'കുഞ്ഞ് പേര് കേട്ടുകാണില്ലേയെന്ന് സംശയം....!'; മകന്റെ പേരിടൽ ചടങ്ങിന്റെ വിശേഷങ്ങൾ പങ്കുവെച്ച് ആതിര മാധവ്!

നൂലുകെട്ടും പേരിടൽ ചടങ്ങും മകന് വേണ്ടി ആഘോഷമായാണ് ആതിരയും ഭർത്താവ് രാജീവും കുടുംബവും നടത്തിയത്. റേ രാജീവ് എന്നാണ് മകന് ആതിരയും കുടുംബവും നൽകിയിരിക്കുന്ന പേര്.

സിംപിളും വ്യത്യസ്തവുമായ പേരാണ് കുഞ്ഞിന്റേത് എന്നാണ് താരത്തിന്റെ ആരാധകർ കുറിച്ചത്. പേരി വിളിച്ച ശേഷം കുഞ്ഞ് പേര് കേട്ടുകാണില്ലേയെന്ന് പരസ്പരം സംശയം ചോദിക്കുന്ന ആതിരയുടയും ഭർത്താവിന്റേയും രം​ഗങ്ങളും പ്രേക്ഷകരിൽ ചിരിയുണർത്തി.

വളൈകാപ്പ്, ബേബി ഷവർ എന്നിവയും ആഘോഷമായി ബന്ധുക്കൾക്കും പ്രിയപ്പെട്ടവർക്കുമൊപ്പം ആതിര ആഘോഷിച്ചിരുന്നു. സിനിമ-സീരിയൽ താരം ഡയാനയും ആതിരയുടെ കുഞ്ഞിന്റെ പേരിടൽ ചടങ്ങിൽ പങ്കെടുക്കാൻ എത്തിയിരുന്നു.

2020 നവംബറിലായിരുന്നു ആതിരയും ഭർത്താവ് രാജീവും തമ്മിലുള്ള വിവാഹം നടന്നത്. ഏറെ നാളത്തെ പ്രണയത്തിന് ശേഷമാണ് വീട്ടുകാരുടെ സമ്മതത്തോടെ ഇരുവരും വിവാഹിതരായത്.

ഏപ്രിൽ നാലിനായിരുന്നു ആതിര കുഞ്ഞിന് ജന്മം നൽകിയത്. ശേഷം പ്രസവ വേദനയെ തുടർന്ന് ആശുപത്രിയിലേക്ക് പോകുന്നത് മുതലുള്ള ദൃശ്യങ്ങൾ ഉൾപ്പെടുത്തിയാണ് വീഡിയോയും ആതിര പങ്കുവെച്ചിരുന്നു.

നിരവധി വ്യാജവാർത്തകളും ചിത്രങ്ങളും പ്രചരിക്കുന്നതിനാലാണ് ഇങ്ങനെയൊരു വിഡിയോ ചെയ്യുന്നതെന്നായിരുന്നു ഡെലിവറി സ്റ്റോറി പങ്കുവെച്ച് ആതിര കുറിച്ചത്. 'ഏപ്രിൽ ഒന്നിനാണ് വേദന തുടങ്ങിയത്.'

'തൊട്ടടുത്ത ദിവസമാണ് ആശുപത്രിയിലേക്ക് പോയത്. രണ്ടു ദിവസത്തോളം ആശുപത്രിയിൽ ചെലവഴിച്ചു. സ്യൂട്ട് ഡെലിവറി റൂമായിരുന്നതുകൊണ്ട് ഭർത്താവിനും അമ്മയ്ക്കും പ്രസവസമയത്ത് ഒപ്പം നിൽക്കാനായി.'

'ഭർത്താവ് നൽകിയ പിന്തുണയും ധൈര്യവും വളരെ വലുതാണെന്നും' ആതിര വീഡിയോയിൽ പറഞ്ഞിരുന്നു. ആതിരയെ ഒരു പോരാളി എന്നാണ് രാജീവ് വിശേഷിപ്പിച്ചത്. 'ഡിസ്റ്റാർജാകുന്നതിന് മുമ്പ് വീഡിയോ ചെയ്യാനാണ് തിരക്കെന്ന് ചിലരെങ്കിലും നെഗറ്റീവായി പറഞ്ഞേക്കാം.'

'ഒരിക്കലും അങ്ങനെ അല്ല. പ്രസവത്തെക്കുറിച്ച് പല തെറ്റായ വിവരങ്ങളും ചിത്രങ്ങളും പ്രചരിച്ചിരുന്നു. ഇതേതുടർന്ന് നിരവധി ഫോൺ കോളുകളാണ് വരുന്നത്. മറുപടി പറയാനേ രാജീവിന് സമയമുള്ളൂ. എങ്കിൽ പിന്നെ യഥാർഥ കാര്യങ്ങൾ സ്വയം പറയുന്നതല്ലേ നല്ലെതന്ന് കരുതിയാണ് വീഡിയോ ചെയ്യുന്നതെന്നും' ആതിര വീഡിയോയിൽ വ്യക്തമാക്കിയിരുന്നു.

ഒന്നാം വിവാഹ വാർഷിക ദിനത്തിലാണ് താൻ ​ഗർഭിണിയാണെന്നും പുതിയൊരാൾ കൂടി ജീവിതത്തിലേക്ക് വരാൻ പോവുകയാണെന്നും ആതിര അറിയിച്ചത്. നിരവധി പേരാണ് ആതിരയുടെ കുഞ്ഞിനും കുടുംബത്തിനും ആശംസകൾ നേർന്ന് എത്തുന്നത്.

എഞ്ചിനീയറിങ് ബിരുദധാരിയായ ആതിര അഭിനയ മോഹം കൊണ്ടാണ് ജോലി ഉപേക്ഷിച്ച് അവതാരികയായി മാറിയത്. പിന്നീടാണ് സീരിയൽ അവസരങ്ങൾ ലഭിച്ചത്.