നിരുന്നു. അടുത്തിടെ നല്‍കിയ അഭിമുഖത്തിനിടയില്‍ കല്യാണിയോട് തന്റെ പ്രിയതാരത്തെക്കുറിച്ച് ചോദിച്ചിരുന്നു. മലയാളം, തമിഴ്, തെലുങ്ക് ഭാഷകളിലെ പ്രിയപ്പെട്ട അഭിനേതാക്കളെക്കുറിച്ച് പറയാനായിരുന്നു അവതാരകന്‍ ആവശ്യപ്പെട്ടത്.

കല്യാണിയുടെ മറുപടി

പ്രിയപ്പെട്ട താരത്തെക്കുറിച്ച് ചോദിച്ചപ്പോള്‍ കല്യാണി നല്‍കിയ മറുപടി സോഷ്യല്‍ മീഡിയയിലൂടെ വൈറലായിക്കൊണ്ടിരിക്കുകയാണ്. ഈ ചോദ്യത്തിന് ഒരൊറ്റ ഉത്തരം പറയാനാവുമോയെന്നായിരുന്നു താരപുത്രി ആദ്യം ചോദിച്ചത്. ഇതിന് പിന്നാലെയായാണ് മോഹന്‍ലാലിന്റെ പേര് പറഞ്ഞത്. കല്യാണിയുടെ അഭിമുഖത്തിന്റെ വീഡിയോ മോഹന്‍ലാല്‍ ആരാധകര്‍ ഇതിനകം തന്നെ ഏറ്റെടുത്ത് കഴിഞ്ഞിട്ടുണ്ട്. എത്ര പെട്ടെന്നാണ് താരപുത്രി അദ്ദേഹത്തിന്റെ പേര് പറഞ്ഞതെന്നാണ് ആരാധകരുടെ കണ്ടെത്തല്‍.

കുട്ടിക്കാലം മുതലേ

മോഹന്‍ലാലും പ്രിയദര്‍ശനും അടുത്ത സുഹൃത്തുക്കളാണ്. സിനിമാസ്വപ്‌നവും പങ്കുവെച്ച് നടന്നിരുന്ന ഇരുവരും പില്‍ക്കാലത്ത് പ്രിയപ്പെട്ട മേഖലയെ കൈപ്പിടിയിലൊതുക്കുകയായിരുന്നു. സിനിമയ്ക്കപ്പുറത്ത് ഇരു കുടുംബവും തമ്മില്‍ അടുത്ത സൗഹൃദമാണ് പുലര്‍ത്തുന്നത്. ഇവരുടെ മക്കളും സുഹൃത്തുക്കളാണ്. ഒരുമിച്ച് യാത്രകള്‍ നടത്താറുണ്ട് ഇവര്‍. ഏകദേശം സമാനമായ സമയത്താണ് പ്രണവും കല്യാണിയും സിനിമയില്‍ അരങ്ങേറിയത്. അധികം വൈകാതെ തന്നെ ഒരുമിച്ച് അഭിനയിക്കാനുള്ള ഭാഗ്യവും ഇവരെ തേടിയെത്തുകയായിരുന്നു.

പ്രണവിനൊപ്പം അഭിനയിച്ചു

പ്രണവും കല്യാണിയും പ്രണയത്തിലാണെന്ന തരത്തിലുള്ള റിപ്പോര്‍ട്ടുകളായിരുന്നു ഒരിടയ്ക്ക് പുറത്തുവന്നത്. എന്നാല്‍ അടുത്ത സുഹൃത്തുക്കളാണ് തങ്ങളെന്ന് വ്യക്തമാക്കി കല്യാണി എത്തിയതോടെ കുപ്രചാരണങ്ങള്‍ അവസാനിക്കുകയായിരുന്നു. നീണ്ട നാളത്തെ കാത്തിരിപ്പിനൊടുവിലായി കല്യാണി മലയാളത്തിലേക്കെത്തുമ്പോള്‍ ആ വരവിന് ഒട്ടേറെ പ്രത്യേകതകളുമുണ്ടായിരുന്നു. മോഹന്‍ലാല്‍-പ്രിയദര്‍ശന്‍ കൂട്ടുകെട്ടിലെ സിനിമയില്‍ പ്രണവിനൊപ്പമായാണ് കല്യാണി എത്തിയത്.

നിരവധി അവസരങ്ങള്‍

മലയാളത്തില്‍ നിന്നും നിരവധി അവസരങ്ങളാണ് ഈ താരപുത്രിക്ക് ലഭിച്ചുകൊണ്ടിരിക്കുന്നത്. മരക്കാറിന് പിന്നാലെയായാണ് അനൂപ് സത്യന്‍ ചിത്രത്തിലേക്ക് കല്യാണി എത്തിയത്. ഇതിനിടയിലാണ് വിനീത് ശ്രീനിവാസന്‍ തന്റെ പുതിയ സിനിമയെക്കുറിച്ച് പ്രഖ്യാപിച്ചത്. ഹൃദയമെന്ന് പേരിട്ട ചിത്രത്തില്‍ നായകനായെത്തുന്നത് പ്രണവ് മോഹന്‍ലാലാണ്. താരപുത്രന്‍മാരുടെ അപൂര്‍വ്വസംഗമത്തിന് കൂടിയാണ് ഈ സിനിമ സാക്ഷ്യം വഹിക്കുന്നത്.

അച്ഛനൊപ്പമുള്ള അനുഭവം

അഭിനയമാണ് താനും തിരഞ്ഞെടുക്കുന്നതെന്ന് കല്യാണി അറിയിച്ചപ്പോള്‍ പ്രിയദര്‍ശന് ആശങ്കയായിരുന്നു. ക്യാമറയ്ക്ക് മുന്നിലെത്തിയാല്‍ എങ്ങനെയായിരിക്കും പ്രകടനം, കൃത്യമായ താല്‍പര്യത്തോടെയാണോ ഇതേക്കുറിച്ച് പറയുന്നത്, തുടങ്ങിയ കാര്യങ്ങളില്‍ അദ്ദേഹം ആശങ്കാകുലനായിരുന്നു. പ്രിയദര്‍ശന്റെ ശിഷ്യന്റെ സിനിമയിലൂടെയായിരുന്നു കല്യാണി അരങ്ങേറിയത്. ഇതിന് ശേഷമായിരുന്നു അച്ഛന്റെ സിനിമയിലേക്ക് മകളെത്തിയത്. ഏറെ ടെന്‍ഷനോടെയായിരുന്നു ഇരുവരും മരക്കാറിലേക്ക് എത്തിയത്. ആദ്യനിമിഷത്തെ ആശങ്ക പെട്ടെന്ന് തന്നെ മാറിയെന്ന് ഇരുവരും പിന്നീട് തുറന്നുപറഞ്ഞിരുന്നു.