മോഹന്‍ലാലിന്റെ പ്രചോദനമാണ് സിനിമയിലേക്കെത്തിച്ചത്! ഒടിയനെക്കുറിച്ച് എം ജയചന്ദ്രന്റെ വെളിപ്പെടുത്തല്‍

മോഹന്‍ലാലിനോടുള്ള ഇഷ്ടം

കുട്ടിക്കാലം മുതലേ താന്‍ ഏറെ ഇഷ്ടപ്പെട്ടിരുന്ന താരമാണ് മോഹന്‍ലാല്‍. ഇന്ന് താന്‍ സിനിമയിലെത്തിയതിന് പിന്നിലെ പ്രധാന കാരണങ്ങളിലൊന്നും അദ്ദേഹത്തിന്റെ പ്രചോദനമാണെന്നും എം ജയചന്ദ്രന്‍ പറയുന്നു. ഫേസ്ബുക്ക് വീഡിയോയിലൂടെയാണ് അദ്ദേഹം ഒടിയനെക്കുറിച്ചുള്ള ലേറ്റസ്റ്റ് വിശേഷങ്ങള്‍ പഹ്കുവെച്ചത്. ഈ സിനിമയുടെ സംഗീത സംവിധാനം നിര്‍വഹിക്കാന്‍ കഴിഞ്ഞതില്‍ താന്‍ അങ്ങേയറ്റം സന്തോഷവാനാണെന്നും അദ്ദേഹം പറയുന്നു.

സംവിധായകന്റെ വിശ്വാസം

മോഹന്‍ലാലും വിഎ ശ്രീകുമാര്‍ മേനോനും ഒരുമിച്ചെത്തുന്ന ചിത്രമായ ഒടിയനിലേക്ക് താന്‍ എത്തിയതെങ്ങനെയാണെന്നും അദ്ദേഹം വ്യക്തമാക്കിയിട്ടുണ്ട്. സംവിധായകന് തന്നിലുള്ള വിശ്വാസമാണ് തനിക്ക് പ്രചോദനമേകിയതെന്നും അദ്ദേഹം പറയുന്നു. ശങ്കര്‍ മഹാദേവന്‍, ശ്രേയ ഘോഷാല്‍, എംജി ശ്രീകുമാര്‍, മോഹന്‍ലാല്‍ തുടങ്ങിയവരാണ് ചിത്രത്തിലെ ഗാനങ്ങള്‍ ആലപിച്ചത്. അഞ്ച് ഗാനങ്ങളാണ് സിനിമയില്‍ ഉള്‍പ്പെടുത്തിയിട്ടുള്ളത്.

ലക്ഷ്മിയുടെ എഴുത്ത്

വിഎ ശ്രീകുമാര്‍ മേനോന്റെ മകളായ ലക്ഷ്മിയും ചിത്രത്തിനായി ഗാനമെഴുതിയിട്ടുണ്ട്. കുട്ടിക്കാലം മുതല്‍ത്തന്നെ മലയാളത്തെ ഏറെ ഇഷ്ടപ്പെട്ട മകള്‍ തന്റെ ആദ്യ ചിത്രത്തിനായി ഗാനമൊരുക്കിയതിന്റെ ചാരിതാര്‍ത്ഥ്യവും അദ്ദേഹത്തിനുണ്ട്. വളരെ മനോഹരമായാണ് ലക്ഷ്മി ഗാനം രചിച്ചിട്ടുള്ളതെന്ന് എംജി ശ്രീകുമാറും എം ജയചന്ദ്രനും സാക്ഷ്യപ്പെടുത്തിയിട്ടുണ്ട്.

മനസ്സിലുറപ്പിച്ചിരുന്നു

ഒടിയനെന്ന ചിത്രം ചെയ്യാനായി ഇറങ്ങുമ്പോള്‍ സംഗീത സംവിധായകനായി എം ജയചന്ദ്രനെ താന്‍ മനസ്സിലുറപ്പിച്ചിരുന്നുവെന്ന് സംവിധായകന്‍ പറയുന്നു. കേട്ട് പരിചയമുള്ള ഒടിവിദ്യയിലും ഒടിയന്‍ കഥകളിലുമുള്ള താളം പുനരാവിഷ്‌കരിക്കാന്‍ അദ്ദേഹത്തിന് കഴിയുമെന്ന് അന്നേ ഉറപ്പിച്ചിരുന്നു. ഈണത്തെക്കുറിച്ച് അദ്ദേഹത്തോട് സൂചിപ്പിച്ചപ്പോള്‍ത്തന്നെ താനാഗ്രഹിച്ചത് ലഭിച്ചുവെന്നും സംവിധായകന്‍ വ്യക്തമാക്കിയിട്ടുണ്ട്.

വീഡിയോ കാണാം

എം ജയചന്ദ്രനും വിഎ ശ്രീകുമാര്‍ മേനോനും എം ജി ശ്രീകുമാറും ഒടിയനെക്കുറിച്ച് പറയുന്നതെന്താണെന്നറിയേണ്ടേ? കാണൂ.