ഫഹദ് ഫാസിലിന്റെ മാസിന് മുന്നില്‍ വീണ്ടും തകര്‍ന്നടിഞ്ഞ് ബോക്‌സോഫീസ്! കുമ്പളങ്ങി നൈറ്റ്‌സ് മിന്നിച്ചു

കൊച്ചിന്‍ മള്‍ട്ടിപ്ലെക്‌സില്‍ കോടികള്‍

2019 ല്‍ കൊച്ചിന്‍ മള്‍ട്ടിപ്ലെക്‌സില്‍ നിന്നും ഒരു കോടി നേടിയ ആദ്യ ചിത്രം കുമ്പളങ്ങി നൈറ്റ്‌സ് ആയിരുന്നു. പതിനെട്ട് ദിവസം കൊണ്ട് 99.73 ലക്ഷം നേടിയ ചിത്രം 19ാം ദിവസം ആദ്യ പ്രദര്‍ശനങ്ങളില്‍ നിന്ന് തന്നെ 1 കോടി നേടിയിരുന്നു. അതിവേഗം 1 കോടി വാരിക്കുട്ടിയ ചിത്രം റിലിസീനെത്തി 38 ദിവസം കഴിയുമ്പോള്‍ 1.80 കോടിയാണ് കൊച്ചിന്‍ മള്‍ട്ടിപ്ലെക്‌സില്‍ നിന്ന് മാത്രം ചിത്രം വാരിക്കൂട്ടിയത്. ഇപ്പോഴും പ്രതിദിനം 14 ഓളം ഷോ ലഭിക്കുന്നതിനാല്‍ ഓരോ ദിവസവും 4 ലക്ഷത്തിനടുത്ത് വരെ കളക്ഷന്‍ സ്വന്തമാക്കുന്നുണ്ട്. ഇതോടെ അതിവേഗം 2 കോടിയിലെത്താന്‍ സിനിമയ്ക്ക് കഴിയുമെന്ന കാര്യത്തില്‍ യാതൊരു സംശയമില്ല.

വിദേശത്ത് നിന്നും

വിദേശ വിപണികളില്‍ നിന്നും മികച്ച സാമ്പത്തിക വരുമാനം കണ്ടെത്താന്‍ സിനിമയ്ക്ക് കഴിഞ്ഞിരിക്കുകയാണ്. 16.67 കോടിയ്ക്ക് മുകളില്‍ കളക്ഷനാണ് ഇതുവരെ വിദേശത്ത് നിന്നും കുമ്പളങ്ങി നൈറ്റ്‌സിന് ലഭിച്ചത്. യുഎഇ-ജിസിസി യില്‍ നിന്ന് മാത്രമായി 13 കോടിയോളം ലഭിച്ചിട്ടുണ്ടെന്നാണ് റിപ്പോര്‍ട്ടുകള്‍. കേരളത്തില്‍ പരീക്ഷക്കാലമായതിനാല്‍ ചെറിയൊരു ഇടിവ് സംഭവിച്ചിട്ടുണ്ടെങ്കിലും 20 കോടിയ്ക്ക് മുകൡ കളക്ഷന്‍ കിട്ടിയിട്ടുണ്ടെന്ന കാര്യത്തില്‍ സംശയമില്ലെന്നാണ് ട്രേഡ് അനലിസ്റ്റുകള്‍ വിലയിരുത്തുന്നത്.

വിജയമല്ല മഹാവിജയം

കേരളത്തിലെ ഒരു സിനിമയ്ക്ക് മള്‍ട്ടിപ്ലെക്‌സുകളില്‍ നിന്നും ലഭിക്കാവുന്നതില്‍ മികച്ച സാമ്പത്തിക വരുമാനമാണ് കുമ്പളങ്ങി നൈറ്റ്‌സിന് ലഭിച്ചിരിക്കുന്നത്. അടുത്ത കാലത്തൊന്നും ഇത്രയും മികച്ചൊരു പ്രകടനം നടത്തിയ മറ്റൊരു സിനിമ ഇല്ലെന്ന് വേണം പറയാന്‍. ഈ വര്‍ഷം റിലീസിനെത്തിയ നിവിന്‍ പോളിയുടെ മിഖായേല്‍, പ്രണവ് മോഹന്‍ലാലിന്റെ ഇരുപത്തിയൊന്നാം നൂറ്റാണ്ട് തുടങ്ങിയ സിനിമകളെല്ലാം പാതി വഴിയില്‍ തന്നെ മത്സരയോട്ടം അവസാനിപ്പിച്ചിരുന്നു.

കൂട്ടുകെട്ടിലെ ചിത്രം

ഫഹദ് ഫാസില്‍, സൗബിന്‍ ഷാഹിര്‍, ഷെയിന്‍ നീഗം ഇവരുടെ സാന്നിധ്യമായിരുന്നു കുമ്പളങ്ങി നൈറ്റ്‌സിനെ ശ്രദ്ധേയമാക്കിയത്. നവാഗതനായ മധു സി നാരായണന്‍ സംവിധാനം ചെയ്യുന്ന സിനിമയ്ക്ക് തിരക്കഥ ഒരുക്കിയത് ശ്യാം പുഷ്‌കരനായിരുന്നു. മഹേഷിന്റെ പ്രതികാരം, തൊണ്ടിമുതലും ദൃക്‌സാക്ഷിയും ഹിറ്റായതോടെ ശ്യാം പുഷ്‌കരന്റെ തിരക്കഥയില്‍ ഒരുങ്ങുന്ന സിനിമയാണെന്നുള്ള പ്രത്യേകതയും ഈ ചിത്രത്തിനുണ്ടായിരുന്നു. വര്‍ക്കിംഗ് ക്ലാസ് ഹീറോസിന്റെ ബാനറില്‍ ദിലീഷ് പോത്തനും ശ്യാം പുഷ്‌കരനും ഫഹദ് ഫാസില്‍ ആന്‍ഡ് ഫ്രണ്ട്‌സുമായി ചേര്‍ന്നായിരുന്നു നിര്‍മാണം.