'ഫേസ്ബുക്കിൽ ഒരു ഫ്രണ്ടിനെ ആഡ് ചെയ്യാൻ പോലും ഫ്രീഡമില്ലായിരുന്നു, ടോക്സിക്കല്ല അതിനേക്കാൾ കൂടുതലായിരുന്നു...'

വർഷങ്ങളായുള്ള ഏകാന്ത ജീവിതം അവസാനിപ്പിച്ച് താങ്ങാകാനും തണലാകാനും ഒരു പങ്കാളിയെ കണ്ടെത്തിയിരിക്കുകയാണ് സീരിയൽ താരം ക്രിസ് വേണു​ഗോപാൽ സീരിയൽ നടി ദിവ്യ ശ്രീധറിനെയാണ് ക്രിസ് താലി ചാർത്തി പങ്കാളിയാക്കിയത്. ​ഗുരുവായൂരിൽ രണ്ട് ദിവസം മുമ്പ് അടുത്ത ബന്ധുക്കളുടെയും സുഹൃത്തുക്കളെയും സാന്നിധ്യത്തിലായിരുന്നു ചടങ്ങുകൾ നടന്നത്. ഇരുവരുടേയും രണ്ടാം വിവാഹമായിരുന്നു. ദിവ്യ തന്റെ ആദ്യ വിവാ​ഹത്തിൽ‌ എന്ത് സംഭവിച്ചുവെന്ന് പലപ്പോഴായി പറഞ്ഞിട്ടുണ്ടെങ്കിലും ക്രിസ് ആദ്യ ദാമ്പത്യ ജീവിതത്തിൽ എന്താണ് സംഭവിച്ചതെന്ന് വെളിപ്പെടുത്തിയിരുന്നില്ല.

ഇപ്പോഴിതാ ആദ്യമായി മുൻ ഭാര്യയിൽ നിന്നും തനിക്കുണ്ടായ ദുരനുഭവങ്ങൾ ക്രിസ് വേണു​ഗോപാൽ വെളിപ്പെടുത്തി. മഴവിൽ കേരളം എന്ന യുട്യൂബ് ചാനലിന് നൽകിയ അഭിമുഖത്തിൽ സംസാരിക്കുകയായിരുന്നു മെന്റൽ ഹെൽത്ത് പ്രൊഫഷനുമായും സജീവമായ ക്രിസ്.

രണ്ടാം വിവാ​ഹം തനിക്ക് വേണ്ടി അനിയത്തി ആലോചിച്ച് തുടങ്ങിയതിന് പിന്നിലെ കാരണം വ്യക്തമാക്കിയാണ് ക്രിസ് സംസാരിച്ച് തുടങ്ങിയത്. എന്റെ പേഴ്സണൽ ലൈഫിലുണ്ടായ നഷ്ടവും പിന്നീടുണ്ടായ ലോൺലിനസുമെല്ലാം എന്റെ അനിയത്തി കുട്ടി കാണുന്നുണ്ടായിരുന്നു. ഡിവോഴ്സിന്റെ സമയത്ത് എന്താണ് ഇനി ലൈഫിലേക്ക് വരാനുള്ളതെന്ന് ആലോചിച്ചപ്പോൾ പോലും ഒന്നുമില്ലാത്ത സ്ഥിതിയായിരുന്നു.

എന്തിന് ഞാൻ വീട്ടിലേക്ക് തിരിച്ചുവരണമെന്ന് അമ്മയോട് ഞാൻ പലപ്പോഴും ചോദിച്ചിട്ടുണ്ട്. 2018ലാണ് മെന്റൽ ഹെൽത്ത് പ്രൊഫഷനിലേക്ക് ഞാൻ വന്നത്. ആ സമയത്തെല്ലാം ഒരു കാരണമില്ലാതെ ജീവിതം ഞാൻ മുന്നോട്ട് കൊണ്ടുപോകുമ്പോൾ ഒരു കാരണമുണ്ടായി. പക്ഷെ ആ കാരണം എനിക്ക് 2021 ഒക്ടോബർ ഏഴിന് നഷ്ടപ്പെട്ടു. അവിടെയും എന്താണ് സംഭവിച്ചത് എന്നൊക്കെ ദിവ്യയ്ക്ക് അറിയാം. പിന്നെ ആർക്കും ആരെയും പൂർണമായും മനസിലാക്കാൻ പറ്റില്ല.

