കത്തി താഴെയിടടാ മോനേ! മോഹന്‍ലാലിന്‍രെ കരിയര്‍ ബ്രേക്ക് ചിത്രമായ കിരീടം റിലീസ് ചെയ്തിട്ട് 30 വര്‍ഷം

30 വര്‍ഷം

അഭിനയ മികവിന്റെ ചൂടിയ 30 വർഷങ്ങൾ''...മലയാള സിനിമയിലെ എക്കാലത്തെയും മികച്ച ചിത്രങ്ങളിൽ ഒന്നായ കിരീടം 1989 ജൂലൈ 7നാണ് തിയേറ്ററുകളിലേക്ക് എത്തിയത്. സേതുമാധവനും അച്യുതൻ നായരും മലയാളി മനസിന്റെ വിങ്ങലായിട്ടു ഇന്നേക്ക് 30 വർഷങ്ങൾ ആയി... അതെ, കിരീടം, മലയാളത്തിലെ ഏറ്റവും നല്ല അഭിനയ മുഹൂർത്തങ്ങൾ ഉള്ള ഏറ്റവും മികച്ച സിനിമ ഏതെന്നു ചോദിച്ചാൽ മലയാളികൾക്ക് അഭിമാനത്തോടെ ചൂണ്ടികാണിക്കാവുന്ന സിനിമയാണ് ഇതെന്നുമാണ് ആരാധകര്‍ പറയുന്നത്.

ലോഹിതദാസിന്റെ തിരക്കഥ

തിരക്കഥാകൃത്തായാണ് ലോഹിതദാസ് സിനിമാജീവിതം ആരംഭിച്ചത്. അദ്ദേഹത്തിന്റെ തൂലികയില്‍ പിറന്ന സിനിമകളെല്ലാം പ്രേക്ഷകര്‍ ഇരുകൈയ്യും നീട്ടി സ്വീകരിച്ചിരുന്നു. തിരക്കഥാകൃത്തായി മുന്നേറുന്നതിനിടയിലായിരുന്നു അദ്ദേഹം സംവിധാനത്തിലേക്ക് തിരിഞ്ഞത്. മികച്ച സിനിമകളായിരുന്നു അദ്ദേഹത്തിന്റേതായി പുറത്തുവന്നത്. നിരവധി താരങ്ങളെ അദ്ദേഹം മലയാള സിനിമയിലേക്ക് പരിചയപ്പെടുത്തുകയും ചെയ്തിരുന്നു. യഥാര്‍ത്ഥ ജീവിതത്തിലെ സംഭവങ്ങളില്‍ നിന്നും പ്രചോദനം ഉള്‍ക്കൊണ്ടാണ് അദ്ദേഹം തിരക്കഥകള്‍ ഒരുക്കാറുള്ളത്. അത്തരത്തിലൊരു സംഭവമായിരുന്നു കിരീടത്തിനും കാരണമായത്. അദ്ദേഹത്തിന്റെ നാട്ടില്‍ ഒരു ഗുണ്ടയുണ്ടായിരുന്നു. മദ്യപിച്ച് ആളറിയാതെ ഒരു ആശാരി ഒരിക്കല്‍ അദ്ദേഹത്തെ ആക്രമിച്ചിരുന്നത്. വലിയ ഗുണ്ടയെയാണ് താന്‍ ആക്രമിച്ചതെന്ന് മനസ്സിലാക്കിയ ആശാരി രായ്ക്കുരാമാനം നാട് വിടുകയായിരുന്നു. ആശാരി നാട് വിട്ടില്ലായിരുന്നുവെങ്കില്‍ എന്തൊക്കെയായിരിക്കും സംഭവിക്കുക, ഈ ചിന്തയില്‍ നിന്നാണ് കിരീടം പിറന്നത്.

മോഹന്‍ലാലിന്റെ ചോദ്യം

ലോഹിതദാസും സിബി മലയിലും കിരീടത്തിനായി മോഹന്‍ലാലിനെ സമീപിച്ചിരുന്നു. നാളുകളായി ഇതിനായി ശ്രമിച്ചിരുന്നുവെങ്കിലും താരത്തിന്‍രെ ഡേറ്റ് ലഭിച്ചിരുന്നില്ല. പിന്നീടൊരിക്കല്‍ സിബി മലയിലും ലോഹിതദാസും ദിനേശ് പണിക്കരും കൃഷ്ണകുമാറും ചേര്‍ന്നാണ് മോഹന്‍ലാലിനെ വീട്ടില്‍ ചെന്നുകണ്ടായിരുന്നു കഥ പറഞ്ഞത്. അടിയുണ്ടോയെന്നായിരുന്നു താരത്തിന്റെ ചോദ്യം. കഥ കേട്ടതിന് പിന്നാലെയായി അദ്ദേഹം തന്നെ ആ ചോദ്യത്തിനുള്ള ഉത്തരവും നല്‍കിയിരുന്നു.അടിയുണ്ട് അത് പക്ഷേ നായകന്റെ ഉള്ളിലാണെന്ന് മാത്രം. സേതുമാധവന്റെ മാനസിക സംഘര്‍ഷത്തെക്കുറിച്ചായിരുന്നു പറഞ്ഞത്.

വില്ലനായി എത്തിയത്

ചിത്രത്തിലേക്ക് വില്ലനായി ആരെത്തുമെന്ന തരത്തിലുള്ള ചോദ്യവും അണിയറപ്രവര്‍ത്തകരെ അലട്ടിയിരുന്നു. പ്രദീപ് ശക്തിയെയായിരുന്നു എല്ലാവരും മനസ്സില്‍ കണ്ടിരുന്നത്. അദ്ദേഹത്തിന് അഡ്വാന്‍സ് തുക നല്‍കിയിരുന്നുവെങ്കിലും ഷൂട്ടിംഗിന് എത്താതായതോടെയാണ് മറ്റൊരാളെ അന്വേഷിച്ചത്. ഇതിന് ശേഷമാണ് എയര്‍ഫോഴ്‌സ്‌മെന്റ് ഉദ്യോഗസ്ഥനായ മോഹന്‍ രാജ് എത്തിയത്. അദ്ദേഹത്തെ കണ്ടമാത്രയില്‍ സിബി മലയിലിന് ഇഷ്ടമാവുകയായിരുന്നു. കീരിക്കാടന്‍ ജോസായെത്തിയ താരത്തിന് മികച്ച പിന്തുണയായിരുന്നു പ്രേക്ഷകര്‍ നല്‍കിയത്.