മനസിലാക്കാം ശ്രമിക്കാം... കൂടെയുണ്ടാകും എന്ന് പറഞ്ഞതിന് ദിവ്യയോട് ഞാൻ നന്ദി പറയുന്നു എന്നാണ് പുതിയ ജീവിത സഖിയെ കുറിച്ച് ക്രിസ് പറഞ്ഞത്. ആദ്യ ഭാര്യയെ കുറിച്ച് ചോ​ദിച്ചപ്പോൾ മറുപടി ഇങ്ങനെ... ഞങ്ങൾ ഒരുമിച്ച് ദാമ്പത്യ ജീവിതം നയിക്കുന്ന സമയത്ത് എന്റെ ഒറ്റയ്ക്കുള്ള പ്രൊഫൈൽ ഫോട്ടോ ഇടാൻ പാടില്ലെന്നായിരുന്നു റൂൾ. രണ്ടുപേർക്കും ഒരേ ഡിപി മാത്രമെ ഉണ്ടാകാൻ പാടുള്ളുവെന്നും പറഞ്ഞു. അങ്ങനെ പറഞ്ഞിട്ടുണ്ടായിരുന്നു.

ഫേസ്ബുക്കിൽ ഒരു ഫ്രണ്ടിനെ ആഡ് ചെയ്യാൻ പോലും എനിക്ക് ഫ്രീഡമില്ലായിരുന്നു. ടോക്സിക്കെന്ന് പറയാൻ പറ്റില്ല. അതിനേക്കാൾ കൂടുതലായിരുന്നു. ഈ ഫോട്ടോ മാത്രമെ ഇടാൻ പാടുള്ളു, എന്തിനാണ് ഇങ്ങനെ പോസ്റ്റ് എഴുതിയത്?, ഇത് ഇങ്ങനെ എഴുതാൻ പാടില്ല... എന്നൊക്കെ പറയുകയും ചോ​ദിക്കുകയും ചെയ്യുമ്പോൾ റൈറ്ററായ ഞാൻ തോറ്റുപോകും.

പേഴ്സൺ എന്ന രീതിയിലും ആർട്ടിസ്റ്റ് എന്ന രീതിയിലും തോറ്റുപോകും. 2019ലാണ് ഡിവോഴ്സ് പ്രൊസീഡിങ്സ് തുടങ്ങിയത്. സിംപതി എന്ന രീതിയിൽ ആളുകൾ ഇത് കാണുമ്പോൾ.... ആണ് പെണ്ണിനെ തല്ലിയാലും പെണ്ണ് ആണിനെ തല്ലിയാലും ആണിന്റെ ഭാ​ഗത്താണ് തെറ്റെന്ന് പറയുന്ന ഈ സമൂഹത്തോട് മാത്രമെ എനിക്ക് ചോദിക്കാനുള്ളു. ഞാൻ ജീവിച്ച ജീവിതം ഞാനാണ് ജീവിച്ചിട്ടുള്ളത്.

ഞാൻ‌ ആറടി മൂന്ന് ഇഞ്ച് പൊക്കം എന്റെ എക്സ് വൈഫ് അഞ്ച് അടി മൂന്ന് ഇഞ്ച് പൊക്കം... ഒരു അടിയുടെ വ്യത്യാസമാണ് ഞങ്ങൾ തമ്മിലുള്ളത്. ആ അടി എനിക്കാണ് കൊണ്ടത്. തമാശയല്ല... കാര്യമായി പറഞ്ഞതാണ്. ഞാൻ ആരെയും കുറ്റപ്പെടുത്തുന്നില്ല. രണ്ട് വർഷം മുമ്പ് വിവാഹ​മോചിതയായ വ്യക്തിയോട് ഞാൻ എന്ത് പറയാനാണ്. ഇക്കാര്യങ്ങളെല്ലാം ദിവ്യയോട് ഞാൻ പറഞ്ഞിട്ടുണ്ടെന്നാണ് ക്രിസ് പറഞ്ഞത്.

ക്രിസ്സിന്റെ നരച്ച താടിയേയും മുടിയേയും കുറിച്ചുള്ള കമന്റുകൾ കാണാറുണ്ടോ എന്ന് ചോ​ദിച്ചപ്പോൾ ദിവ്യയുടെ മറുപടി ഇങ്ങനെ... ഏട്ടൻ ഏട്ടനായി തന്നെ ഇരുന്നോട്ടെ. ഡൈ അടിച്ചിട്ട് ആരെ കാണിക്കാനാണ്. ഏട്ടൻ ഇങ്ങനെ തന്നെയാണ് എന്നാണ് ദിവ്യ പറഞ്ഞത്. ദിവ്യയുടെ രണ്ട് മക്കളേയും സ്വന്തം മക്കളെപ്പോലെയാണ് ക്രിസ് സ്വീകരിച്ചത്.